Masmuureta a masmuurewwa piisa qara jaallitto 4 - Mataafa Qulqulloota

Hemampayta haasawanni

¹ Keese an jaalanno enenta, oo atta' paxaari? Oo atta a xarjaallitteeta? Ildaasene' xaayti shaashetaayti karan akkaanna, ilda elela'e pahan. Nyirfaatti xellootase a tela irroota Kele'aadi quda xata lekkannitto pahan.

² Ilkaatti xelloota takka a kahirra, a quda nyirfa mujen ka pishaan jaqen, a lakki lakki xaayna maxeena ka oppa in kinnini'i pahan.

³ Hibbaatti rufta tiima'e pahan afaatti nefo asseew paxaari. Addasene' xaayti shaashetaayti karan akkaanna pisa lakki' paqqe pahan.

⁴ Xolmaatti kawwattase a Taawwiti a tooya, a quda meeha orana raken, kontaleeta kuma ka quda raa'initto pahan

⁵ amaddaatti lakki, nyalqa takkan a kuumanta sallahama' dalade, ka pisa paxaara oppopa dawwade'e pahan.

masmuureta a afratta Takkumta hemitta

⁶ A letta in dummin turan kaattillayta ka in tawnin turannen irrootase a karpeeta ka kunkunnaatase a tankarta qaropa fayyada.

⁷ Enenta ke an jaalanno ke piisa paxaari umma qaja takka nefo a' qapto.

⁸ Haantotiyyo piita Lipaanoosi karaayye ana olli xooye, piita Lipaanoosi karaayye ana olli xooye. irrowwasene a qaraayye karmada isho qayrana kalaneti, kuuta Amaana qaraayye, ka kuuta a Seneeri isho a Hermooni' qaraayye lekkado

⁹ enentinno haantotiyyo, ha sataata' ana kara qeette. Tooyyattaayti a' takkan ana tooyyatte ka siraatti a xolma kela takkayaanne ana kara sataata qeette.

¹⁰ Enentinno haantotiyyo, oo jaalalaatti atta nama xasanni jaalalaatti taadeta wayneeta qaropa a kuttati qapan. Aluma shittootaayti nefo qimaamewwa piisa qaropa jaalli.

¹¹ Haantotiyyo, hibbaatti mina xata takma tajtajni. Arrapaayti qaraayye aanna isho takma ca aluma a ohaataayti shittoota Lipaanoosi Lipanoosi'i alaawni.

¹² enentinno haantotiyyo ha atti, a' dula kapa oxname mina ka a ela tura dufame mina a paada tura pashshen mina.

¹³ Sakkattaayti a duloppa roomaani ka lukkatase reexxamte heena, isho nardoosi kidammitto.

¹⁴ Ka nardoosi ka qeeka ka aykitta alaawno ka qerefa ka qora tankarta ika lekayta ka qoyra ika lekayta ka kerpe ka arkayta ka qimaamewwa piisa.

¹⁵ Atti a' ela duloppa a paada pisha urqina ka a kirra Lipaanoosi.

Enenta a hemamte haasawanni

¹⁶ Atti xayxayta a qinda qutatta xa'e atti xayxayta a qinda tupatta' xooye ka duliyyo oppopa nessa dawe shittootaadi ka puufamto. Ishase an jaalade a dulaadi oppopa sookado ka luukkatase' paxaara' damo.