Mataafa Uumata 7 - Mataafa Qulqulloota

Pisha pateetta

¹ Waaqa ka oori Noohe' kide, “Xeltose are kitto oppa ke patta hanqeellumaan kallaanniiyyi, toolaayti piisa qeede ka ollin markapa karopa kala.

² Pinaana damamma oppaayye, tappa tappa xorma ka akkoteeta qeede ka a damammi in kinnini oppaayye lakki lakki xorma ka akkooteta qeede.

³ Ka xampira oppaayye, tappa tappa xorma ka akkooteta qeede. Oto asse kootooyye, sanynyeeta pinaana ka a xampira piita qara in qitto.

⁴ Kuyyaata tappa kammaayye an olkamma an mittinin maliiyyin kuyyaata kunda afuri ka halkeetta kunda afuri kara roopa roopsha. Wa nessa qapa piisa ka piita qara patan.”

⁵ Noohe akka Yaahiwwe ishi' kide mina'e' kode.

⁶ A pisha pateetta de'eneeyye, sitiiyyi para Noohe dippa lehi.

⁷ Sitiiyyi, Noohe ka iskatteetaadi ka hellaadi isho haantowwa a hellaadi ollin pisha pateetta kela paha'e markapa karopa kalen.

⁸ Pinaana a damamma ka a damammi in kinnini ka xampira isho wa piita qara nessa oorsanna pisa oppaayye,

⁹ ikka xorma ka akkooteta lakki lakki kodden ka akkima Waaqa Noohe ajaje mina'e, Noohe olli markapa karopa kalen.

¹⁰ Kuyyaata tappa kammaayye, pisha pateetta ka roopa paayyen.

¹¹ A para Noohe dippa lehi kayeeyye, parose oppaayye leya a lammattati kuyyaata kudanka tappattatiiyyi, paadadda xati piita kela ca piisa ka arepeela kaamaden; maskootewwa pisha a moonta' kuli ka panamen.

¹² Roopa ka a olkamma in mittinin mali kuyyaata kunda afuri ka halkeetta kunda afuri roope.

¹³ Kuyyaatase a roopa roopa paayyeeyye, Noohe ka iskatteetaadi ka hellaadi Seemi ka Kaami ka Yaafeeti isho haantowwaasso, takka'e markapa karopa kalen.

¹⁴ Horeeta ka pinaana kutkutta ka a shashakka ka pinaana piitan desa titmanna isho xampira moonta pisa oppaayye, ishootta olli markapa karopa kalen.

¹⁵ Wa nessa qapa pisa oppaayye, lakki lakki kodden ka Noohe kapopa markapa karopa kalen.

¹⁶ Uumata nessa oorsanno pisa oppaayye, xorma takka takka ka akkooteta takka takka akka Waaqa ajaje qara'e, ikka markapa karopa kalen. Yaahiwwe ka oori xarrase a markapa' dufe.

¹⁷ Pisha a pateetta a olkamma in mittinin mali kuyyaata kunda afuri ka halkeetta kunda afuri roopen. Pisha ka piita qareela koopaan aanen ka piita qareela markapa xaashen.

¹⁸ Pisha ete piita qara' koopaan aanen ka karan xata akata sekaadeneeyye, markapa pisha qara'e oore ka pisha qara tittiitaawni.

¹⁹ Pisha ka haka irrowwa piita a kukutta piisa qara pirraane'e, akata koopen.

²⁰ Ka irrowwa qara piren ka dunduma kudanka keni mina' kitton irrowwa qaropeela qapnaaden.

²¹ Wa piita qara lellehna piisa horeeta ka pinaana ka xampira isho orra kuli ka piita piisa qara piramen.

²² Wa nessa oorsanna piisa ka piita qaraayye piramen.

²³ Waaqa ka wa piita qara nessa qapa piisa, orra ka pinaana ka xampira isho wa piita qara ca ka lellehna piisa pashshe.

²⁴ Kuyyaata dippa ka kunda keni kara'e, umma pisha piita qaraayye kellaawa in paayyine.