Mataafa Uumata 8 - Mataafa Qulqulloota

Akka pishasene a pateetta ku'en

¹ Waaqa ka Noohe isho pinaana isha olli markapa kara ca piisa dikade ka xayxayta pishasene piita qara pire qara' qeede; pishasene ka oori kellaawa paayyen.

² Paadadda xati piita kela ca isho maskootewwa a moonta piisa ka dufamen. Roopa kuli ka roopeeta qaatishe.

³ Pisha ka piita qara kuyyaata kuyyaatan kellaawni. Kuyyaata dippa ka kunda ken kammaayye, pisha ka fayya' kellaawen.

⁴ Markapase ka leya tappatta oppaayye kuyyaata kudanka tappattati irrowwa Araaraati qara' kute'e.

⁵ Pisha ka haka leya kundattati kellaawaan aanen. Leyase oppa kuyyaata paayyotati kuuta irrowwa ka akkaatta paayye.

⁶ Kuyyaata kunda afuri kammaayye, Noohe maskooteta a markapa'e pane.

⁷ Ka qurrupayta erke. Qurrupaytase ka haka pisha piita qara kuunaane'e, piita qara pora tittiitaawni.

⁸ Sekkammaayye Noohe akka pisha piita qara kellaawen upnaatta'e, elela erkeew.

⁹ Qoota pisha piita qara piren malla, Elelase pora oppa' kuti'o dape ka Noohe kapopa tiitaawe. Noohe ka harkaadi maskoteeta karadesa derayshe ka eleelase' teyyade.

¹⁰ Ikka kuyyaata tappa pire ka a lammattati eleelase erkeew.

¹¹ Eleelase ka afaappa' haashsha a ekerta' qapade ka kalakala markapoppopa tiittawe. Noohe ka akka pisha piita qara kellaawen upnaade.

¹² Ikka kuyyaata tappa pireew ka amma nefo eleelase erkeew. Eleelase umma Noohe kapopa in tiitaawne.

¹³ A para Noohe dippa lehi ka takka kayeeyye, paroseti leya a paayyota oppa kuyyaata paayyotati pishasene piita qara iku'en. Noohe ka oori dufana markapa' pane ka piita akka kokte akke.

¹⁴ Leya a lammatta oppa kuyyaata kunda lakki tappatati, piita fayya'e kokte.

¹⁵ Waaqa ka Noohe' kide,

¹⁶ “Iskatteetaayti isho hellaatti ka haantowwa hellaatti ollin markapa kara alle' sooka.

¹⁷ Ka akka piita qara' horan ka lekaadane'e, wa ke olli markapa kara ca piisa, pinaana ka horeeta ka xampira ka wa piita qarandesa lellehna piisa ollin markapa kara sooka.”

¹⁸ Sekkammaayye, Noohe ka iskatteetaadi isho hellaadi ka haantowwa hellaadi ollin markapa kara sooken.

¹⁹ Pinaana ka horeeta ka xampira ka wa piita qara lellehna piisa ka sanynyeeta sanynyeetan markapa kara sooken.

Noohe akka Waaqa' kalisoota kalshe

²⁰ Noohe pora qara' kalisoota Yaahiwwe' kalsho kode. Ka pinaana ka xampira damamma piisa oppaayye takka takka qeede ka kalisoota a kupnaaneti Waaqa' kalshe. (picture of altar)

²¹ Aluma a kalisootaseti ka Yaahiwwe xasayshen, Yaahiwwe ka isi karanxata dikade ka kide, “Nama kadi punu a shakki paayyeew dikatta neeqa qapaayye, amma desa dapa nama' malla piita an jiijo. Umma akka amma' mina'e, lammatta uumata piisa an pashsho.

²² Haka piita kittooti'i ayla ka fera, foola ka damayta pona ka soroora, kuyyaata ka halkeeta, in dapadan.”