Tiito 1 - Mataafa Qulqulloota

¹ Ana Pawloosi, a orxayta Waaqa ka erkamampayta Yesuusi Kiristoosi kodde ka orra a Waaqa reexade kokkonnassa'e ka dukaata Waaqa fuureetan kallaatta akka immakkootan upnaadane' koda shuumame kapaayye, erkana erkame.

² Amanteetose kippeeta caatta parapara' qara'e qa'atte, Waaqase darta kooni in kinnin ka akka caattose ino' daasho'e a etaan paayyannin turanne qaaleta ino' kale;

³ ete sapanase a Waaqa qapade kayteeyye, ajaja a dinshampaytase' xanno, a Waaqatinni qaalese torreeta an ishi atara teyyade qudanne Waaqa qaaletaadi akkishe.

⁴ Amanteetase an oltura qapnonne ka a innaayyo a dukaata kodde, Tiito'e. Waaqa Aappa ka dinshampaytinno Yesuusi Kiristoosi kapaayye a daassata ka nakayta ke' kodden.

Koda Tiito Qertesi kara

⁵ Wa an malla Qertesi kara ke diishe, akka wa in harmisammini harmisso ka akkan ke ajaje qara'e, qimaya a tikka kiristaana katamaddaappa' shuumto malla.

⁶ Qimayta tika kiristaana, a qaja in qapnin, a iskatteeta takkaaw qapo a hellaadi Waaqa amannaan, maxxaaysho ka almaluma isho toolaayshoti ajajama diissata minan xaani in kinnin, kodda isha faani.

⁷ Saara tika kiristaana' qoota koda Waaqa atara teyyade malla, a qaja in qapnin kodda isha faani ka a isi jeejjini in kinnin ka a irra qara miironni in kinnin ka a maashshoonni in kinnin ka a peeqqampayta in koddinin ka a kaaja kammaaw keerri in kinnin kodda isha faani.

⁸ Sekapaayye a xaykitta teyyanno ka a wa paxaara' jaalanno ka a isi tooytaanno ka nama taanteta' kodde ka a koda Waaqati isi reexxe, ka a mina' desa kallaanno koddo.

⁹ Akka kollissa dukaata' kollissa ettansho'e ka dehaama ka toorampaya mina' haasa oorissa ettansho'e, akka kollade qara'e a qaaleta amanteetatin kokkonnaado.

¹⁰ Orra lekayta xawwi' desa a Yihutaata kodde ka taanteta a dawra qara muratta kamma anno ka ajajammi in kinnini ka patta nyaanynyino ka orra sassapanno ca.

¹¹ Sene jaw ki'issa parpaaccisni; ishootta' tookta jeera akkatta malla wa kollissa ishootta parpaaccisni in kinnini kollinni ka toolla piisa pulliiyi.

¹² Xuumampayaasso oppa takka ikide, “Orra Qerteesi awta piisa daraampaya ka pinaana neeqa ka hombaalliyya a koda kooni in kinnini.”

¹³ Ma xuumoose' nefo dukaata. Semmalla akka amanteeta dukaata' qapnaadane'e, fayya ishootta fuke;

¹⁴ Ka akka torra Yihutaata kamma in annin ka ajaja a orra dukaata toorrooti in dakkaysannini'i, a kuttati ishootta fuke.

¹⁵ A qulqullaaweti'i we' piisa qulqulloota orra nyale ka amanni in kinniniti' xoori, wa a qulqullaawe takka' nefo in caan. Laadi mattaaysho isho dikattaaysho a karanxata' piisa nyale.

¹⁶ Ishootta ikiini “Waaqa in upna” Ma kodaayshotinni isha marmanni. Ishootta orra ifatammo ka ajajammi in kinnin ka koda paxaara takka nefo koda ettaninni in kinnin.