Qolaasiisi 2 - Mataafa Qulqulloota

¹ Qootaayshin ka qoota orra Lodooqiya kara co isho isasene apari ana in akkinini' piisaayye desa, a atta kitto akkiman soonno akka upnaattanen faani.

² Wa an malla soonna' nefo, akka karittaaysho xasa oorsado ikka jaalalaan takka koddan ka teyanta a upna qaja in qapnini qapnaadan ka Kiristoosise juuttota Waaqa' kodde, upnaadan malla.

³ Teyaanta a ookuma ka a upna piisa Kiristoosi kara'e juutamte.

⁴ Wa an malla sede ishina' lella' nefo, akka afaa harmissaan nama ishina in sassapannin malla.

⁵ Kadan punu dakintan ishin kapa sekiiyyi, hapuran ishin kapaayyen ca ka akkima taantetan kallaannittan amanteeta a Kiristoosin qaptan akka kokkoki, akkini ka xasoonni.

Caatta immakkoota a Kiristoosin teynaan

⁶ Semmalla akka poqalla Yesuusi Kiristoosi teyyatten qara'e, ishan kallaada.

⁷ Ka ishan hittina katada ka isha qara' qupama ka akka' kollatten qara'e, amanteetan kokkonnaada ka ishi'i kalata kalissaan immakaada.

⁸ Akka nama takka nefo amanteetase Kiristoosi qara' kiritta in katannin ka upna isho hayyuma paata patta a aata a nama kode isho taanteta piita qara kiritta katadeetin, ishinan sassapannini' tooytaada.

⁹ Immakkoota Waaquma piisa, dakintanne Kiristoosi kara kallaanni.

¹⁰ Ishina' nefo, Kiristoosise piddeeta ka ukkumeeta piisa qara matta koddenne caatta immakkoota teyten.

¹¹ Ishina' qoota isha amanten malla, dawra qara immuratten; murattaayshin nefo, harka namatin in koddine ma qalpeetase a juppoota hattissa'e, Kiristoosin muratten.

¹² Awta' kiristinna' xaateneeyye Kiristoosi olli hawlamten ka Kiristoosi olli tootoppa xaaten. Wa malla' tootoppa xaatene' nefo, qoota hupnase a Waaqa Kiristoosi tootoppa xaashe amanten malla.

¹³ Qoota juppoota kooten, qalpeese' xaayshin a juppoota ka qara in murammin malla; a' leeteneeyye Waaqa Kiristoosi olli caatta ishina' daashe ka juppootaayshin piisa ishina' diishe.

¹⁴ Isha taafetase a ita seera qara kitto ka ino xasasinitto ka ino toorritto alle' haqe ka masqala qara' toomme ka ino kapa sekayshe.

¹⁵ Ka hupnampaya isho ukkumamapaya masqalaadin pute ka ete meehaaysho a oranna ishootta quda fursiise kammaayye, akka orra poojame koddan ka laka' sookan ka akkaadane'e kode.

¹⁶ Semmalla damta taaki ikkayta ka xayso nessumadda, taaki xa'atima a leya taaki sampata ulfeessa minan nama takka nefo ishin qara'en farannin.

¹⁷ Wossen piisa wa sene itturopa deena kelaayye kaatta mina; dukaata xoori, Kiristoosinni teyanni.

¹⁸ Nama a naaluma sassapa' qapo ka erkampattowwa waaqaysanno ka seden isi jeejjino akka harka luletin ishinan hattinnini'i isi tooytaada. Nama a asse paho, keleshaata a akkenne isi jeejjini ka dikatta a mattaadi a paata pattatin isi peepni.

¹⁹ Nama asse paho, Kiristoosise matta kodde olli takkumta takka nefo in qapo. A dakinta piisa himina ka hittinnaan olopa qapno ka daminno matta. Waaqa pora asse pahonne dakinta piisa'e kuttuma daanni.

Kollissa a kamma dape kapa isi tooytaatta

²⁰ Ete Kiristoosi olliiyyi tooten ka taantewwa a piisseti a kokokkoka kapa sekaatteneeyye ka kuli maana'e amma a piita kapa in sekaannini pahanaatten ka ajajadda asse pahaati' piddammittan?

²¹ Ajajaddosen nefo ikiini, “Harkan an qapan, afaan an lokadan ka quda in qappadan.”

²² Sene piisa qoota ajaja isho kollissa a nama' qara qa'aden malla, oto ishin koda kodan kammaayye, pateeta'e xaayaman.

²³ Ajajaddoosen, waaqaysatta qoota a kammadape ka naaluma sassapa isho dakinta nyorpissa a nama kode kokkonnanno malla; takka punu wa a kara ookuma ca' pahanaatta i'ettansha. Ma xoori xajeelta juppoota tura qapeeta we' nakanni in kitto.