Tiito 2 - Mataafa Qulqulloota

Qoota kollissa dukaatati desa

¹ Atti' xoori kollissa a ishin caatta teynaan kollishe;

² diira a qime akka mina' desa kallaadan ka ulfeenaaysho' tooytaadan ka a isi tooytaanna koddan ka amanteeta ka jaalala isho duupattaanne a fayya qapa' koddane'e, ishootta dehaame.

³ Akkimose' mina'eew iskatta a qime a qalpeetaayshotin Waaqa fuurra ka pora nama haasawni in kinnini ka ikkayta kamma' kammi in kinnini ka a kollissa dukaata' kollinna, akka koddane'e, ishootta dehaame.

⁴ Iskatta a qime akka iskatta a ayya qapo diiraasso isho hellaasso' jaalado a kollishen.

⁵ Ka akka a isi tooytaanna ka a qulqullaawe ka a tikkaasso' kara kodaan qapamma ka a nama xoona ka a diiraassoti afaa dakayna koddane'e a ishootta kollishen. Wa malla asse kodane' nefo, akka qaaleta Waaqa in otammin malla.

⁶ Akkimoose' mina'eew hellaa a diira a xayya qapa'ew akka isi tooytaattan kallaadane'e ishootta dehaame.

⁷ Atti'iw wa paxaara' kodeetanne we piisan ishootta' pahana kodde. Ka akka kollissaayti' piisatte ka dukaatan isi piisa daasse akkishe.

⁸ Akkima haasa paxaara a qaja in qapnin haasawannaan ishootta' akkishe; sede oori, toorampaya oto wa ino qara' haasawadane' dapaneeyye, ijeeran.

⁹ Karpishshaddaaw akka poqalladdaassoti ajajaman ka we' piisan ishootta xasayshan ka afa neeqa ishootta mina'en oorinnin,

¹⁰ ka kaajaasso ishootta kela in hannini, ishootta dehaame; Sekapaayye akka kollissa a dinshampaytinno a Waaqa we piisa oppa ulfeessamo'e awta piisa a immakkootan amanumaaysho akkishen.

¹¹ Waaqa saanta a ishin orra piisa dinsho akkissaanne akka xoonampayta kodde upnayshe.

¹² Daassatose' nefo, akkan Waaqa marmatta isho xajeelta so'a alle diinno ka isi tooytaatta ka qajeeluma isho Waaqa fuureetan piisse' qara' kallaanno ino kollinni.

¹³ Seden oori, kippeetase' xanno eeppisamte, deenasene a ulfeena a Waaqase' xanno kuttati a dinshampaytase' xanno a Yesuusi Kiristoosin asanna.

¹⁴ Kiristoosi, akka ukkuttuma piisa kela ino furado ka akkan samaytaadi koddino ka a koda paxaara piisa kodeeta yaatanna' koddino'e, ino jaqqeeta malla toota isi daashe.

¹⁵ Semmalla sene kollishe ka hupna ukkumeeta immakkootan dehaame ka fuke. Nama takka' nefo ka ke'e in puyannin.