Roomi 16 - Mataafa Qulqulloota

Nakayta

¹ Feepe akkiman enentinno a kiristaana a amanamte, a tikase a kiristaana katama Kinkiriya kara kitto karaayye koda koonitto, koddite akka upnaattane'en faani.

² Isheetta' qoota ana isho orra pila' lekayta qaarqaarte malla, akka hellaa a kiristaana' xaykitta' teyyatta ishootta parpaaccisnitto mina'e, akka maxxa Poqallaatin isheetta teyyattan ka wa isheetta parpaaccisna piisan isheetta qaarqaartanen atara ishina' kiini.

³ Isasene ana olli koda Yesuusi Kiristoosi koona Prisqilla isho Aqilla'e nakaytiyyo lela.

⁴ Ishootta paakkiyyo oppa' toota kuli'i harmisaden, seminan anka awta piisa ishootta kalataysanni; umma ana pattan ma, tikka a kiristaana a orra Yihutaata in koddinin oppa amaneeti kuli ishootta kalataysanni.

⁵ Ka hellaasene a kiristaana tikaaysho' karopa qinseeta ollopa anna, kuli nakaytiyyo lela. Ka Eebbenetoosise an jaalanno piita Issiya kara paayyota Kiristoosi amane, nakaytiyyo lela.

⁶ Ka maariyaami se a kuttati ishin malla yaalte'e, nakaytiyyo lela.

⁷ Isasene erkamampayaappa upnaatame ka ana olli hidame, daltayaasene xayyo Andiroqoosi isho Yuuniyaasi nakaytiyyo lela. Ishootta Kiristoosi amana'e i'ana' qatten.

⁸ Ampiliyatoosise an Poqallaan jaalanno'e nakaytiyyo lela.

⁹ Isase ino olli koda Kiristoosi koono Urpanoosi isho Istakuusise an jaalanno kuli nakaytiyyo lela.

¹⁰ Abiliisise amanteetase a Kiristoosin qapon ekkaysatamte, ikka ishi' maakkumamte'e, nakaytiyyo lela. Ka toola Aristopuloosi kuli nakaytiyyo lela.

¹¹ Ka Herodiyooni Yihutittase daltaytiyyo kodde'e, nakaytiyyo lela. Ka toola Naarsisi oppaayye a Poqalla amaneeti nakaytiyyo lela.

¹² Iskattase Poqallaan co Tirufaayna isho Tirofoossa isasene a kuttati yaallaati nakaytiyyo lela ka Persiisise an jaalanno akata Poqalla Yaallitto'e nakaytiyyo lela.

¹³ Ka Ruufosise Poqalla' koda kodeetan a kuttati upnaysame'e, nakaytiyyo lela. Ka aayyasene xaaysho, a innaadi mina ana jaalannitto kuli nakaytiyyo lela.

¹⁴ Ka a Sinkirtoosi ka Filekooni ka Hermeesi ka Paatiropaasi ka Hermaasi isho hellaa Kiristaana a ishootta olli caati nakaytiyyo lela.

¹⁵ Ka Filolokoosi ka Yuuliya ka Neeriya isho enenta opa neeriya kuli nakaytiyyo lela. Ka assew Olumpaasi isho hellaa Kiristaana a ishootta olli ca piisa nakaytiyyo lela.

¹⁶ Ka dinkitta a qulqullaawen oli qara nakayta qeeda. Tikka kiristaana a Kiristoosi piisa ishina nakayta kiini.

Dehaamta a pirampira

¹⁷ Hellaanno a kiristaanatiiyyi! Orra kollissase a kollatten toorro ka otantaayshin oppa' rakkoota qeenno ka ishin oppa qoonno kapa issi tooytaada ka ishootta kapa sekaada.

¹⁸ Orra asse paho xajeeltaaysho kamma aananni diisheey, Poqallaanno Kiristoosi kela koda kooni in caan; ka afaa nukulla isho neyneyaanne tajjana sassapanni.

¹⁹ Sede a otootase a fayyaati a ajajamma kodditen qoota orra piisa tura upnaatamte malla, kadi punu xasa ana' dakaannaayye, akka wa paxaarati ookka kodditan ka wa neeqati a dapa in qapnini kodditane in faani.

²⁰ Oton asse' koonittaneeyye, Waaqase a nakayta eennoow seetana loqqaassin kela xata yooqa. Daassata a Poqallaanno a Yesuusi Kiristoosi a ishin olli caatto.

²¹ Timotoosise an ollin koda koono nakayta ishina' kiini. Yihutaatase, daltayaayyo koddite Luqiiyoosi ka Iyyaasooni isho Soosibaatiroosi kuli nakayta ishina kiini.

²² Anti Tertiyoosi a erkanoosen ishina' taafe kuli Poqallaan nakaytan ishina' kiini.

²³ Kaayoosise ana isho tikka kiristaana piisa tikaadippa teyyade kuli nakayta ishina' kiini. Eraastoosise tika meeha a katama' qara saarummo isho innasene xanno a kiristaana Qo'astroosi kuli nakayta ishina' kiini.

²⁴ Daassata a Poqallaanno a Yesuusi Kiristoosi, a ishin piisa olli caatto.

Qinseeta kalata

²⁵ Otootase a fayya an anti torrinonne ka juuttose a dukaata a xattati paayyatte ka dekatte ka amma sookte minanne ka erkanasene qoota Yesuusi Kiristoosi desa lelammaatinni, isha amanteetaayshinan ishin qa'atissa i'ettansha,

²⁶ Ammaa xoori dukaatase isookte; ajaja a Waaqase a paraparatinni akka orra piisa amano ka ishi ajajamo'e, mataaffa a xuumampaya qudanne lekna piisa akka upnaado'e, ikodamte.

²⁷ Takkaytase a Waaqa a isha patta ookuma qapo'e, Yesuusi Kiristoosi qudanne haka paraparati kalata a isha kayo! Ameen.