Roomi 5 - Mataafa Qulqulloota

Nakayta isho araarama a amanteetan teyanno

¹ Semmalla ino' qootan amanteetan hanqeellaawne malla, Poqallaanno Yesuusi Kiristoosinni Waaqa olli nakaytan qapna.

² Daassatase a Waaqa an amma amanteetan kokkonnaanne ka oppa kinno karopa qootan ishan kulline malla ka kippeetan a ulfeena Waaqa oppa qoottanna' koddine malla, in jeejjanninna.

³ Sede pattanne ma rakkoota kela akkan duupatta teyno qootan upno malla, rakkootinno kulin jeejjanninna.

⁴ Duupatta kelaayyeew ekkaysumaappa kokkonnaatta deeni, ekkaysumaappa kokkonnaatta kelaayyeew kippeeta deeni.

⁵ Hapurase a Qulqulloota ino' daasame qudanne, jaalala Waaqa qoota kartinno kara immakaaden malla, kippeetose orra jeerinni in kitto.

⁶ An nukkullaya koddineeyye ete xoorasene a Waaqa qapade' kayteeyye, Kiristoosi juppoolaya malla to'e.

⁷ Nama paakka hanqeellayta oppa' to'o, teyeeta akata kokkoki. A koddito ma nama pakka a nama paxaara' oppa' toota' maxanyummo takka punu iteyada.

⁸ Ma xoori, ino an juppoolaya koddineeyye, Kiristoosi paakkinnoppa' to'e. Sede nefo jaalala Waaqa ino' qapa a atta kitto akkima kutti la'anni.

⁹ Semmalla oton diika Yesuusi Kiristoosin hanqeellaawneeyye, a qaran qapto'e, ishanneewwen aara Waaqa' kela pahana.

¹⁰ Ino an paarakaala Waaqa' koddineeyye toota innaaditinnin Waaqa olli araaramme. Amma eten Waaqa olli araaramme kammaayye, caatta innaadi minannen a qaran qapto' dinnaaw.

¹¹ Umma sede pattannema, Poqallaanno Yesuusi Kiristoosi, isase an qudan Waaqa olli araaramme, qudannen Waaqa jeejjanninna.

Attaami qudan toota ka Kiristoosi qudan caatta akka de'e

¹² Nama takka minanne juppoota piita qaropa kalte, juppoota minan toota ka deete. Qoota nama piisa juppoota kode malla, toota ka nama piisa qara' deete.

¹³ A seera Muuse in daasammin turanneew juppoota piita qaraayye kitta. A kodditoma pora oppa seera in kinnin oppa juppoota akka juppoota' mina' dikammi in kitto.

¹⁴ Ma xoori, orra a Attaami mina' seera tooytaatta diissata minan juppoota in koonin kuli qara'e Attaami paayyatte haka Muuse'e, toota ka orra piisa qara' hupna ukkumeeta akkatte. Attaamise, Kiristoosise itturopa de'o'e, pahana kodde.

¹⁵ Ma xoori daassata Waaqa a pattayya akka juppoota nama' mina'en. Juppoota nama takka minan akka orra lekayta le'e mina'e, asseew daassata Waaqa isho Yesuusi Kiristoosi namase takka minanne daassatase a Waaqa' teyatte, ikoopte ka orra lekayta' daasamte.

¹⁶ Akkamoose' mina'ew, tookta a daassatase a Waaqa a pattayya kela deete, wa a juppoota a nama takka' qeette minan. Firteeta a juppoota a nama takka minan daasamte qitaateta qeette. Daassase a Waaqa a pattayya a juppoota orra lekayta minan daasamte xoori, hanqeelluma qeette.

¹⁷ Juppoota nama takka' minanne ete toota orra piisa qara' hupna ukkumeeta akkatteeyye, orra daassatase a Waaqa' koopte a pattayya teyyade ka hanqeellaawe piisa, Yesuusi Kiristoosi namase takka minanne putaymaan caattaan kallaada.

¹⁸ Semmalla, juppoota Attaami a nama takka, akka orra piisa qara' firteeta qitaateta' qeette mina'e, koda a hanqeelluma a Kiristoosi a nama takka, asseew qitaateta kela orra lekaytan paha ka caatta daasha.

¹⁹ Ajajama diissatta a Attaami a nama takka' minanne akka orra lekayta juppoolaya kodde mina'e, ajajama Kiristoosi a nama takka' minanne, asseew lekaya hanqeellaawa.

²⁰ Akka juppoota koopto'e seera de'e. A juppoota koopte kapa'ew, daassata Waaqa ka a qaran qapto' koopte.

²¹ Sede nefo wa malla asse koddite, toota minan juppoota akka hupna ukkumeeta akkatte mina'e, Poqallaanno Yesuusi Kiristoosi minanne akka caatta parapara kinnaado'e, daassata Waaqa hanqeelluma hupna ukkumeeta akkatto malla.