Masmuureta a masmuurewwa piisa qara jaallitto 1 - Mataafa Qulqulloota

¹ Masmuuretase a Selemooni a masmuurewwa piisa qaropa qapto.

Enenta haasawanni

² Jaalalaatti wayneeta qaropa me'uma' jaalliiy, afaattin ana dinke.

³ Shittootayti oo atta alaawni? Maxxaayti haleeta shittoota puufatta mina. Tuparra ka semmalla ke jaalanni.

⁴ Harkan ana qape ka ana tite ka ollin hirra. Nuquso, kaataatti karopa ana kullishe ka ollin xasoonna. Kennen xasoonninna ka akata xasoonninna, ka taadeta wayneeta qaropa jaalalaatti qapnaysanninna. Tuparra pato ke peepan.

Moottada enenta'e haasawanni. Enenta haasawanni.

⁵ Ishina tuparra Yursaalamitiiyyi dakkaysada. Anti akkima tukkannasene a Qedaari ka karaantaddasene a Selemooni mina'en poori ma, in paxaari.

⁶ Qootan poori malla, a toota ka ana poornasse malla ana qudan tooyan (anan puyadan.) Hellaanno a ayyaanno xaaytee ana qara miirode, ka tooytampayteeta a dula wayneetati ana kode. Seminan anka duliyyo a wayneeta tooyta diishe.

⁷ Atti kese an jaalanno intoonno ana' leleey hela xellootaayti a kahirra ayshoppopa dawwini? Ka kuyyaata kuttatiiyyi aysha kelopa ollopa oorinni? Anti maana mallan xelloota moottadaatti kamma pora anni, ka akka iskatteeta fuulaadi qara dekatte mina' pora tiitaawni?

Inna haasawanni

⁸ Atti ke a iskattoppaayye xarjaalluma' jaalte, oton porose a upniniiyyi, xelloota kahirra kamma' oore ka poraaysho oppan aane ka nyalqaatti a telalla tukkana sikmaya kapopa dawwe.

Inna haasawanni.

⁹ Atti ke an jaalanno, akkooteta takka a farta paxaara, fartadasene sarakeela Feri'ooni tinna oppaayye kitto' pahata.

¹⁰ Dapnannaatti qudaxata siraatti a nappaappa xata rarraa'e, ka xolmaatti a yaakata sirade, oo atta paxaari.

¹¹ Ino' nefoow sira nappaappa, a warqeeta isho sipla dakara oppa kodame'en ke' koona.

Enenta haasawanni

¹² Nuqusase ete damta' kuti'eeyye, aluma shittootiyyo'e ishi' dakaade.

¹³ isase an jaalanno ana'e, akkima shittoota a amaddaayyo otantoppa raa'initto mina.

¹⁴ Isase an jaalanno ana'e akkima pisa piita Aynikaadi oppa' dehe mina.

Inna hasawanni

¹⁵ Ke an jaalanno oo atta' paxaari? Atti akata' paxaari. Ildaatti nefo eleela pappahan.

Enenta hasawanni

¹⁶ Ke an jaalanno, oo desa atti atta a xarjaallitta? Oo xarjaallumaatti atta paxaari? Looshshaanno nefo atta paxaari.

¹⁷ Tuuda alleetinno qoyra talta qaalaadi nefo qara pirpirta.