Roomi 8 - Mataafa Qulqulloota

Caatta a hapura isho a so'a

¹ Semmalla a Yesuusi Kiristoosin kallaanna, amma jiija oori ishootta qaraayye in caan.

² Seerase a Hapura Qulqulloota, caattase Yesuusi Kiristoosi qudan teyade daanno, seera juppoota isho a toota' kelaayye nata ana sookshe.

³ Nukkulluma a qalpeeta nama qaran xaate'e, wa a seera koda malaale'e, Waaqa kode. Ka juppoota minan innaadi a mattaadi, pahana a juppoolayta namatin erke ka dakintaadin juppoota qara' farate ka pashshe.

⁴ Wa malla asse kode nefo, ino a heenna hapuratin kallaanna ka a so'atin kallaanni in kinnini, ajajase a seera dukaata akka inon dikkado malla.

⁵ Orra heenna so'atin kallaanno, wa so'a'e dikanni; a hapuratin kallaanno ka a hapura' dikanni.

⁶ Wa a so'a dikatta toota qeenni; a hapura' dikatta xoori, caatta isho nakayta daanni.

⁷ Nama wa so'a' dikanno, qoota seera Waaqati ajajammi in kinnin ka ajajama nefo ettaninni in kinnin malla, paarakaala Waaqa.

⁸ A wa so'ati piddamma, Waaqa xasassa ettaninni in caan.

⁹ Ishina' xoori, oton hapura Waaqa'e ishin kara caayye, heenna hapuratinni kallaattan diisheey, a so'atin a kallaattan. Nama hapura Kiristoosi in qapnin isha nama Kiristoosin.

¹⁰ Oton Kiristoosi ishin kara caayye, kadi punu dakintaayshin juppoota minan toonittaayye, qoota Waaqa ishin hanqeellayshe malla, hapuraayshin caatta qapa.

¹¹ Oton hapurase a Waaqa Yesuusi tootoppa xaashe, ishin kara caayye, Waaqase Yesuusi Kiristoosi tootoppa xaashe, hapurase xaadi ishina kara conne dakintaayshin a toonitto' caatta daasha.

¹² Semmalla hellaanno a kiristaanatiiyyi, caatinno oppaayye, kitteeta ino qara ca, ma xoori kitteetose akkan heenna a so'a' qara so'a kallaanno mallan.

¹³ Oton heenna a so'a qara'e kallaannittaneeyye, illeetan. Ma xoori oton hupna Hapura Qulqullootatinni' koda so'a ikassaneeyye, iccaattan.

¹⁴ A hapura Waaqatin marra'amma' piisa hellaa Waaqa.

¹⁵ Semmalla, hapurase a innuma a' ishin “Aappo! Appo xanno” Kiitan ka haleetane' teyyatten diisheey, fuuraan kallaatta'e a lammattati hapura a karpishshuma atteyyanne.

¹⁶ Hapura Waaqa hapurinno olliiyyi akkan hellaa Waaqa' koddine ino' maakkummi.

¹⁷ Semmalla, oton hellaa Waaqa koddineeyye, an lehattampayaadi ka Kiristoosi olli lehaanna. Oton amma rakkoota Kiristoosi oppa qoottannooyye, kuli ulfeenaadippan qoottannaaw.

Ulfeena a itturopa deeno

¹⁸ Rakkoota a etosen a amma, oto ulfeenase itturopa ino' de'o, kapa qapnaanneeyye, akka we takkan' nefo mina in kinnaannin dikanni.

¹⁹ Uumata piisa deena a hellaa Waaqa'e yaatatta a kuttan asanni.

²⁰ Uumata piisa akka paata patta koddo'e qara' faratamte. Sede nefo heennaadin in koddine ma heenna a Waaqase akka kippeetan asado isha kodeetinni koddite.

²¹ Kippeetose' nefo, uumata mattaadi akka karpishshuma pateetta' kela nataan sooko ka hellaa Waaqa olliiyyi ulfeena akkado ka nataan kallaado malla.

²² Uumata piisa takka'e akkima haka ammati surumta yatatta xaayatin qapame ka quujanno in upna.

²³ Ma xoori a quujatta qara co uumata pattan; inosene daassatase a Hapura Qulqulloota' paayyota' teyyade' kuli hellaa a Waaqa' koddeetase dakintinno furatton kippeetan asannina ka dakintase xanno a karan xatatin quujanninna.

²⁴ Ino' kippeetosetinniiwwin dinne. Ma xoori waan kippanninna, oton i'akkaanniiyyi, kippeeta in koddan. Wa akkaanna ayno kippanni?

²⁵ Oton xoori, waan an akkini an kinnini'in kippanninnaayye, duupattaannen asanninna.

²⁶ Akkimoose mina'ew, atta qinsatta akka ino parpaaccisnitto qootan an upnin malla, Hapura Qulqulloota kafattootinnoppa ino qaarqaarri ka quujatta afaan lelama ettansammi in kinnininni ino' Waaqopa qepanni.

²⁷ Waaqase karitta nama' kara qorro, dikatta Hapura Qulqulloota' maana akkima kodde i'upa. Hapura Qulqulloota, akka heenna a Waaqa' qara'e, orra Waaqa' malla qepanni.

²⁸ Orra Waaqa jaalanno ka heennaadi qara' halaame, Waaqa akkima we' piisa a paxaarati ishootta' koono in upna.

²⁹ Sede nefo wa malla asse koddite, Waaqa orrase a turan upnaade akka innaadi pahanaado'e innaadi ka hellaasso lekayaappaayye qaarta koddo'e, qoota Waaqa, turanneew piisade malla.

³⁰ Isasene a turanneew piisade'e, halaade ka a halaade hanqeellayshe ka a hanqeellayshe ulfeesse.

Jaalala Waaqa

³¹ Semmalla qootosete desa maanan kiina? Oto Waaqa ino olliiyyi cooyye, ayno ino toora ettansha?

³² Oto Waaqa innaadi takkaya in suraysannin ka ino malla toota' daasheeyye, atta innaadi olliiyyi we' piisa pattayya ino in daannin?

³³ Orra Waaqa reexade ayno ishootta xasasa? A ishootta hanqeellanno ishaay.

³⁴ Ayno ishootta qara' farata? Hela Yesuusi Kiristoosi ishootta qara' farata? Ha isha ino malla to'e ka tootoppa xa'e ka harka Waaqa Aappaati akkitta' kute'e ka isha ino malla Waaqopa qepanni?

³⁵ Ayno jaalala Kiristoosi kapa ino maysha? Hela rakkootam moon makara? Hela pora daanamittam moon do'a? Hela lulle antam moon ataka? Moon koraateta?

³⁶ Sede nefo akka taafamte ka kiinitto, “Ke malla kuyyaata piisan leysamminna; ka kahirra qalamma' mina dikamme” mina.

³⁷ Semmalla oori Kiristoosise ino jaaladenne wossen piisa puteetannen a pute' piisa qara qapna.

³⁸ Semmalla, kati punu toota kodditaayye, taaki caatta kodditaayye taaki erkampattowwa moonta' kodditaayye, taaki ukkumampaya kodditaayye, taaki wa a amma ca kodditaayye, taaki wa a itturopa de'a kodditaayye, taaki hupnada kodditaayye,

³⁹ taaki pora a opeela co kodditaayye, taaki a opa xata co koddinittaayye, taaki uumata heente piisa kodditaayye, jaalalasene a Waaqa an Yesuusi Kiristoosin akkanne' kapaayye we takkan' nefo akkima ino ma'issa in ettaninnin, i'ana' kalte.