Masmuureta a masmuurewwa piisa qara jaallitto 2 - Mataafa Qulqulloota

¹ Anti an pisa Saarooni ka an pisa yeela kara.

Inna haasawanni

² Enentase an jaalade tuparraappaaye, pisa takka a suufeta qeeyya kara co pahata.

Enenta hassawanni

³ Innasene an jaalade hella diira oppaayye qoyra takka a leya' muroppa' jife paha. Anka a kuttati ishin xasoode ka kaattisaadi kela' nessade. Ka daltaadi nefo a kuttati me'aysade.

⁴ Ikka tika damta karopa ana kullishe dikattaadi a ana' qapo nefo jaalala.

⁵ Anti jaalalaadinnin paaqniiy, damta nukkullatin ana ada. Ka luukkatan ana' xasa oorsha

⁶ isha harkaadi a pittita'e matta ana' xaayeey, ka akkittaadin ana ampadeey

⁷ ishina tuparra Yursaalamitiiyyi, haka jaalala mattaayshoti issin xa'an maliiyyi, akka ishina a' xaxxa'innini'in, maxxa kuumanta isho a ormala koommaytatin ishin naappanni.

Masmuureta a laamatta Jaalala we' piisa paxaarnaanni Enenta haasawanni

⁸ Nessa innasene an jaaladeeti'i, irrowwa isho kunkunnawwa qaranne shoshshorri ka ana' dakaanni.

⁹ Ka kuumanta taaki a nyalqitta ormala' paha. Ha innasene an jaalade, tikinno kammanne qa'aden. Ka maskooteta isho qaawwa karan tika kara tooyni.

¹⁰ Ka ana' haasawanni ka kiini, Ke an jaalanno xa'e, xarjaalliyya xayyo xooye ka ollin anna.

Inna haasawanni

¹¹ Ha soroora itarpe, roopa nefo itawe

¹² miissa lakoppan xata ipise eta masmuureta nefo ikayte. Nessa eleela ka piitinnoppa dakaanni.

¹³ Qoyrase hilteeta kidammo idale, wayneeta nefo ipiste ka alaawni ka an jaalanno xa'e, xarjaalliyya xayyo xooye ka ollin anna.

¹⁴ Atti ke a shilalla takeella quda ca isho irrowwa kara' dekatte elelaayo nessaayti ime'aawniiy fuulaayti nefo ka paxaariiy, nessaayti ana' dakaytishe.

Hella opa enenta

¹⁵ Ka'alasene dulinno a wayneeta nyapalinna ka'alasene shashakka wayneetase' xanno pisnitto nyapalinna ino' qaqqapa.

Enenta haasawanni

¹⁶ Innasene an jaalade, isha xayyo, antikan an xaadi. Isha' pisa paxaara kapopa xellootaadi dawwini,

¹⁷ ke an jaalanno, a letta in dummin turan kaattillayta ka in tawnin turan tiitaawe ka kuumanta taaki nyalqitta a ormalase irrowwa qara kalo pahanaado.