Masmuureta a masmuurewwa piisa qara jaallitto 6 - Mataafa Qulqulloota

Jaalala we piisa qaropa fadammi Moottada enenta'e haasawanni

¹ Atti ke a iskatta piisa qaropa xarjaalluma' jaalte, ishase a' jaalatte hela ayshopa aane? Ishase a' jaalatte hela ayshandesa aane anka ollin faana?

Enenta haasawanni

² Ha ishase an jaalade xelloota dawwa'e ka pisase' papaxxaara qapsatta'e yeelase a oppa qimaameewwa ika lekaya aylaadepa xata lekkade.

³ Innasene an jaalade, isha' xayyo, anti ka an xaadi. Isha pisa a paxaara kapopa xellootaadi dawwini,

Inna haasawanni

⁴ Ke an jaalanno enenta, ha atti, akkima katama “Teriisa” mina'e quda siramte ka akkima katama Yursaalami mina' paxaari ka akkima xela oranna a nyaraan xa'e mina orra fuurinni.

⁵ Ana qara pirriiy; ildaatti ana quda pute. Nyirfaatti xelloota takka a tela irroota Kele'aadi quda xata lekkannitto pahan.

⁶ Ilkaatti xelloota takka a kahirra a quda nyirfa mujen ka pishaan jaqen, a lakki lakki xaaynitto maxeena ka oppa in kinnini pahan.

⁷ Addasene' xaayti shaashetaayti karan akkaanna, pisa a lakki' paqqe pahan.

⁸ Haantoowwa nuqusa kunda lehi ka iskattaadi kunda sette isho tuparra a dikoota in qapnini a caaden.

⁹ Elelaayyo a qaja in qapnin xoori pilayteetaay. Aayyaasso isheetta takkaaw qapta, a isheetta xaayte isheetta takkaaw reexatte tuparra ka isheetta akken ka isheetta sanaysaden. Haantowwa nuqusa isho iskattaadi kuli ka isheettaaw saarshe.

¹⁰ Ini a hikkitta paramina' mina' piirte, ka leya mina' la'ayte, ka a atoota' mina awdite, ka a xelase a oranna a nyaraan xa'e mina orra fuurinnitto ini ayno?

¹¹ Dishimase yeela kara co tooyya'e, ka akkima wayneeta japarte, roomaani ka piste akka'en dulase a lawseeta oppopa sookade.

¹² An sede an upnaannin turanne, xajeeltiyyo ana qeede ka sarakeellasene a nuqusa orraaynoti kara'e otantoppa ana xaaye.

Moottada enenta'e haasawanni

¹³ Atti Sulamatiisi tiitaawe, tiitaawe akkiman ke akkino'e, atara tiitaawe tiitaawe. Ishina, orra takka kirpa Mehanaayimi tooyno mina'e, maana malla Sulamatiisi quda tooynittan.