Mataafa Uumata 41 - Mataafa Qulqulloota

Yoosefi akka olsa Feri'ooni fure

¹ A Yoosefi olsa fure para lakki kammaayye, nuqusa Kipsi Feri'ooni ka olsa olsoode. Ka olsoosenetin kirra Appaayi kapa' qa'ade.

² Ka okkaya a kakappa ka papaxxaara tappa a kirra kara sooke ka maanta deenna akke.

³ Ka kamma'ew, okkaya a apda qina'a ka kara akkaannaane tappa ka kirrase kara sookeneew ka okkayasene deyyo sooke ka kirra kapa ca kapopa aanen ka kapa' qa'aqaden.

⁴ Okkayasene a'apda ka okkayasene kakappa' loqen. Nuqusase ka oori mukittaappa impase.

⁵ Ka mukeew ka a lammattati olsoodeew ka olsasenetinni unta a matta kukutta ka papaxxaara tappa qapto akke.

⁶ Kamma'ew, unta a atoota dawte ikka qaate ka qaampite a matta tappa qapto akkeew.

⁷ Mattadasene a untase qaampite tappa ka isasene kukutta ka papaxxaara loqen. Nuqusa ete impaseeyye, akka olsa koddite upnaade.

⁸ Teykante ete mukittoppa xaanooyye, dikatta ka isha kara' koope. Ikka so'aya ka ookka a piita Kipsi piisa ollopa halacciise ka olsa olsoode ishootta' torre. Ma xoori olsoosen nama takka nefo fura in ettaninne.

⁹ Sitiiyyi saara a orxaya nuqusa taadeta daddaannaati ka nuqusa' kide, “Dapa an kode awwen matte oorsade.

¹⁰ Ha nuquso, a ana ka saara a orxaya damta koonoti miirotteeyye tika ajajampayta tika hidaati ino hidacciiste.

¹¹ An eeyye kinnooyye halkeetta takkaayye, anka lamatti olsa olsoonne. Olsaanno nefo furaasso karkar.

¹² Sitiiyyi Iprutta takka orxayta ajajampaytase a tika hida'e ino olli tika hidaati ca. Anka olsaanno ishi' torrine ika ino' fure.

¹³ We piisa ka akka isha' kide qara' de'en. Anti ka kodiyyo a deyyo qaropa oore; saarase a orxaya damta koonaati xoori ifannisame.”

¹⁴ Feri'ooni ka oori Yoosefi kamma orra erke. Ikka aanen ka tika hida kara jarjartan yoosefi qeeden. Yoosefi ka matta kooshade ka mehadda pursade ka nuqusa kapopa kulle.

¹⁵ Feri'ooni ka ishi' kide, “Olsaan olsoode ka nama olsoosen furo ka dapade. Ma ke olsa fura ettaninni kiini anka dakaye.”

¹⁶ Yoosefi ka kide, “Ha nuquso, anti olsa fura an ettaninni an co ma, Waaqa patta olsa maana akka koden fura ettaninni.”

¹⁷ Feri'ooni ka kide, “In olsoode ka kirra Appaay kapa' qa'ade pahata.

¹⁸ Ka okkaya a kakappa ka papaxxaara tappa a kirra kara sooke ka maanta deenna akke.

¹⁹ Kamma'ew, okkaya a yarade ka a apdade qina ka kara akkaannaane tappa ka sookeneew. Umma piita Kipsi oppa'e, okkaya asse nenneqa apari an akkine.

²⁰ Okkayasene yarade ka apda ka okkayasene kakappa tappa paayyota' sooke' loqen.

²¹ Ete loqen kammaayye, a deyyo mina'ew apdaden, umma a okkaya kakappa loqe in pahan. Anti ka mukittaappa impase.

²² Anka mukeew ka a lammatati olsoodeew. Ka olsasenetinni unta a matta kukutta ka papaxxaara tappa qapto akke.

²³ Kamma'ew, unta a atoota dawte ikka qaate ka qaampite a matta tappa qapto akkeew.

²⁴ Mattadasene a unta qaampite tappa ka isasene kukutta ka papaxxaara loqen. Anka olsa an olsoode so'aya' torre. Ma xoori olsoosen maana akka koden nama takka nefo fura in ettaninne.”

²⁵ Yoosefi ka Feri'ooni' kide, “Olsadoosen xaayti piisa we takkaneew akkinni. Ha Waaqa, wa ituropa koda heena'e tura desa qattishe ka ke upnayshe.

²⁶ Okkayosen papaxxaara tappa para tappa. Mattadosen a unta tappa kuli para tappaaw. Olsoosen lakki piisa we takkaneew akkinni.

²⁷ Sene ishootta kamma sooke, okkayosen a'apda ka nenneqa'ew parra loota tappa akkinni. Mattadosen a unta a atoota dawte ikka qaate ka qaampite parroosen a loota tappaaw akkinni. olsoosen lakki we takkaneew akkinni.

²⁸ Akkan ke' lele mina'e, Waaqa wa ituropa koda heena'e tura desa qatishe ka ke nuqusa upnayshe.

²⁹ Piita Kipsi piisa qara'e parra hiira tappa de'a.

³⁰ Kamma'ew parra a loota tappa ka de'aneew. Qoota piita akata loosatto malla, parrasene a hiira iteymaman.

³¹ Lootose piita qara' deeto qoota akata malli neeqnaatto malla, wa parroosene a hiira kela hasa in caadan.

³² Sede a olsoosen oppa oorte ka akkite, akka Waaqa irra qara wossen qeeda' piisade akkinni.

³³ “Semmalla, nama ooka ka hayyoota kodde fade ka piita Kipsi piisa qara' shuume.

³⁴ Ka orra wa parroosen a hiira tappa oppa palina piisa qara harka keni oppa takka ollopa poho shuumeew.

³⁵ Ka akka parroosen a hiira deena oppa unta ollopa pohane ajaje. Ikka katamaddaappa kosadda karopa ollopa kalshen ka tooyten.

³⁶ Untoose ollopa xaayammitto, piita Kipsitin parrasene a loota tappa itturopa deena kela ishootta tooytita; piisse ka pora asse pahon doxa kela pahata.”

Yoosefi akka piita Kipsi qara shuumame

³⁷ Wossene a Yoosefi lele ka nuqusa isho orra isha olli piita mukinno xasayshen.

³⁸ Nuqusa ka orra isha olli piita mukinno kide, “Nama a hapura Waaqa kara co a Yoosefi paho aysha'e akkaada?”

³⁹ Ka oori Yoosefi kide, “Waaqa sede piisa ke upnaysheey, ooka ka hayyoota a ke paho in co.

⁴⁰ Semmalla, akka tika nuqusa mukisso'en ke shuumeey orriyyo piisa ke ajajama. Qootan nuqusa kodde malla ana patta ke qara qapnaada.

⁴¹ Tin anti amma piisse a Kipsi piisa qara'en ke shuume.”

⁴² Ka jifeetase a kobbeeta nuqusuma qara kitto qupittaadi quda yuke ka qupitta Yoosefi quda' kalshe. Ka kaappa paxaara kuli isha quda' kalshe. Ka xolma kela yaateta warqeeta ishi' kalshe.

⁴³ Ka sarakella a nuqusa a lammatta qara' kutiishe. Orra nuqusa tooytino ka Yoosefi tura' qatte ka nessa a kuttan kiini, “Isha tura kaareeta oorsha.” Yoosefi pora asse pahonne piita Kipsi qara' mukissampayta kodde ka shuumame.

⁴⁴ Feri'ooni ka Yoosefi' kide, “Anti an nuqusaay, ana maliiyyi, nama takka nefo a atti' kiito maliiyyi, we takkan nefo qappatta in ettansho.”

⁴⁵ Ka maxxa “Saafnaati pa'inahi” kidammo Yoosefi' kode ka enenta a Potifaara takka Asnaati kidammitto a qeesitta a katama Ooni hemitta ishi' daashe.

⁴⁶ Yoosefi a Feri'ooni nuqusa piita Kipsi olli koda koda paayyeeyye, paraadi kunda sessa. Ka tika nuqusa kara sooke ka piita Kipsi piisa oppa tooya'e pora aane.

⁴⁷ Parrasene tappa a hiira oppaayye piita Kipsi oppa'e unta ka akata palite.

⁴⁸ Ikka unta a parroosen a hiira tappa oppa piita Kipsi kara' palite ollopa poote ka katamadda karopa ollopa kalshe. Unta dullaappa palite piisa katamadda a kapa' dedeha karopa kalshe.

⁴⁹ Yoosefi asse kode ka unta a tahayta kirra mina akata mali koopte akka ollopa kalto kode. Untase' qoota akata koopte malla, hiilan ekkassa kuli malaale ka asseew ollopa tuttuqe.

⁵⁰ A parrasene a loota tappa in paayyannin turanne, Yoosefi iskatteetaadi Asnaati enentase a Potifaara a qeesitta katama Ooni ollinni hellaa diira lakki xaayaden.

⁵¹ Yoosefi ka kide, “Waaqa poqalla toolinno ka rakkoota ana qara' kayte piisa ana teymacciise,” Ka innaadi a kuutati maxxa kode ka kide, “Minaase.”

⁵² Ka kideewwe, “Piisse an oppa' rakkade oppa'e Waaqa hellaa ana' daashe,” Ka kussita maxxa kode ka kide, “Efreemi.”

⁵³ Piita Kipsiti parrasene a hiira tappa ka tarpen.

⁵⁴ Ka akka Yoosefi deyyo'ew lele mina'e, parrasene a loota tappa ka paayyaden. Piita apari kitto piisa ka loosatte. Ma xoori piita Kipsi patta kara unta kitta.

⁵⁵ Piita Kipsi ete loosateeyye, samayta takka'e Feri'ooni kapopa aane ka akka unta ishootta' daasho'e isha naappade. Isha ka ishootta ajaje ka kide, “Aana ka wa Yoosefi ishina' kiina piisa koda.”

⁵⁶ Qoota doxa piita Kipsi piisa qara akata koopaan anno malla, Yoosefi kosaddasene a karopa unta tuqene piisa akka pappanan ka unta ka orra Kipsiti katamto kode.

⁵⁷ Qoota piita piisa dikke loosatte malla, piita a lekatiiyyi orra unta piddatta Yoosefi kapopa de'e.