Roomi 7 - Mataafa Qulqulloota

Seera kela nataan sookeeta

¹ Hellaanno a kiristaanatiiyyi, hela sede a' uptane? Ha anti orrase seera upo'en haasawanni; ha seera oto nama co pattaayye nama qara hupna ukkumeeta' qapnaanni.

² Pahana'e, iskatteeta hemamte, haka diirtaadi co kara'e, seeranne diirtaadi quda' hidamte; oto diirtaadi to'o xoori, hidasene a seera' kelaayye ifuramte.

³ Semmalla, oton a diirtaadi cooyye diirta pila opa, hemamtaayye, dahalmayteeta kidammi. Oton xoori diirtaadi to'aayye, seerase a ishin diirtaadi quda' hidamte kelaayye ifurammi. Kadi punu oori diirta pila opa hemamtaayye, idahalsatte in kidamto.

⁴ Hellaanno a kiristaanatiiyyi, xaayshin kuli asseew pahata. Ishina' qoota dakinta Kiristoosi quda meella kodditen malla, a tootan sekaatta' mina kitto'e' seera kapa sekaatten. Semmalla akkan koda a Waaqati dalta dallo'e Kiristoosise tootoppa xa'e quda kodditen.

⁵ Eta an heenna a so'atin kallaanninnaatiiyyi akkan toota dalta dallo'e, xajeeltase neeqa seeran xaxxaano meellaanno a dakinta' kara koda kooni.

⁶ Amma xoori, seerase ino hide kapaayye qootan a tootan sekaatta' mina' kitto' sekaanne malla, hida a seera' kela nataan sookne; arepa desa saanta haaraya a hapuratinnin koda kooninna diisheey, saantase kerite a seera' taafamten an kooni an kinno.

Seera isho' juppoota

⁷ Semmalla oori maanan kiina? Hela xawwi seera, juppoota? Inna! Juppoota maana akkima koddite akkan upnaado'e, a kode seera; katin seera in kiinini, “In xajeelaneeyye,” Xajeeleta maana akkima koddite upnaanni an heenne.

⁸ Juppoota ka ajajase seera quda de'en saanta teyte ka akka xajeelta piisa ana kara' xa'o' koote. Oton seera in kinniniiyyi, juppoota wa to'e'ey.

⁹ Xatta, a seera in kinniniiyyi, anti caattannen kallaanni; ete ajaja seera' de'eyye xoori anti in to'e juppoota ka caatta akkatte.

¹⁰ Ajajase a seera caatta' daasame ka ana qara' toota qeede.

¹¹ Juppoota ka ajajase a seera qudan saanta akkatte ka ana sassapatte ka ajaja minan ana ikasse.

¹² Semmalla, seera qulqullitta, ajaja nefoow qulqullitta ka dukaata ka paxaari.

¹³ Ka kuli wossen paxaara'e, ana qara' toota qeede kideeta? Inna! juppoota akka juppoota koddeetaadi, akkaatto'e wossen paxaara' minan ana qara' toota qeette. Semmalla juppoota ajaja minanne a qaran qapto juppoolayteeta koddite.

Soota a caatta nama' kara ca

¹⁴ Seera akkiman seera hapura in upna. Anti' xoori an a so'a a karpishsha juppoota' koddeeta' katame.

¹⁵ Anti waan koona an upo; waan jaalanna kodaan' diini ka wa sene an needda' kooni.

¹⁶ Semmalla oton anti wa an heennini' koonooyye, seera akkima paxaarin maakkummi.

¹⁷ Sede wa an anti an heennini koonitto, juppootase ana kara kitto diisheey, anan.

¹⁸ Ana karaayye taakki qalpeetiyyo a so'a karaayye, wa paxaara takkan' nefo akkima in kinnin in upa. Kadin punu wa paxaara' koda heenaayye, wa paxaara' kodeeta' hupna an qapo.

¹⁹ Waasene paxaara an koda heena an kooni an co ma, waasene neeqa an an heennini'in kooni.

²⁰ Oton waasene neeqa an koda an heennini koonooyye, a sede koonitto juppootase ana kara kitto diisheey, anan kideeta.

²¹ Semmalla, a seera koda qara nakayen akkinni; an wa paxaara koda heenooyyen, wa a neeqa kodeeta kittessammi.

²² Isi karan xata seera Waaqatin in xasoonni,

²³ a koddito ma uumatiyyoppaayye qinda an opa ellino a seera mattiyyo toorro ka meella dakintiyyo kara koono seera a juppoota kela' korpaame ana koonitto akka meella dakintiyyo' kara kitton akkini.

²⁴ Ata anti an nyorpeelayta atta paho! Dakintose are toonitto kela ayno anan paha?

²⁵ Waaqase Poqalla Yesuusi Kiristoosi qudan anan pahano, kalata a isha kayo! Semmalla anti mattiyyo kara seera Waaqati'i in piddame ka qalpeetiyyo a so'atinni a seera juppootati piddame kodde.