Xuuma Amoosi 1 - Mataafa Qulqulloota

¹ Xelta Oosiyaani' piita Yihuta' qara' nuqusummooyye, Iyyoorpi'ami inna Yo'asi ka piita Isira'eeli' qara' nuqusummooyye, orra piita Taqo'a karaayye horeeta siksanno oppaayye nama takka Amoosi kidammo, a piita in lelleehnini para lakki turanne qoota Isira'eeliti desa xuuma haasawade.

² Ka kide, “Waaqa irroota Siyyooni' qara xata akka a karma' mina'e nessa orra fuurinnon haasawanni; nessaadi ka Yursaalami desa harmo' dakaanni; deetta a sikmaya oppopa horeeta dawwinaan, alle'e ruqa; aykitta ilaawa a irroota Qermeloosi' qara co ka koka.”

Firteeta a Waaqa piitadda Isira'eeli kapandesa kala' qara' qeedo Soorata qara'e

³ Waaqa ikiini, “Samayta katama Tamaasqo' qoota a lekaatin juppoota kode malla, an ishootta qatta'o ka qara' erkannaata qeedo mali an diisho; ha ishootta samayta a Kele'adi qara xopa a silpaatin aanen ka rakkacciisen.

⁴ Semmalla tikase a nuqusa a Saheeli oppa'en apitta diisha; ikka tikase a nuqusa a Penhataati alle' kupa.

⁵ Torpampaya a xarrada Tamasqotin dufnaane' piisan alle' qeqqepsha ka orra naabba Awweni kara kalo alle' pira ka saarra piita Peti'eteni alle' pashsha; samaytose a Sooriya' piita Qiiri opa alle' poojama.”

Filisteemeta qara'e

⁶ Waaqa ikiini, “Samayta katama Kaasa' qoota a lekatin juppoota kode malla, an ishootta qatta'o ka qara' erkannaata qeedo mali an diisho. Ha ishootta orra paleewwosene a poojene' piisa qeede ka Etoometa karpishshuma' daashe.

⁷ Semmalla anti katamoosen a Kaasa oppa'en apitta diisha ikka tikkaasso' piisa kupa.

⁸ Anti samayta katama Ashtooti kara kalon alle' pira ka saarra katama Asqeloona alle' pashsha ka orra katama Eqrooni kara kalo qatta'a; umma Filisteemeta peela in hasan.” Waaqase' piisa qara qapo asse kiini.

Tirooseta qara'e

⁹ Waaqa ikiini, “Samayta katama Tiroosi' qoota a lekatin juppoota kode malla, an ishootta qatta'o ka qara' erkannaata qeedo mali an diisho; ha ishootta kodayteeta a hellaasso oltura qapane alle' diishen ka orra a palewwosen a poojene' piisa qeeden ka Etoometa karpishshuma' daashen.

¹⁰ Semmalla anti katamoosen a Tiroosi oppa'en apitta diisha ikka tikkaasso' piisa kupa.”

Etoometa qara'e

¹¹ Waaqa ikiini, “Samayta katama Etoomi' qoota a lekatin juppoota kode malla, an ishootta qatta'o ka qara' erkannaata qeedo mali an diisho; ha ishootta hellaasso a Isira'eeli' qara'e miiran xa'en ka orannaan kamma daanen; umma miiraysho in harfisanne ka ishootta'en nyarraahne.

¹² Semmalla anti katamoosen a Temaani oppa'en apitta diisha ikka tikka a Posraani kuli alle' kupa.”

Amooneta qara'e

¹³ Waaqa ikiini, “Samayta katama Amooni' qoota a lekaatin juppoota kode malla, an ishootta qatta'o ka qara erkannaata qeedo mali an diisho; ha ishootta xeela tuukatta malla piita Kele'adi' torpen ka iskatta karittoppa inna qapo kuli kara hellaa kakkaa'en.

¹⁴ Semmalla anti katamoosen a Raapa oppa'en apitta diisha ikka tikkaasso' piisa alle' kupa. Kuyyaase a orannaati yaaqyaaqta isho ullupitta ka ollin koopa; oranose' nefo a apitta' mina'e kupa.

¹⁵ Nuqusa isho saarraasso' piisa ka takka ollin poojama.” Waaqa asse kiini.