Roomi 3 - Mataafa Qulqulloota

Akkima Yihutaata amana tiitte

¹ Ka kuli Yihutitta, maanaanne a Yihutitta in koddinin qara jaalli? Dawra qara muratta tooktaadi kan maana?

² Keeto Yihutitta koddeeta qinda lekaytanne jaalli. Wa kara kokkooka Waaqa qaaletaadi Yihutaata'e, a tara' daashe.

³ Ka kuli Yihutaatoppaayye, oto orra demo amanama in qapniniiyyi, sede a ishootta amanama dapen, i'amanama Waaqa' hattissa?

⁴ Pakkanna in hattisso! Akkima taafamte ka kiinitto'e, “Qaaletaayti minanne dukaallayta koddita; ka paarakaalaatti firteetoppa putta.” Mina'e, kadi punu nama piisa dartampayta koddaayye, Waaqa dukaallayta.

⁵ Ma xoori, oto juppootinno hanqeelluma Waaqa akkinnittooyye, oori maanan kiina? Oto Waaqa juppootinno minan ino qattaanooyye, dukaata faranni in co kideeta? Are qaraayye akka dikatta a nama' mina'en haasawanni.

⁶ Pakkanna assen! Katin se qara kiiteeyye Waaqa atta piita qara' farata?

⁷ Ma xoori, oto dartampayta koddeetiyyo dukaata Waaqa laka' sooknitto ka kuttumta ulfeenaadi akkinnittooyye, kuli' maana'e a juppoolayta mina ana qara' faratammi?

⁸ Orra demo takka an anti kollinno ka kiino, “Akkan wa paxaara akkanno'e wa neeqa' koona.” Mina'e pahananni ka ana xasasni; semmalla firteeta a sene asse pappaha' qara' daasammitto firteeta dukaata.

Akkima nama piisa juppolayta kodde

⁹ Ka kuli ino' Yihutaateeyye, hela a Yihutaata in koddinini qara in qapna kideeta? Pakkanna an qapno. Yihutaata koddite, a Yihutaata in koddinini koddite, orra piisa akka juppoolaya kodden turan in olikela la'ayshe.

¹⁰ Akka taafamte ka kiinitto, “Hanqeellitta in co; pakkanna takka nefo in co;

¹¹ a matte paata qapnaanno takka nefo in co, umma a Waaqa faano takka nefo in co.

¹² Piisa saanta Waaqa' qara maqqe; ka takka' kamma dape, a koda paxaara koono in co takka nefo in co.

¹³ Lela a neeqa a nama miiddino haasawatta'e, afaasso a hawla' mina'e panamen; arrapaayshotin orra sassapanni. Afaasso a haasawannaane, akkima hadda maaka' mina'e orra miiddini.

¹⁴ Afaasso jiija isho lela haddaawnonne immakaaden.

¹⁵ Loqqaasso nama ikassa'e jarjarri;

¹⁶ Pateetta isho nyorpumaaw saantaaysho oppa ca;

¹⁷ saanta nakayta in upan,

¹⁸ umma pakkanna Waaqa fuuri in caan.”

¹⁹ Ajaja seera akkima a seera kela ca mina tooyno in upna. Seminanne orra ka wa a ishin marmada' dapa ka jaw kida; piita piisa ka firteeta Waaqa' kela kinnaatta.

²⁰ Semmalla fuula Waaqa' turaayye, nama takka' nefo seera tooytaattaan, hanqeellaawni in co. Laadi seera akkima nama piisa juppoolayta kodde akkinni.

Hanqeelluma amanteetanne teyanni

²¹ Amma xoori Waaqa, saanta ishin hanqeellaya orra koono akkima seera mali koddite, ilaka' sookte. Seera Muuse isho mataffa xuumampaya ka sede maakkummi.

²² Semmalla Waaqa a nama takka nefo oli kela reexni in kinnin mali, orra Yesuusi Kiristoosi amanno piisa'e, hanqeelluma daanni.

²³ Orra piisa juppoota kode ka ulfeena a Waaqa ishootta' daashe dape.

²⁴ Semmalla orra, kodase a dinissa a Yesuusi Kiristoosi' kode minanne, daassata Waaqa pattan hanqeellaawa.

²⁵ Wa malla Waaqa Yesuusi Kiristoosi kalisoota' kode ka dehayshe, a isha amanna piisa akka diikaadin haseenta juppootaayshoti akkadan malla. Waaqa wa malla sede kode, akka duupattaadin juppoota a tarpite pashsho ka firteetaadi a dukaata akkisho malla.

²⁶ Sapanoose a amma' nefo oppaayye, Waaqa a Yesuusi amanna piisa hanqeellassaanne akkima mattaadi' hanqeellitta kodde akkinni.

²⁷ Semmalla waan jeejjaanna maana ca? We takkan nefo an jeejjaanno. Waan malla an jeejjaannini maana? Hela qootan seera tooytaanninno malla? Inna'a! Amanteeta malla.

²⁸ Semmalla Waaqa wa malla orra hanqeellanna, qoota nama koda seera' kode mallan ma, akkima amanteeta malla koddite in upnaanninna.

²⁹ Taaki hela Waaqa, Waaqa a Yihutaata' patta? Ka a Yihutaata in koddininiti'inni? Ha dukaatan isha Waaqa a orra a Yihutaata in koddinini' kuli.

³⁰ Ha Waaqa takkayta ka isha'ew Yihutaata isho a Yihutaata in koddinini amanteetan hanqeellanni.

³¹ Hela kuli amanteeta minannen seera hattinninna kideetaa? Inna'a, laadii seeran kokkonnaysanna ka qapanna.