Roomi 12 - Mataafa Qulqulloota

Waaqa kela koda koda'e atta kallaatta akka parpaaccisnitto

¹ Semmalla hellaanno a kiristaanatiiyyi, akka isi piisa kalisoota a caatta qapto ka qulqullaawte ka a Waaqa xasannitto' kootan ka dehassane'e maxxase a Waaqa diissampayta koddeetnnin ishin naappanni. Wossen a dehassa ishin parpaaccisnitta' nefo, Waaqa' koda kodeetase a dukaata a kara paxaarumta qapto.

² Heennaasene a Waaqa paxaara ka orra xasanna ka qaja in qapnini, akka upnaatta ettanissane'e; qalpeetaayshin haaraya' kodada, caattaayshin ka pursamo diisheey, kallaata a piisseti' pahato in kallaadan.

³ Semaliiyyiiw ishina takka takkaayye akka amanteetase a Waaqa ishina' daashe kitto mina'e, naalumaan dikada diisheey, qoota mattaayshinati desa a ishina' parpaaccisnitto qaropa isi peepaanne an dikadanen kiini ka daassata Waaqa a ana' daasamten ishina' lelli.

⁴ Dakintinno takka qudaayye meella lekaya ca, meella piisa ka matta mina' kodaaysho' qapan;

⁵ akkimoose mina'e, ino a leka, Kiristoosinni an dakinta takka; qootan meella a dakinta takka' koddine malla, meela piisa matta mina'e olkarandesa saare.

⁶ Semmalla daassata ika lekayteeta a Waaqa ino' daashen koda koona. Daassatinno oton qaaleta Waaqa' salissaayye; akka amanteetinno kitto mina' qaaleta Waaqa' salinna.

⁷ Oton daassatinnon orra kela koda kodeetaayye, kokkonnumaan koda koona; oton daassatinnon kollissaayye, japaanna ka kollinna;

⁸ Oton daassatinnon dehaamaayye, dehaamma; oton daassatinnon orra' paata daassataayye, karitta piisan daanna; oton daassatinnon mukissaayye japaattaan mukinna. Oton daassatinnon nama suraysattaayye, xasan suraysanna.

⁹ Jaalala a dukaata a oppa pappahanassa in kinnini qapnaada ka wa neeqa' needdada ka wa paxaara' koda' japaada.

¹⁰ Ka jaalala a hellaa toollaatin oli jaalada ka oli ulfeessa'e olli' qaqqatta.

¹¹ A hapuran kupanna' kodda ka poqalla kela koda koda diisheey kokkonnumoosenen an diishan.

¹² Kippeetan xasooda. Ka makaroppa duupada ka awta piisa qinsada.

¹³ Ka rakkootoppa hellaanno a kiristaana' qaarqaara ka a xaykuma' deena kuli teyyada.

¹⁴ A ishin kamma pora daanna eepisa; ishootta eepisa diisheey, in jiijan.

¹⁵ A xasoonna olli xasooda ka a pooyna ollii pooya.

¹⁶ Ka dikatta takka' qara olli kaleetan kallaada ka isi kukuttissa kapaayye sekaada ka isi peepa alle' diisha ka teekolaya olliiyyi takkumtan kallaada. Ka issi in kidane “An upnampaya.”

¹⁷ Fuula nama piisa' tura wa a paxaara' koda diisheey, oto orra wa a neeqa ishin qara' koonooyye; ishina' kapa wa neeqa ishootta qara an kodan.

¹⁸ Oton i'ishina' koddiniiyyi nama piisa olli nakaytan kallaatta'e, qindaayshinaayye desa wa parpaaccisna piisa koda.

¹⁹ Moottadaayyooyye! Itaafamte ka kiini “A haalota pooyyino ka kuura haalota' oorinno ana kiini Waaqa Poqallaay” Ishina' miira Waaqa' diisha diisheey, mattaayshina' haalota an pooyyan.

²⁰ Semmalla, “A haalota pooyyito kapaayye, paarakaalaatti oto doxane, damshe ka oto deepodaneeyye, ikkishe. Oton sede' kooniiyyi apitta jeeratinni isha kupni.”

²¹ Semmalla wa neeqa wa a paxaaratin pute diisheey, wa neeqatinni in putaman.