Tiito 3 - Mataafa Qulqulloota

Koda kiristaana

¹ Orra piisa akka piddampaya isho ukkumampaya'e naalumaan ajajamo, ishootta matte oorshe ka a koda paxaara piisa kodeeta' harmisade koddane'e ishootta dehaame.

² Ka nama takka nefo qara wa neeqa in haasawnini'i dehaame; Sekapaayye a nama oli peeqni in kinnini ka tajjana isho a orra piisa tura mattaaysho xata shakkinna a kodden.

³ Ino' nefo setturanne an eeppa a ajajammi in kinnini ka a kamma dape ka a xajeelta ika lekayta isho xasa so'aati karpishshume. Ka falqa ka yootan kallaanna ka needdatame ka oli needdanna.

⁴ Ma xoori, xoona isho jaalalasene suraysattaan immakaade a dinshampaytase' xanno a Waaqa ete akkaadeneeyye,

⁵ Koda hanqeelluma an ino' koonen ino an dininnema, isha diissataadin ino dinshe ka jaqqattase a Hapura Qulqulloota oppan daloota haaraya ka caatta haaraya daannon ino dinshe.

⁶ Waaqa, daassataadi a xoonaatinni dinshampaytase' xanno Yesuusi Kiristoosi qudanne, Hapuraadi kuttumtan tupaxata ino' tuqa.

⁷ Sede nefo wa malla asse kode, akkan daassataadin hanqeellummo ka caattase a parapara an kippeetan asanninno, lehaanno malla.

⁸ Sede qaaleta amanamte. orra Waaqa amane akka koda paxaara koda' japaado'e, akka sede piisa kokkonnasson faani. Sede wa paxaara ka nama piisa'e we' nakanniiy.

⁹ Ma xoori shiishsha eeppa ka xeltada dikeeta ka nyaanynyeta isho peeqa aseera minan xaano kapa sekaado. Sene wa we' nakanni in kinnini, a paata patta'ey.

¹⁰ Nama olkela orra qoonno, oto takka ka lakkin dehaamto kammaayye, kapa sekaado.

¹¹ Nama asse paho quumara ka juppoolayta; akka mattaadi isha is qara' farate upnaado.

Dehaamta a piraampira

¹² Oton Artemaasi taaki Tikiqoosi ke kapopa erkinooyye, atti katama Niqopoliyooni opa ana kapopa deena' jarjare. Anti eyye'en soroora tarpissa' piisadey.

¹³ Senaasise seera upo isho Appiloosi anta' xaashe ka wa ishootta' parpaaccisna' piisan qaarqaara'e wa' ettaninnitta piisa kode.

¹⁴ Orrinnoow akka wa ishootta' parpaaccisna akkado ka kallaata a kara dalta in qapnin in kallaannini'i, a koda paxaara kodeeta kollado.

¹⁵ A ana olli ca' piisa ke' nakayta erkini. A amanteetinno oppa qoottanna ka ino jaalanna' piisae' nakaytinno lele. Daassata Waaqa a ishin piisa olli caatto.