Mataafa Uumata 6 - Mataafa Qulqulloota

Neequmta orra

¹ Orra ete piita qara' lekaannooyye, tuparra ishootta' delade.

² Hellaa Waaqa ka akka tuparrosen papaxxaari akken. Ka ishoottoppa a ishootta' aaka reexaden ka hemen.

³ Yaahiwwe ka kide, “Nama qootan so'a ka to'o malla, hapurase xayyo caatta daanno nama olliiyyi haka paraparati in kallaado. Amma desa paayyatte, nama para dippa ka kunda lakki qaropa in kallaado.”

⁴ A hellaa Waaqa tuparra orra olliiyyi muken ka hellaa xaayeneeyye ka kamma kuli orra kukutta ka Nefiliimeta piita qara kala. Ishootta xattaayye, orra maxanyumaan upnaatame kurraaysho ka dakaade.

⁵ Yaahiwwe orra piita qara kalo akkima neeqi ka karittaaysho kara neequmta dikanno akke.

⁶ Yaahiwwe sede a piita qara nama uume ka ishi neeqnaatte, ikka semmalla harmmo nyarrahe.

⁷ Semmalla Yaahiwwe ka dikade ka kide, “Uumatase an uume ana nyarrahasiiseey, allen sanynyeeta nama piita qara qishsha. Pinaana piita qara kala ka xampira moontan xa'anna piisan piita qara alle pashsha.”

⁸ Nama takka Noohe kidammo xoori, fuula Yaahiwwe tura'e ulfeena akkade.

Waaqa Noohen paha dikade

^9-10 Arekammopa xata qoota Noohe desa torrini. Noohe hellaa hamiyya sessa qapa. Maxxadaasso nefo, Seemi ka Kaami isho Yaafeeti kidammi. Noohe nama Waaqa fuurro ka hanqeellayta. Sitiiyyi isha patta dapa kooni in kinnin.

¹¹ Sitiiyyi, orra piita qara kalo piisa fuula Waaqa tura dapaaw kooni. Piita ka karpan immakaatte.

¹² Waaqa ete piita tooynooyye, piita akka nyapalte orra qara co ka juppootan immakaade akke.

¹³ Waaqa ka oori Noohe' kide, “Sanynyeeta inna nama alle patissa'e, in piisade. Qoota piita nyalaan immakaatte malla, anti nama ka piitan ollin pashshaay, upnaado.

¹⁴ Atti' xoori, qoyra paxaara oppaayye markapa kodado. Ka kara kaatadda kode ka akka pisha karopa in kallini'i, karan ka laka tulan saale.

¹⁵ Markapose oto' koonittooyye, derumaadi dunduma dippa sessa, paldumaadi dunduma kunda keni ka qa'antaadi, dunduma kunda sessa kode.

¹⁶ Ka oppa' maskooteta kode ka akka xayxayta karan kalo'e, dunduma takka mina' kitto qussa qaropeela arta diishe. Ka qudattoppa desa xarra ishi' kode. Oto' koonittooyye, a riqa mina oli qareela sessa kode.

¹⁷ Anti wa moonte arepa xata ca ka nessa oorsanna piisa patissa'en pisha pateetta piita qara' qeeda. Wa piita qara ca' piisa ka piraman.

¹⁸ Ma xoori xaayti, ke ollin kodayteeta kodadaay, ke ka iskatteetaayti ka hellaatti ka haantowwa hellaatti ollin markapa karopa kala.

¹⁹ “Akka ke olli pisha pateetta kela pahane'e, wa nessa qapa pisa oppa lakki lakki qape ka markapa karopa kalshe. Wa lakki lakki a ollin qapnnitta oppa xorma ka akkooteta ollin qape.

²⁰ Akka caadane'e, sanynyeeta xampira ka a pinaana shashakka isho a kutkutta pisa oppaayye, a lakki lakki kodden ka ke kapopa de'en.

²¹ Ka wa ke ka uumatase markapa kara co piisa' damta kodda ollopa pohe ka markapa karopa kalsado.”

²² Noohe ka wa Waaqa isha ajaje piisa kode.