Roomi 1 - Mataafa Qulqulloota

¹ Erkana, ana Pawloosi, orxaytase a Yesuusi Kiristoosi, isase erkamampayta Yesuusi kodda' halaame ka otootase a fayya a Waaqa kollissa' reexame kapaayye erkame.

² Otootose a fayya' nefo, qaalese a kippeeta a Waaqa xatta xuumampayaadi qudan mataafa qulqulloota' kara' daashe.

³ Otootase a fayya, akkima inna a Waaqa, namumaadinni sanynyeeta Taawiti oppa dalade lelli.

⁴ Akkimose mina'ew, Poqallaanno Yesuusi Kiristoosi Hapuraadi a Qulqullumaatinni qoota tootoppa xa'e malla, akkima inna Waaqa' kodde hupna kuttanne upnaysamte.

⁵ Qoota maxxa Kiristoosi desa orra a Yihutaata in koddinin piisa akka amano ka ishi ajajamo koda'e, isha minannen daassata a erkamampayaadi koddeetoppan ino kayto teyyanne.

⁶ Ishina' nefo akka a Yesuusi Kiristoosi kodditane'e, orrase a Waaqa halaade oppa' kittan.

⁷ Semmalla, ishina Roomi kara kala, a Waaqa ishin jaalade ka akka Qulqullowwa kodditane ishin halaade pisaayye, Waaqa Aappinno isho Poqallaanno Yesuusi Kiristoosi kapaayye a daassata isho nakayta ishina' kodden.

Qinseeta kalata

⁸ Kurra amanteetaayshina qoota piita pisa oppa' dakaade malla, we piisa turannen qattinni ka Poqalla Yesuusi Kiristoosinni ishin piisa malla, Waaqiyyo kalataysanni.

⁹ Akkiman kuyyaata piisa qinseetiyyon ishin dikanno, Waaqase an otootase a fayya a qoota innaaditi desa torrinitto kollissaan, karittiyyo piisan isha' koda koono ishan maakkittiyyo.

¹⁰ Ammaaw piraampira qaraayye, ishin kapopa deena'e, akka heenna a Waaqa' koddito, saantiyyo ka ana' qajeelto'e awta piisan Waaqa qinsanni.

¹¹ Akkan daassatase a hapura, akka amanteetan japaattane ishin kooto ishina' qootto'e, ishin akka xajeelliiy.

¹² Asse kideetiyyo nefo, anti akkan amanteetaayshinan kokkonnaado ishina ka xayyon kokkonnaattan, an ka olli kokkonnanno malla.

¹³ Hellaanno a kiristaanatiiyyi! Orra a Yihutaata in koddinin a pila oppa, akkiman orra amanno lekayta akkade mina'e, ishin oppa assew orra amanno akkattan fade; ma xoori akkan a lekatin ishin kapopa deena' piisade ikka ol kela ana in teynin, akka' upnattanen heena.

¹⁴ A tamaare isho a in tamaarrin ka ookka isho eeppa kollissaa'e, kitteeta ana qaraayye caay.

¹⁵ Semmalla ishina a piita Roomi kara kala kuli'in, otootase a fayya kollissa xajeelli.

Otootase a fayya, akkima hupna Waaqa' koddite

¹⁶ Anti otootase a fayyatin an jeero; maana malla otootase a fayya, orra amanno piisa'e hupna Waaqa a orra dininnooy. Sede nefo, paayyota Yihutaata'e deete ka kamma' desaaw orra a Yihutaata in koddinini' deete.

¹⁷ Hanqeelitta amanteetanne caatta akkanni kidamte ka taafamte; hanqeelluma a Waaqa kapa teyanna paayyote paayyatte haka piraampirati'i, akka amanteetan teyannaan otoota fayya qara ilelamte.

Neequmta orra

¹⁸ Orra Neequmtanne akka dukaata in upnaatammini' kooni. Qoota Waaqa fuurri in kinnin ka Neequmta minanne, aara Waaqa moonte xata ishootta piisa qara akkaada.

¹⁹ Wa malla ishootta qatta'a' nefo, qoota Waaqati desa wa upnaatta ishootta parpaaccisnitta qoota Waaqa mattaadi ishootta akkishe ikka upan malla.

²⁰ A piita uumamte paayyatte qalpeetase a Waaqa orra akkaanni in kinnin, sede nefo hupnase' xaadi a parapara isho Waaqumaadi, wa sene a isha' uume qudanne fayya akkaanni. Semmalla orra ishin dapayta a kode wa ishin marmada in qapo.

²¹ Ishootta a Waaqa upan kapaayye, ulfeena isho kalata a Waaqumaadi' parpaaccisno isha in daanne. Ka dikattaayshotin paata patta dikaden. Karittase' xaaysho matte paata qapnaanni in kinnin ka lule.

²² Ishootta “An ookka” issi' kiini ma, eeppa kodden.

²³ A Waaqase a parapara ulfeessan kapaayye, wa pahanasene a to'ampayta nama ka a xampira ka a pinaana a loqqa afur qapaati isho a pinaana piitandesa titmannaatin kodameeti ulfeena daashen.

²⁴ Semmalla akka dakintaayshotin oli qara kodadda jeera' kodane'e; Waaqa akka xajeeltase xaaysho neeqa nyalaan immakaadeti piddamane'e, ishootta tupaa desa diishe.

²⁵ Sede nefo wa malla asse koddite, qoota dukaata Waaqa dartan purshen ka uumampayta kapaayye uumata Waaqaysaden ka kela koda koden malla. Waaqa xoori haka paraparati'i, a kalataysame. Ameen.

²⁶ Orra qoota sede kode malla Waaqa, manynyeeruma a xaccanno turopa ishootta tuukke. Iskattaaysho kuli ka mukitta a diira olli muknaan a uumatoppa co alle' diishe ka a uumatoppa in kinninin ollopa tiitaawe ka ollin muke.

²⁷ Akkimoose mina'ew diira ka iskatta olli mukitta a uumatoppa co alle' diishen ka ollopa tiitawen ka xajeelta a ollin mukittaatin kukkupaden. Semmalla diira ka diira olli manynyeeruma xaccanno koden. Ka kamma dapaytaaysho minan qitaateta a ishootta parpaaccisnitto isi qara' qeeden.

²⁸ Orra qoota Waaqa upnaatta in heennin malla, Waaqa akka manynyeeruma kodane'e, dikatta neeqa' tupa desa ishootta diishe.

²⁹ Semmalla ikka ishin dapayta ka neequmta ka qurqummuma ka falqa ka yoota ka nama ikassa ka peeqqa ka sassapa ka xajeelta neeqa piisan immakaaden. Ka namaaw pora haasawni.

³⁰ Ka a maxxa nama' patinna ka a Waaqa needdanna ka a nama jeerinna ka a isi peepna ka a jeejjanna ka a saanta a ishin neequmta kodan faddanna ka a toollaassoti afaa dakayni in kinnini

³¹ ka a matte paata qapnanni in kinnini ka a olli' kaleeta poonna ka a jaalala in qapnini ka karpampaya.

³² A seerase a Waaqa' kiino, “Orra a wossen koono, toota ishootta parpaaccisni.” Upan kapaayye sene kodeeta pattannema, orra asse koono kuli nyarinni.