Roomi 13 - Mataafa Qulqulloota

Akka ukkumampaya mankisteetati ajajama parpaaccisnitto

¹ Hupna ukkumeeta piisa qoota heenna Waaqatin teyanno malla, ukkumampaya amma ca ka Waaqan shuumamen malla, nama piisa ukkumampaya a mukissa qara caati ajajama isha faani.

² Semmalla nama ukkumampayta toorro piisa, ajaja Waaqa'e toorri. Nama ajajammi in kinnin piisa ka isqara'e qitaateta firteeta' qeenni.

³ Mukissampaya, orra wa neeqa' koono fuurinni diisheey, orra a wa paxaara' koono fuurinni in caan. Hela akka a ukkumampayta a' fuurrin i''heenta? Asseeyye, wa paxaara' kode kalata isha qara teytaay.

⁴ Ha ukkumampayta akka wa paxaara ke' kodo'e, orxayta Waaqa' kodde ka shuumame; ukkumampayta patta koraateta hidanni in cooy, oton wa neeqa'e pora kooniiyyi fuure. Isha orra a wa neeqa' koono qatta'aanne ka haalota Waaqa akkissaanne Waaqa kela koda kooni.

⁵ Semmalla ukkumampaya a mankisteetati ajajama ishin faani. Wa malla ajajamtane' nefo qoota miira Waaqa' fuurrittan patta mallanne ma, qoota karittaayshin ishin qootinno kuli malla kodda parpaaccisni.

⁶ Wa amalla kipira daannittane nefo semmallaaw ukkumampaya wa malla kodoose qara caane, Waaqa kela koda kodeeta malla.

⁷ Semmalla wa ukkumampayta' kodama parpaaccisna piisa koda. A kipira parpaaccisno'e, kipira daasha ka a qarata parpaaccisno'e, qarata daasha ka a fuurama isha parpaaccisno tura fuura ka a ulfeena isha parpaaccisno ulfeessa.

Qoota oli jaalattaati desa

⁸ Kuurase a oli jaalatta ishin qara kinnaatta parpaaccisno maliiyyi, kuura nama takka nefo ishin qara in kinnaannin; nama a nama jaalanno seera immakni.

⁹ Ajajaddasene' kiina'e, “In dahalan taaki in dahalsadan in ishshan, in hatan, wa nama pila takkan' nefo in xajeelan” Ka ajajadda ata hase kuli, ajajoose takka kiino “Akka mattaayti' mina nama jaalado” Karopaaw qapammi.

¹⁰ Nama a nama jaalanno piisa, namase a jaalanno qara'e wa neeqa' kooni in co. Semmalla nama nama jaalanno piisa, seera immakni kideeta.

¹¹ Semmalla, saateta a oppa mukittaappa impastan, amma akkima kayte upnaada; eta an turan oppa amanne kapaayye, kuyyaata an oppaayye dinno a qaran qapto'e ino kapopa dehaatte.

¹² Halkeetta tarpa qara kitta, kuyyaata ka dehaatteey, semmalla koda tukkanta kara kodammo alle' diinna ka mehadda oranna a la'ayta' hidanna.

¹³ Ka kirpa amala dape ka maashsha ka sharmuutuma ka pora oli tititta ka oli shiishsha ka yootanne in koddinin; ma akka orra a la'ayta kuyyaata oppa kalo mina'e qalpeeta a paxaaratin kallaanna.

¹⁴ Semmalla Poqalla Yesuusi Kiristoosi uwwisada diisheey, xajeelta dakintaayshina immaka an dikadan.