Masmuureta a masmuurewwa piisa qara jaallitto 3 - Mataafa Qulqulloota

¹ Halkeetteeyye, loshshaayyo qara'en muke ka Isase an jaalade fade ka fade ka dape.

² Amma in xa'a ka katamaappandesa porradaappa isho mooradda oppandesa isase an jaalade fada. Ha in fade ka dape.

³ Ka foolisootase katama tooytinitto mina kaye, ka ishootta kaassade ka kide, “Hela ishase anjaalanno i'akkitene?”

⁴ Eten ishootta kapaadesa tarpeeyye, ishase anjaalannon teye, ka quda' koke; ka tikase a aayyaanno a ana xaayte opan kale.

⁵ Ishina' tuparra Yursaalamitiiyyi, haka jaalala mattaayshoti issin xa'an maliiyyi akka ishina a ishootta a' xaxxa'innini'i maxxa kuumanta isho a ormala katantatinnin ishin naappanni.

Masmuureta a sessatta Hemitta Hemattoota haasawanni

⁶ Ini shittootase a karpeeta ka itaana isho qimaameewwa lekayaappaayye kodamte puufatte ka aluma orra pirritto, ka qayya moontandela qa'ade pahato ka koommaytoppa kallitto ayno?

Enenta haasawanni

⁷ Ha sarakella Selemooni are kalli. Hupnampaya Isira'eeli oppaayye, xormeeta oranna nama kunda lehi ka olliiyyi deeni

⁸ ishootta' piisani koraateta hidaden ka orana torpeeta kolladen. Nyaapa halkeetta isiqara oorissa'e ishootta piisaniiyyi koraateta surraappa' hidaden.

⁹ Nuqusase Selemooni mattaadi'i issi sarakella kode; sarakeellasene nefo, qoyra piita Lipanoose oppa kode.

¹⁰ Sarakeellasene kelaayye qapaya pirreetoppa kode ka wa duda' shena warqeetoppa kode. Ka aftaadi nefo rufta tiimatin quda deke. Ka karanxata sira tuparra Yursaalami daweneetin uwwishe.

¹¹ Ishina' tuparra Yursaalamitiiyyi sooka ka Selemooni a kulleetaadi a nuqusuma' kalsade tooyya. Ha kulleese, kuyyaatase a oppa xasoonno a hemittaaditiiyyi aayyaasso matta qara ishi' kullisse.