Roomi 4 - Mataafa Qulqulloota

Akkima Aprihaami amanteetan hanqeellaawe

¹ Ka kuli Aprihaamise dakintan aappinno' kodde, maana akkaden kiina?

² Aprihaami katin kodaanne hanqeellaawe kiiteyye, wa jeejjaada'e qapnaanni heene. A kodditoma fuula Waaqa' tura jeejjaatta in ettansho.

³ Mataafa Qulqulloota ikiini, “Aprihaami Waaqa amane, amanteetaadi ka hanqeelluma ishi' dikamte.”

⁴ Nama koda koono, muushaaraadi a akkanno, hupnaadi kamma akkanni diisheey, daassatan.

⁵ Nama kadi punu koda paxaara in qapniniiyyi, oton Waaqase juppoolaya hanqeellanno amanaayye, amanteetaadi hanqeelluma'e ishi' dikammi.

⁶ Taawwiti' xaadi desaaw nama a Waaqa koda paxaara mali hanqeellanno, a atta kitto akkima a eeppisame kodde lelli ka kiini,

⁷ “Orra dapaaysho ishootta' hase, juppootaaysho ka ishootta' diisamte, orra a eeppisame.

⁸ Nama a Poqalla juppootaadi isha qara' dikni in kinnin, a eeppisame.”

⁹ Hela kuli eeppisamoose a Taawwiti' haasawade, a dawra qara murade patta'e? Moon a orra a dawra qara in murannini' kuli'i? Orra a dawra qara in murannin kuli'i. “Aprihaami qoota Waaqa amane malla, amanteetaadi hanqeelluma ishi dikamte.”

¹⁰ Hela kuli Aprihaami amanteetaadi aytamiiyyi hanqeelluma ishi dikamte? Hela a dawra qara murade turannem? Moon a dawra qara murade kammaayye ishi' dikamte? A dawra qara in murannin turanne ishi' dikamte diisheey, a dawra qara murade kammaayye ishi in dikamme.

¹¹ Aprihaami a dawra qara in murannin turanne, amanteetaadi akkima hanqeelluma ishi dikamte, akka milikkita ishi' koddito'e dawra qara murade. Semmalla Aprihaami, orra a dawra qara in murannin mali amane, a amanteetaaysho ka hanqeelluma ishootta' dikammitto piisa turaayye, aappa.

¹² Akkimoose' mina'ew Aprihaami orra dawra qara murade kuli turaayye aappa; wa malla, orra a dawra qara murade turaayye aappa kodde, qoota ishootta dawra qara muratta pattan in koddinin mali amanteetase a Aprihaami a dawra qara in muranin turan qapo kamma aanen malla.

Kippeeta a qoota amanteetati desa daasamte

¹³ Aprihaami akka piita lehaado'e, Waaqa wa malla isha isho sanynyeetaadi' kippeeta daashe; hanqeellumasene a amanteetan akkade diishe, qoota seera tooytaade mallan.

¹⁴ Oton orra kippeese lehanno a seera tooytaanno koddeeyye, amanteeta we nakanni in kitto; kippeese nefo paata patta kideeta.

¹⁵ Seera miira waaqa'e qeenni. Ma xoori, oton seera in kinniniiyi, ishin dapayta a seera qepissa caanni in co.

¹⁶ Semmalla kippeese amanteeta qara'e qa'atte. Kippeese akkima sanynyeeta Aprihaami piisa'e daassata Waaqan daasamte sedenne upnaysammte. Sede nefo orra a seeran kallaanno patta'en ma orra a Aprihaami mina amane piisa'e koddita. Sedennen Aprihaami aappa opa ino piisa'ey;

¹⁷ Qoota Aprihaami desa itaafamte ka kiini, “aappa opa lekna lekaytati'in ke kode.” Wa malla Aprihaami aappa ino piisa kodde, qoota isha Waaqase a le'e tootoppa xa'inno ka wa in kinninini akka kinnaadane' koono amane malla.

¹⁸ Aprihaami, akka ishi' kidamte, “Sanynyeetaayti akata lekaatta mina'e,” Akka aappa opa lekna lekayta koddo'e a wa kippatamma takkan nefo in kinniniiyyi, kippade ka amane.

¹⁹ Qoota paraadi dippa mina co malla, nukkulluma a dakintaadi minan ikka akka nama to'e mina kodde ka akka xaaya in ettaninnin upa nefooyye, Saara' kuli ka xaayni in kinnin ka kerite, ikka akka in xaaynin upa nefooyye, amanteetaadin in nukkullaanne.

²⁰ Amanteetaadinni japaade ka Waaqa ulfeena daashe diisheey, kippeetase a Waaqa daashe amana malaala minan oppa in dikanne.

²¹ Waaqa kippeeta a daashe akkima dikkisho karittaadi piisanne amanni.

²² Seminanne Aprihaami, amanteetaadi hanqeellumaa'e ishi' dikamte.

²³ Ma xoori qaalese kiinitto “Hanqeelluma'e ishi' dikamte,” Aprihaami patta'en taafamme;

²⁴ ino kuli'i taafamte. Ino Waaqase Poqallaanno Yesuusi tootoppa xaashe amanna, amanteetinno ino kuli'i hanqeelluma' dikamta.

²⁵ Poqalloosen xanno Yesuusi, isha juppootinno malla toota turopa tuukkame ka ino hanqeellassa malla tootoppa xa'e.