Roomi 6 - Mataafa Qulqulloota

juppoota kapa sekaatta ka Kiristoosin kallaatta

¹ Ka kuli oori, maanan kiina? Akka daassata Waaqa koopto'e, hela juppoota koda kamma kamaannen kallaanna?

² Inna'a! Ino a tootan sekaatta mina kitto juppoota kapa sekaade, attan juppoota koda kamma kameetan kallaanna?

³ Ino a Yesuusi Kiristoosi olli takka koddeeta jaqqame piisa, akkiman tootaadi kuli oppa qoottatta malla jaqqamme a uptane?

⁴ Eten jaqqaminnon isha olli hawlammeeyye, ha tootaadippan qoottanne. Semmalla akkima Kiristoosi ulfeena a Waaqa Aappaatin tootoppa xa'e mina'e, ino kuli caatta haarayannen kallaanninna.

⁵ Oton tootaadin isha olli asse takka koddineeyye, asseewwen tootoppa xaanaadin isha olli takka koddinaaw.

⁶ Dakintase xanno juppoolayteeta koddite, akka ino quda sekaatto, karpishshadda a juppoota koddeetinno ka haso'e, dakintase xanno kerite akka Kiristoosi olli fannisamte in upna.

⁷ Nama to'e, juppoota piddama kela nata sooke.

⁸ Semmalla, oton in Kiristoosi olli tooneeyye, akkiman isha olli caattan kallaanno in amanninna.

⁹ Kiristoosi qoota tootoppa xa'e malla, lammatta akkan in toonin, toota ka isha in ukkummin, in upna.

¹⁰ Isha ete to'eyye, juppoota akka ishan ukkummini'i takkan to'e umma oppa oora in qaptooy; amma oto caattan kallaannooyye, Waaqaxe kallaanni.

¹¹ Semmalla ishina a toota mina kitto akkima juppoota kapa sekaatten ka Yesuusi Kiristoosi qudan Waaqa caannittan dikada.

¹² Semmalla, juppoota akka dakintaayshin a toonitto qara hupna ukkumeeta qapnaatto ka a xajeelta so'assenati a piddammaati'i ishin kooto'e, ishi in salan.

¹³ Umma meella a dakintayshina meeha falqati in kodan. Ka juppoota'en piddaccisan. Se kapaayye, a tootoppa xa'e ka caati isi koda ka Waaqa isi daasha. Ka meellaassin a dakinta piisa mehadda hanqeellumaati koda ka Waaqa piddacciisa.

¹⁴ Amma ishina daassata Waaqa kela kaltan diisheey, seera kela a kaltaneey; juppoota ishin ukkuma isheeta parpaaccisni in kitto.

Orxaya a hanqeeta koddeeta

¹⁵ Semmalla oori, maanan kiina? Qootan daassata Waaqa kela kinno ka seera kela an kinnin malla, hela juppootan koona? Inna!

¹⁶ Oto nama takka orxaya kodda'e ka isha ajajama'e, isi dehannittaneeyye, namoose a ishi ajajamtane'e akkima orxaya kodditen i'uptan akkimoose mina'ew oto juppoota ajajammittaneeyye, juppootase toota ishin qara qeennito kela'e orxaya koddinittan. Ma xoori kati Waaqa ajajamittan kiiteeyye hanqeelluma akkattan.

¹⁷ Ishina turanne a karpishshadda juppoota, amma xoori, kollissoose atteyyattene'e qoota karittayshin piisan ajajamten malla, kalata a Waaqa kayo.

¹⁸ Ka karpishshuma juppoota kela natan sookten ka orxaya hanqeeta kodditen.

¹⁹ Waan malla anti afa orra kallaatin asse haasawanna, qoota dikattaayshinan nukkullittan malla. Akkima se turan meellaassina a dakinta orxaya a nyala ka a tiyyaati kooten ka dehassen mina'e, ammaaw akka meellaassina a dakinnta qulqullaawane'e, asseew orxaya a hanqeetati koda ka ishootta dehaayshaaw.

²⁰ A karpishshadda juppoota kodditeneeyye, akka hanqeelluma kodeeta ishina parpaaccisnitto ishina dakaani in kitto.

²¹ Ka kuli sitiiyyi tookta maana'e kela teyten? Wa a amma ishin jeertane mali tookta takka nefo kelaayye, a teyne. Piraampira wesseneti tootaay!

²² Amma xoori qoota karpishshuma juppoota kela nataan sookten ka orxaya Waaqa kodditen malla. Qulqulluma akkattan; piraampira Qulqulluma'ew caatta parapara.

²³ Tookta a juppoota kela deenitto toota. Daassata a Waaqa kapa daasammitto xoori, caatta a parapara; a Poqallaanno Yesuusi Kiristoosi qudan teynaan.