Qolaasiisi 3 - Mataafa Qulqulloota

Caatta haaraya a Kiristoosin teyanno

¹ Semmalla, oto Kiristoosi olli tootoppa xaateneeyye, wa illi moonteeyye porase a oppa Kiristoosi harka Waaqa a akkittati kute'eyye ca' fada.

² Awta piisa qoota wa illi moonte caati desa dikada diisheey, wa a piite caati desa in dikadan.

³ Ishina a tootan sekaatta' mina' kitto'e piisse kapa sekaatten; caattayshin ka Kiristoosi olliiyyi Waaqa kara' juutame.

⁴ Kiristoosise caattaayshin kodde oto deenooyye, ishina kuli isha olliiyyiiw ulfeenan deetan.

Caatta a kere isho haaraya

⁵ Semmalla xajeeltase xaayshin a piita' piisa leysha. Ishootta nefo, sharmuutuma ka nyela ka xajeelta sharmuutuma ka neequmta karitta ka qurqummuma sene killanna waaqaysatta kodde.

⁶ Sene minanne orra ajajammi in kinnin qara' miira Waaqa' deeni.

⁷ Ishina' nefoow, Turan a orra ajajammi in kinnin oppa kaltaneeyye sene kodeetanne' kallaatten.

⁸ Amma xoori ishina miira ka tana ka neequmta ka maxxa nama patissa alle iskapa sekaysha; umma haasa jeera afaassin oppa in sooknin.

⁹ Qoota qalpeetaayshin a xatta kodaadi ollin alle isi quda sookissen ka alle katten malla olli darada an haasawadan.

¹⁰ Qalpeetase haaraya isase Waaqa pahanaattaapadesa upnaan haaraya koddaan annitto, kalsada.

¹¹ Seden oori, Kirikkitta isho Yihutitta ka a dawra qara murade isho a in murannin ka karpampayta asalattane isho a in salattannin ka a natan co isho a nataan in kinnin oppaayye reexama takka nefo in co. Kiristoosi we' piisa ka we' piisa kara ca.

¹² Semmalla qoota orra a Waaqa reexade kodditen ka qulqullowwa kodditen ka jaalatamten malla, nama suraysatta ka paxaarumta kodeeta ka naaluma ka tajjanuma isho duupatta uwwisse.

¹³ Ka olkela duupada ka oton ishinoppaayye nama takka nama pila xomadeeyye, olli' diisha. Ka akka Kiristoosi juppootaayshin ishina' diishe mina'e ishina asseew olli' diisha.

¹⁴ Se piisa qaropeelaaw, jaalalasene we' piisa ollopa qapna ka takkumta immakkoota qeenna uwwisada.

¹⁵ Wa malla dakinta takka kodditen ka halaamtene, nakaytoseti'iwwiiy, nakayta a Kiristoosi a karittaayshin kara' nuqusumo ka a kalataysanna' kodda.

¹⁶ Qaaleta Kiristoosi a immakkootan ishin kara kinnaatto ka ookuma piisan oli kollisha ka oli dehaama ka masmuureta ka saara ka masmuureta a hapuratin karittaayshin piisan Waaqa kalataysada ka dawada.

¹⁷ Ka Yesuusi qudan Waaqa Aappa kalataysattaanne, haasa' haasawannittane ka koda a koonittan piisa, maxxa Poqalla Yesuusin koda.

Taanteta kallaata a toola kiristaana

¹⁸ Iskatteeyye, qoota Poqalla kapaayye parpaaccisnitto malla, diirraassina' ajajama

¹⁹ Diirraayyeew, iskattaayshin jaalada diisheey, ishootta qara karpampaya an koddan.

²⁰ Hellaayyeew, qoota Poqalla xasannitto malla, we' piisan toollaassina ajajama.

²¹ Toollaayyeew! hellaassin akka xasa in murrini'i, hellaassina an ririkkayshan.

²² Karpishshaddaayyeew! a piita qara poqalladdaassin koddeeti'i, we' piisan ajajama. Oto ajajammittaneeyyeew qoota ishootta ishin akkinaan akka nama xasassaa'e isi akkissa faanittan malla in koddinin ma, poqalla fuureetanne ka karitta fayyaatin a koddito.

²³ Wa' koonittane' piisa akka nama a kooni akkinin ka Poqalla Yesuusi' koonittan mina' dikada ka karitta piisan koda.

²⁴ Sekkapa'ew, Poqalla akkima lehanda a moonta rapoota' kodo ka ishina' daasho i''uptaneey. A' kela koda koonittan nefo Poqalla Kiristoosi.

²⁵ Waaqa kapa qatayma in caaneey, nama neequmta koono, kodaade a neeqa kapa'e qitaatetaadi akkada.