Masmuureta a masmuurewwa piisa qara jaallitto 5 - Mataafa Qulqulloota

Hemampayta haasawanni

¹ Enentinno, haantotiyyo ha' dulase xayyo oppopa in sookade. Ka karpeetiyyo isho qimaamewwaayyo olopa qapsade ka laaqqotiyyo a takma miilaadi ollin dame ka taadetiyyo a wayneeta aannaayyo ollin ike. Ishina' moottadaannooyye, dama ka ikka ishina ino jaalannatiiyyi, haka' duttannittane'e ika.

Moottada enenta'e haasawanni Enenta haasawanni

² Anti in muke ma karanxata paata in upa nessa innasene an jaaladeeti iddakaynittane? Isha xaroppa kooko'inni ka kiini, “Enentinno, ke an jaalanno, elelaayo ke a qaja in qapnin, mattiyyo itadahasadeey, nyirfaayyo nefo qoyyinta halkeettatinni japeneey, xarra ana tura pane.”

³ Anti uwwaayyo in furadeey hela amman hiddadaawwe? Loqqaayyo nefo in jaqadeey hela amman jurayshaawwe?

⁴ Ishase an jaalade harkaadi qaawa karan kullishe. Karittiyyo ka isha malla tuktuke.

⁵ Anka ishase an jaalade tura xarra paneeta' xa'e; harkaasene' xayyo karpeetan affaawe, ka qupiyyasene' xayyo karpeetan qoqoyyade ka qulfeeta xarra qappaden.

⁶ Anka isase an jaalade turaayye xarra pane ishase an jaalade xoori itiitaawe ka tawe. Qoota tawe malla karittiyyo ka tammaqe. Anka isha fade ka isha dape ka isha hale ikka ana kelaayye in ehannin.

⁷ Tooytampayasene katama tooytina ka ana akken ka anoppa qiden ka ana matayshen tooytampayosen kawwatta katama' tooytina ka ohaatiyyo ana quda saren.

⁸ Ishina' tuparra Yursaalamitiiyyi waan ishin qinsanna, oton ishase an jaalanno akkitaneeyye atta ishi' kiitan? Xela akkiman jaalalaadin paaqno ishi' lela.

Moottada enenta'e haasawanni

⁹ Atti ke a tuparrappaayye xarjaalluma' jaalte, hela ishase a' jaalatte maanaanne diira a taakane' qara jaalli akka asse ino naappanni? Hela ishase a' jaalatte maanaanne asse orra qara jaale?

Enenta haasawanni

¹⁰ Ha ishase an jaalade xarjaallitta ka oyni umma kadi punu xarjaallewwa diira nama kuma kudan isha kapa' qeedan nefooyye isha in kayan.

¹¹ Mattaadi warqeeta paxaara'e paha nyirfaadi luushayta ka a qurrupayta' mina' poori

¹² ildaadi elela a aannan jaqen, ikka kirra pisha kapa' qaa'e pahan.

¹³ Addaadi qimaameewwa alaawna a pora poran xaayene pahan hibbaadi pisa a minaxata shittoota tajtajno pahan.

¹⁴ Harkaadi warqeeta deddera a mina warqeetaaw marene'e pahan. Dakintaadi hirta takka a arpa a harmitta quda sire pahata

¹⁵ loqqaadi tuudda ipnepereti takkan kiritta warqeeta qara' qaqaatishene'e pahan. Pahanaadi irroota Lipaanoosi a qora talta siratte pahan

¹⁶ afaadi akata me'aawni isha isipiisanne akata paxaari. Ishina tuparra Yursaalamitiiyyi, ishase an jaalade tooy sede xelittase xayyo tooy sede.