Roomi 14 - Mataafa Qulqulloota

Innaassin a kiristaana qara an faratan

¹ Ishin oppaayye nama amanteetan nukkulla teyyada diisheey, dikattaadi a mattaadi' qara oli an shiishan.

² Pahana'e nama takka amanteeta a ishin we' piisa dameeta ettansho qapnaanni; nama a amanteetaadinni in kokkonnaannin xoori midaddaaw dammi.

³ Semmalla nama we piisa dammo, a dammi in kinnini in puyannin. Sede dammi in kinniniiw a we piisa dammo qara in farannin. Waaqa isha kuli teyyadeey.

⁴ Ka kuliyya ke a orxayta la'ayyo qara' faranno atti a ayno? Isha oto piino taaki qa'annooyye, ini Poqallaadi mina ca. Ka laadi qoota Waaqa isha qaatissa ettansho malla qa'ada.

⁵ Akkamose mina'ew takka punu nama a dikado ka kido, kuyyaata takka, a pila qara iqapta caadaaw. A pila ka kidaawwe, kuyyawwa piisa olimina'ew caan diisheey oli qara in qapan. Semmalla wa asse pappaha oppaayye nama wa a isikaran xata amane' kodo.

⁶ Nama a kuyyaata takka a pila qaran jaalinno ka ulfeessinno oton icaayye, ulfeena a poqallaati'i sede kooni. Nama a damta piisa dammo ulfeena poqallaati'i dammi. Ka damta a dammo malla Waaqa kalataysanni. A damta piisa dammi in kinniniiw, ulfeena poqalla malla dammi in kinnin. Ka qoota dammi in kinnin malla Waaqa kalataysanni.

⁷ Ino takka takkaayye caatinno isho tootinno a mattinno'en.

⁸ Oton in caanninnaayye, Poqalla'en caanninna. Oton in tooninnaayye, Poqalla'ewwen tooninna. Semmalla oton in caanninnaayye taaki tooninnaayye, ino an a Poqalla.

⁹ Semmalla wa malla Kiristoosi to'e ka tootoppa xa'e, Poqla a orra co ka a le'eti koddeeta malla.

¹⁰ Ka kuli atti maana'e innaassin a kiristaana' qara' faranni? Taaki innaassin a kiristaana' puyanni? Piisantiiyyin firteeta akkatta' Waaqa turopa dehaannaay.

¹¹ Maana malla, itaafamte ka kiini, “Ha Waaqa ikiini: ‘Anti an caattampayta, nama piisa ana tura'e kilpiippada, ka afaadin akkiman anti' Waaqa kodde maakkuma.’”

¹² Semmalla ino' takka takkaayye, qoota kodinnooti desan Waaqa turopa dehaanna ka malseeta oorsanna.

Innaassin a kiristaana ke minan juppootoppa in pi'inin

¹³ Semmalla oli qara' farata diinna, nama ka akka innaasso a kiristaana' tura kehayta taaki wa ishan kata in xaaynini' tooytaado.

¹⁴ Nama a dikanno ka we takkane' kiino inyalen, wossen isha'e wa nyale' koddini diisheey, we takkan nefo akka issin a nyale in koddinin anti Poqalla Yesuusinnin upnaade ka qalpeeffade.

¹⁵ Atti oton damta a' dammitto minanne innaassina a kiristaanati keehayta kodditeeyye, jaalalaan a kallaanni a' kitto. Semmalla nama a Kiristoosi malla' to'e, akka damtaayti a' dammitto minan pato an kodan.

¹⁶ Semmalla, wa ishin kapaayye paxaara orra pila' tura akka needdataman in kodan.

¹⁷ Mankisteeta Waaqa, hanqeelluma ka nakayta isho xasootta, a Hapura Qulqullootatin teyanno diisheey, damta ka ikkayta qudan.

¹⁸ Saantosetinni nama Kiristoosi kela koda koono, Waaqa xasanni ka orroppaayye kuli kalataysammi.

¹⁹ Semmalla wa nakayta qeeda ka waan ollin kokkonnanna kamma anna.

²⁰ Ka damta minan koda Waaqa patissa diinna. Damta piisa nyala in qapto ma xoori, damta a nama pila keehaytinnitto dameeta, kamma dapeeta.

²¹ Semmalla akka innaassin a kiristaana a' kehaytinnini'i, kati so'a a dammi a kinnin ka taadeta wayneeta a ikkini a kinnin taaki wa a nama keehaytinna takkan nefo a' kooni a kinnin ipaxaari.

²² Semmalla oori amanteese' xaayti a otanta Waaqa isho xaayti kara kinnaatto. Nama we takkane ipaxaari kiino ka koono karittaadi ka isha qootinni in kinnin, a kalataysame.

²³ Nama we takkan amanni in kinnin ka oppa qaapno ka dammo, dameese' xaadi qoota amanteeta qara in qa'annin malla, isha qara ifaratamta. Wa amanteetan in koddinini piisa juppootaay.