Mataafa Uumata 44 - Mataafa Qulqulloota

Kuppaayya dakara a pate akka akala Piniyaami kara akkaaden

¹ Yoosefi saarase' xaadi ajaje ka kide, “Akka akallaasso qeennaan mina unta ishootta kure ka kaajaasso akallaasso qara'ew ishootta' hide.

² Ka akala a inna shakka kara'e, kuppaayyaayyo a dakara isho kaaja untan piddatta' de'e xaaye.” Aappaase ka akka Yoosefi ishi' kide qara' kode.

³ Ishootta ka ete pariteeyye harrewwaasso fe'aden ka kalta' xa'en.

⁴ Ete katamaappa tarpen ka shakkayteeta aaneneeyye, Yoosefi isaarase' xaadi' kide, “Orrose kamma awle ka ishootta qaqqape. Ka oto ishootta kapa kayto ishootta kide, ‘Hela maana'e ise an wa fayya ishina' koone kapa'e, wa neeqa' kooten?

⁵ Maana malla kuppaayya a dakara' hatten? Akka poqalla oppa ikino ka ishin wa juutame piisa upnaanno a'uptane? Wa' kootene akata mali neeqi.’ Kide ka ishootta kaassado.”

⁶ Isha ka ishootta qaqaaape ka akka Yoosefi isha dehaame mina'e, ishootta kaassade.

⁷ Ishootta ka ishi' kidene, “Hela poqallaanno, maana'e asse haasawanni? Ino an orra wa asse paha' koonon.

⁸ Ino kaaja an akallaanno kara akkine kulinnin piita Kene'aaniti ke kapopa oorreey, xawwi attan tika poqallaattitiiyyi dakara taaki warqeeta hanna?

⁹ Ino oppaayye nama kapa kuppaayyosen akkaadan a to'o, ino a kela hasee ka karpishshaddaatti koddino.”

¹⁰ Isha ka kide, “Ipaxaari, wa' kiitene in teyyade. Ishina maana' kooten ma, nama kapa kuppaayyosen teyadan patta karpishshiyyo kodda.”

¹¹ Nama ka oori akallaadi jarjartan lekkishe ka tura fuffure.

¹² Isha ka qaarta qara paayye ka haka qussuqqunaashaatti'i, akallaasso kara fade. Ka piraampira qaraayye, akala Piniyaami kara' teye.

¹³ Hellaasene ka oori nyarrahata'e, mehadda isi quda kakkaa'en. Ka harrewwaasso fe'aden ka katamaapa tiitawen.

¹⁴ Yihuta ka hellaasso ka Yoosefi a tika oppa co qara'ew tiitaawen ka loqqa kela ishi sehen.

¹⁵ Yoosefi ka ishootta' kide, “Maana malla kuppaayyaayyo hatten? Nama ana paho akkima wa juutame kuli upnaanno a' uptane?”

¹⁶ Yihuta ka kide, “Afaa an ishin hasawanna nefo an qapnooy, maanan poqallaanno' kiina? Waaqa idapinno akkisheey, nama a kapa kuppaayyosen teyaden pattan ma piisantin karpishshadaatti koddina.”

¹⁷ Yoosefi ka kide, “Inna'a anti wa asse paha koda an heeno! Namoose a kapa kuppayyosen teyaden patta karpishshiyyo kodda ma, ishina nakaytan aappaayshin kapopa kalta i'ettanissan.”

Yihuta akka qoota Piniyaami desa Yoosefi naappade

¹⁸ Yihuta ka Yoosefi kapopa desa heeqqe ka kide, “Poqallaayyo, ana napahatoppa' desa we shakkaya ke' lelo. Kadi punu Feri'ooni mina kuttuma mukissa qaptaayye, ana in miiroodan.

¹⁹ Poqallaayyo, ke deyyo ino kaassade ka kide, ‘Hela aappaayshin ica? Inna pila iqqaptaneewwe?’

²⁰ Anka kiine, ‘Aa, aappinno ikerema ica; inna keranta kela xaaye takkanen qapnaaw. Inna opa innooseneti ito'en. Hellaa aayyaasso xaayte oppa qoota innoosen takkan patta caan malla, aappa akata isha xooni.’

²¹ Atti ka ino' kiite, ‘innoosenen xooya an ka akko.’

²² Anka ke' lelle ka kiine, ‘Oton aappa diisha ka kapa de'aayye aappinno ito'aay, kapa deena in ettansho.’

²³ Akka fayya ino kokkonnase ka kiite, “Oton qussuqqunaashaassinanne a' deennin, lammatta'e ana kapan a' dehattan.’

²⁴ “Ino ka eten kalleeyye wa ino' kiite piisa aappinno' lelle.

²⁵ Aappa ka kuli ino kideewwe, ‘Aana ka piita Kipsiti unta ino' piddaaw.’

²⁶ Anka ishi' kiine, ‘Oton innoosen xanno shakka'e ino olli anni in kinnin, aappaase kapoopa anta an ettaninnooy, oto inna shakka ino olli erkinitto pattan anna.’

²⁷ Aappa ka ino kide, ‘Raaheeli akka hellaa diira lakkiw ana xaayte i'uptan.

²⁸ Ishootta oppa takka ipate. Umma haka ammati in akkaanneey, pinanta isha dama in diinne.

²⁹ Amma oto ini ana kapa qeettan ikka we koddooyye, keranta kelan nyarrahata quda to'a.’

³⁰ “Semmalla, napseeta Aappinno harka innooseneti oppa kittaay, oton isha malin aappa kapoopa tiitaawaayye,

³¹ ikka ino kapa innoosen dapaayye, ito'a. Anka nyarrahata an keranta kela aappinno' qeennen isha ikanna.

³² Piisa qaropeelaaw, an aappa kapa qeennooyye, in kide, ‘Ana qara tooya. Oton nakaytannen innoosenen an tiitaawnin, oppa'en kaassatama ka hakan co'e dapampayta kodda.’

³³ “Semmalla, poqallaayyo ana pakka innooseneti oppa karpishshaayti koddo, innoosen ka hellaasso olli alle' kalen.

³⁴ Oto nyarrahata asse pahato aappinno qara kaynittooyye an duupatta an ettanshooy, hela amma attan innoosen mali aappinno kapopa kalta ettansha?”