Mataafa Uumata 34 - Mataafa Qulqulloota

Sekemi akka hupnan Tinna sootade

¹ Kuyyaata takkaayye, Tiina, enenta Yayqoopi isase a Liya' xaayte, tuparra piita Kene'aani tooyya'e ante.

² Nama piitose mukinno Hiiwitta Hamori kidammo ka inna Sekemi kidamma' qapa. Sekemi ka ete Tinna akkeeyye, xajeele ka irreetan ishetta sootade ka nyapalshe.

³ Isheetta' qoota akata xarjaallitteeta malla, Sekemi dikke isheetta jaalade. Ka akka isheetta isha jaalatto'e, ishetta naappade.

⁴ Ka aappaayshoti' kide, “Enentose ana' qinsado.”

⁵ Yayqoopi akka Sekemi enentaadi tinna nyapalshe dakaye. Ma qoota hellaadi a diira fooreeyye caan malla, haka kallaane'e oppa in oorinne.

⁶ Sekamma Hamoori aappa opa Sekemi ka Yayqoopi olliiyyi torraatta' aane.

⁷ Hellaa Yayqoopi ete kalen ka wa kodde' dakayeneeyye, itatammaqen. Ka Sekemi' qoota wa neeqa' kode ka enentaaysho nyapalissaan hellaa Isira'eeli' jeershe malla, akata miirooden.

⁸ Hamoori' xoori, i'ishotta' kide, “Innaayyo Sekemi akata enentaayshin jaaladeey, ino' daasha ikka hemo.

⁹ Ka kodayteeta hemitta oli tura kodanna. Ishina tuparraanno hema, ino kuli ka a xaayshin hemino.

¹⁰ Ka ino olli are' kallaada. Piitoose are kitto a xaayshin minaay, qinda a ishina aako piisa oppa' kallaada ka oppa tikumada.”

¹¹ Sekemi kuli ka Yayqoopi ka hellaa Yayqoopi' kide, “Oton i''enentaayshin ana daassa salteneeyye, wa ana kiinitane piisan ishina daasha.

¹² Isheetta patta ana daashama, wa heentane dayeeta kaassada, in ishina daashaay.

¹³ Qoota Sekemi enentaaysho nyapalshe malla, hellaa Yayqoopi wa dikadene isi kare'e qapaden ka qarandesa Sekemi isho aappaaysho Hamoori kidene,

¹⁴ “Oton enentinnon nama dawra qara in murannini daannaayye, jeera ino kodditaay, a Waaqa wa asse paha ino qara dawro.

¹⁵ Ma poran ishin olli kallo takka ca. Sede nefo paayyota'e, ke ka diira a piitaayshin oppa ca piisa dawra qara a xanno mina murattan, an ka siti olli kalla.

¹⁶ Akka tuparraanno hemitan, ino kuli ka a xaayshin hemina. Ka oori samayta takka koddina ka ollin kallaanna.

¹⁷ Xoori oton waan kiininna'e tiinnittan ka dawra qara a murannin, enentinnon qeedanna ka ishin alle aananna.”

¹⁸ Wa kidene ka Sekemi isho aappaaysho xasaayshen.

¹⁹ Sekemi qoota enenta Yayqoopi jaalade malla, wa ishi kidene koda'e kutiitta ishi in deene. Isha aren toolaaysho oppa nama akata ulfeessammo.

²⁰ Hamoori isho innaadi Sekemi ka xarra katamaasso oppopa aanen ka orra katamaseneti' kidene,

²¹ “Orrose, orra nakayta'ey a ino olli piisse oppa kallaaden. Piita ipaldi paldi ka ino piisa kaytaay, a oppa aanen ka qinda a ishootta aako oppa kallaaden. Ka tuparraasso hemina, ka a xanno kuli ishootta daanna.

²² Ma xoori oton ino a diira kodde'e a xaaysho mina dawra qara murada pattaayye ino olli kallaadan ka ino olli samayta takka koddan.

²³ Kodatteetaaysho ka wa qapane piisa a xannoow kodditaay, wa kidene oppa salla ikka ino olli kallaaden.

²⁴ Diira katamoosene piisa ka wa Hamoori isho Sekemi kidene oppa' salen ka dawra qara muraden.

Akka hella opa Tinna haalota pooyyen

²⁵ Ete dawra qara muraden kammaayye, kuyyaata sessattati a orrase qasanqassoota fayka oppa cooyye, hella Yayqoopi lakki, alawweeta Tinna, Simooni isho Lewi a orroose issi qara in upnin mali katamaasso oppopa kullen ka hamiyyaasso piisa leyshen.

²⁶ Ka Hamori isho innaadi Sekemi kuli leyshen. Ka Tinna tika Sekemi kara qeeden ka ishin kalen.

²⁷ Sekkammaayye, hellaa a Yayqoopi piisa ka katamasene a oppa enentaaysho nyapalte karopa aanen ka tikkasene a orra le'eti' saren.

²⁸ Ka kaharra ka telalla ka okkaya isho harrewwa katamaappa ka a lakoppa qapane piisa tura saren.

²⁹ Ka wa qapane ka wa tikkaappa ca piisa saren ka iskatta isho hellaasso kuli poojen.

³⁰ Yayqoopi ka Simooni isho Lewi kide, “Akka Kene'aaneta isho Fersaata ana xaccisatto'e asse kooten ka qaapa a kokkoka karopa ana kalissen. Ino an shakkayaawweey, oton ino qara'e xa'an ino piisa piran, ana ka tooliyyo ka oori piramma.”

³¹ Ishootta ka kidene, “Hela xawwi enentinno nyapalshen anka asse eeyye' jaw kiina?”