Xuuma Amoosi 3 - Mataafa Qulqulloota

Xuuma a Isira'eeli qara' lelame

¹ Ishina a Waaqa piita Kipsi kara ishin sookshe hellaa Isira'eelitiiyyi piisantiiyyi, wa Waaqa ishina qara' haasawanna dakkaysada.

² I'ishina' kiini, “Ha waan malla juppoota a koonittan piisa kapa' ishin qatta'a, qootan anti orra piita qara kalo pisa oppa ishin patta reexade malla.

³ Hela nama lakki a oltura xoora in qapannin maliiyyi, oli akka ka ollin anta i'ettaninni?

⁴ Taaki karma a wa qapa'en akkannin maliiyyi, hela ipatta' koommaytoppa daattini? Taaki haara karma a wa dama in qapannin maliiyyi, ipatta' xorini?

⁵ Taaki hela xampirteeta a ereera in qaassammin maliiyyi, iqara' qapammi? Taaki turuura a we takkan nefo quda in kaynin maliiyyi, ipatta' firri?

⁶ Taaki oto paleetoppaayye kaasa oranna' dawammooyye, nama tammaqni in kinnin ica? Taaki a Waaqa kido maliiyyi, wa neeqa ipaleeta qara' kayni?

⁷ Ha dukaatan Waaqase piisa qara qapo wa koda dikade a turandesa xuumampayasene orxayaadi koddeeti in lellin maliiyyi, we takkan nefo kooni in co.

⁸ Hela oto karma daattinooyye, nama fuurri in kinnin ica? Taaki oto Waaqase piisa qara qapo isha' kido xuuma haasawadooyye, nama xuuma haasawanni in kinnin ica?

Pi'itta a piita Samaariya

⁹ Orra piitadda Ashtooti isho a Kipsi kara kalo piisa' salisha ka kida, “Irrowwa piita Samaariya qaropa ollopa xorri ka neequmta isho karpa ishootta karaayye kodamma' tooya.”

¹⁰ Waaqa ikiini, “Orra wa a karpa isho a saraatin tikkaasso immakno, wa paxaara koda in upo.”

¹¹ Semmalla Waaqase piisa qara qapo ikiini, “Paarkaala de'a ka piitaaysho kapa mura ka kawwaya a paleetaayshoti alle qitqishsha ka tikkaasso kara wa qapane kuli turaayye sara.”

¹² Waaqa ikiini, “Akkima sikmayta afaa karma oppa loqqa lakki takki qojjanta napahata kanno ka ishin pahano mina'e, asseew orra Isira'eeli a piita Samaryaati kalo oppaayye orra lamayta kelaayye paha.”

¹³ Waaqa Poqalla, Waaqase we piisa ettaninno ikiini, “Waan kiina dakkayssada! Ka sanynyeeta Yayqoopi qara' maakkuma.

¹⁴ Kuyyaata an juppoota a koden malla samayta Isira'eeli' qattaanooyye, poqasene a qara kalisoota kalinnaane a Peteliiyyi ca'en alle' qitqishsha ka kaassa poqase qara' kalisoota kalinnaan qara ca' nefo ka moojaman ka piitopa seehan.

¹⁵ Tikkasene a poneeyye isho sorooreeyye kara' kallaannaane' piisan alle' turaayye pulpula ka tikkasene hirta arpatin sirene isho tikkasene kukutta' piisa alle' qitqishsha.”