Roomi 10 - Mataafa Qulqulloota

Isira'eeleta akka saanta Waaqa' kamma dapte

¹ Hellaanno a kiristaanatiiyyi, xajeeltiyyo a kutta an karittoppa qapo ka qinseeta an Waaqopa dehanno, akka Isira'eeleta dinto,

² upna a dukaatatinni in koddinin diisheey ishootta akkima Waaqa'e, yoota hapura' qapan; ana mattiyyo ishootta' maakkummi.

³ Saanta a Waaqa ishin orra hanqeellanno qoota in upnin malla, saanta a hanqeelluma a mattaayshoti kamma aanen diisheey, hanqeelluma a Waaqa kamma in anne.

⁴ Nama piisa akka amanteetan hanqeellummo'e, seera Kiristoosinni dikkade.

Dina akkima orra piisa' de'e

⁵ Qoota hanqeellumasene seera tooyteetan teyannaati desa, wa Muuse' taafe ikiini, “Nama seera tooytaanno piisa caada.”

⁶ Qoota hanqeellumaasene a Waaqa amanteeta qudan orra hanqeellannaati desa xoori, itaafaamte ka kiini, “Iskaran xata an kidane, ayno moontopa fayyada?” Ini Kiristoosi lekkissaay.

⁷ Taaki iskaran xata an kidane, “Ayno hiwwala karopa lekkada?” Ini Kiristoosi tootoppa xa'issaay.

⁸ Ka taafamteew ka kiini, “Qaaleta Waaqa ke kapa kitta ka laadi afaatti isho karittaayti kara kitta.” Qaalese' nefo qaaletase a amanteeta an ino torrininno.

⁹ Yesuusi akkima poqalla kodde, kati afaattin maakkummittaayye ka akkima Waaqa tootoppa isha xaashe karittaaytin amannittaayye, iddinta.

¹⁰ Nama oto karittaadin amanooyye, ihanqeellaawni ka oto afaadin maakkumooyye, dinniiy.

¹¹ Akka mataafa qulqulloota oppa' taafamte mina'e, “Nama isha amanno piisa in jeero.”

¹² Semmalla poqallasene takkan qootan poqalla a orra piisa malla, Yihutaata isho a Yihutaata in koddinini oppa, reexa takka nefo in co. Isha orra a isha qinsanno piisa'e sakaadi koopinni ka daani.

¹³ Maana malla, ikidamte, “Nama a maxxa poqalla' haleeno piisa dinaay.”

¹⁴ Ma xoori a isha in amannin mali, atta isha hala ettanshan? A qootaadi desa in dakaynin maliiyyiiw, atta amanan? Kollissampayta maliiyyiiw, atta dakaya ettanshan?

¹⁵ A kollissampaya in erkammin maliiyyi, atta qaalese kollissa ettanshan? Sede nefo akka taafamte ka kiinitto, “Deena a orrase otoota fayya' torrinooti, oo atta orra xasanni!” mina.

¹⁶ Ma xoori, akkima Issayyaasi' haasawade ka kide, “Poqallaay, ayno qaaleta an haasawanne teyyade?” Mina'e, piisa otootose a fayya in teyyanne.

¹⁷ Semmalla amanteeta, otootase a fayya dakayaanne teyanni; otootose a fayya'ew, kollissase qoota Kiristoosi desa haasawanno quda teyanni.

¹⁸ Intoonno ana kaassadooy, hela kuli qaaletose in dakayne kideeta? Akkima mataafa qulqulloota oppa' taafamte ka kiinitto, “Nessaaysho piita piisa qara'e dakaade, qaaletaaysho ka pora oppa piita oorto kayte.” Mina'e, dukaatanne dakayen.

¹⁹ Semmaliiyyiiw, hela Isira'eeleta qaalese in upnaanne kideeta? Akkima asse in kidammini'i, Muuse turanneew kide, “Akka orra puyatame yootanen koda. Ikka ishina' dakaatta; ka orra we patanni in kinninin ishin miiraysha.”

²⁰ Issayyaasi kuli ka maxanyumaan haasawade ka kideewwe, “a ana in faaniniiti'in teyade, ka a ‘Waaqa aysha ca?’ in kiinini ka ana in kaassanniniiti akkaade.”

²¹ Qoota Isira'eeletati desa xoori ikide, “Samayta ajajammi in kinnin ka tiyyoolayta koddeeti'in akka anopa de'ane'e kuyyaata kumma harkaayyo ishoottopa derayshe.”