Xuuma Amoosi 2 - Mataafa Qulqulloota

Mo'apeta qara'e

¹ Waaqa ikiini, “Samayta a katama Mo'api' qoota a lekatin juppoota kode malla, an ishootta qatta'o ka qara' erkannaata qeedo mali an diisho; ha ishootta lafa a nuqusa Etoomi'i' piita kela pooten ka kupen.

² Semmalla anti katama a Mo'api oppa'en apitta diisha ikka tikka a katama Qiiriyooti kuli alle' kupa. Torpampaya ka nyara ka kaasa a oranna dawattaan de'an ka orra Mo'api alle' piran.

³ Mukissampayta piita Mo'api isho saarraadi piisan alle' pira.” Waaqa asse kiini.

Yihutaata qara'e

⁴ Waaqa ikiini, “Yihutaata qoota a lekatin juppoota koote malla, an isheetta qatta'o ka qara' erkannaata qeedo mali an diisho; ha ishootta seeriyyo a Waaqa'e puyaden umma ajajiyyo in tooytanne ka akkimase a aappadaasso' mina'e, waaqaddasene a dartatin sassapatamen.

⁵ Semmalla anti piitase a Yihuta oppa'en apitta diisha ikka tikkasene a Yursaalami' kuli alle' kupa.”

Firteeta Waaqa a Isira'eeli qara' kayto

⁶ Waaqa ikiini, “Samayta Isira'eeli' qoota a lekaatin juppoota kode malla, an ishootta qatta'o ka qara' erkannaata qeedo mali an diisho; ha ishootta hanqeellaya kuura oorissa malaale isho teekolaya xopa a piddadeneeti' kaaja daassata malaale'e karpishshuma' katanni.

⁷ Ka nukkulaya isho orra nama ishootta qara sapay kido in qapnini piita' kanni ka xolmaappa diddiinni; umma naalaya dukaata murri in caan. Qoota aappa ka innaanne iskatteeta takka olli almalummaan malla, kodoose' xaayshotin maxxase' xayyo qulqullaawe ka jeerri.

⁸ Teekolaya a kuuraaysho' daassata malaale' qara ohawwa qapsiisanni ka pora oppa kalisoota dehaannaan piisa oppa afanni ka oppaayye mukni ka wayneetase a orrase kuuraaysho' qapo qara qeeden qeenni ka tikase a Waaqaayshoti kela ikni.

⁹ Ha anti ishin mallan kide ka orra piita Amoori a dettatta' mina deddera ka a kolalta' mina kokokkoka qara dalta dawre ka hittinnaasso alle' qishshe.

¹⁰ Ka akka piita Amoorata lehattane'e piita kipsi kara ishin sookshe ka para kunda afur piisa koommaytoppa ishin tura' qatte.

¹¹ Ka hellaassin a hamiyya oppaayye a demo akka xuumampaya koddane' reexe ka xayyoolaytaayshin oppaayyeew, a deemo akka “Orra dawra” Koddane' reexade. Samayta Isira'eelitiiyyi, anti Waaqa in kiini, “Hela sede an are haasawanno dukaatanne?”

¹² Ma xoori ishina “Orra dawra” Karopa taadeta wayneeta ikinnittan ka xuumampaya nefo xuuma haasawatta dawrinittan.

¹³ Semmalla anti akkima shila wa a qara pi'a jaqqalinno mina'en ishin jaqqalsha.

¹⁴ Sitiiyyi keerampayta keeritta malaala; hupnampayta ka nukkullaada; torpampayaaw. issin paha in ettanshan.

¹⁵ Umma a paantadaan pokkina' tura' quna in ettanshan; keerampayaaw, qaha malaalan; a fartan kulufna' nefo issin paha in ettanshan.

¹⁶ Kuyyaasetiiyyi, xormewwasene a oranna kuli mehaddaasso iskamman dakka ka harka luleetin qaha.”