Mataafa Uumata 3 - Mataafa Qulqulloota

Akkima nama ajajama diishe

¹ Pinaana a Yaahiwwe Waaqa uume piisa oppa maaka, akatan falqoolayta. Maaka iskatteetase'e kaassade ka kide, “Hela Waaqa keeto luukkata qorosen pora dishima kara ca takka nefo akka addammini ishin dawre?”

² Iskatteetase ka ishi oorisse ka kiite, “Luukkata a qorosen pora dishima kara ca dama in ettaninna;

³ ma xoori Waaqa ikide, ‘Luukata qoyroose pora a dishmati otantoppa cooti in daman umma quda nefo in kayan! Ataakkati ittootaneey.’”

⁴ Maaka ka iskatteetaseti oorshe ka kide, “Pakkanna attootan.

⁵ Waaqa wa malla asse ishina' kide, oto luukkata qoyroseti damtaneeyye, akka ildaassin panaman akka wa neeqa ka a paxaara upnaattan ka Waaqa pahanaattan qoota upo malla.”

⁶ Iskatteetase akkima luukkata qoyroseti damta' paxaari ka ilta kela orra satinnitto ka ookuma akkatta orra xasannitto, akka koddite ete akkiteeyye, luukkatase oppa mittite ka damte ka diirtase' xaadi isheetta olli co kuli' daasse ikka dame.

⁷ Ilda ishootta lakki piisa ka panamen. Ikka akkima lulleeti caan upnaaden. Ka haashsha qoyra takka hilteeta kidammoti olmina heddishen ka isi kamma' saapaden.

⁸ Ete kalakalaawte, Attaami isho iskatteetaadi ka ete Yaahiwwe Waaqa qora Edeni karandesa annooyye kamantaadi dakayen. Ka oori qahen ka Yaahiwwe Waaqa turaayye qora Edeni kara' deddekaden.

⁹ Yaahiwwe Waaqa ka Attaami hale ka kide, “Attaami ayshaayye' kitta?”

¹⁰ Attaami ka kide, “A' qora karan desa annitton nessaayti dakaye ka qootan lulleeti co malla fuure ka ke tura dekade.”

¹¹ Yaahiwwe ka ishi' kide, “Akka lulle kitto, ayno ke' lele? Hela qoyrase an ke' kide luukkataadi in damane' damte?”

¹² Attaami ka kide, “Iskatteetase a akka ana olli kallaatto ana' daasse, isheetta luukkata qoyroseti ana' daashe anka dame.”

¹³ Yaahiwwe Waaqa ka iskatteetase kaassade ka kide, “Ata ini maana' koote?” Iskatteetase ka oorisse ka kiite, “Maaka ana sassapade anka dame.”

Waaqa opa Attaami qara'e farate

¹⁴ Yaahiwwe Waaqa ka maaka' kide, “Qoota sede koote malla, pinaana piita qara ca oppaayye a jiijame' koddita. Awwe desa piitan desa karittan titmatta ka haka' kittooyye piita damta.

¹⁵ Otantaayti ka a iskatteetoseti ka otanta sanynyeetaayti ka a sanynyeetaadi oppa'en paarkaallummaata koda. Isha mattaayti oppa tuma atti ka kamdaadi qomta.”

¹⁶ Ikka iskatteetaseti' kide, “Oto inna hittooyye, rakkootan ke qara' koopsha akka surumtan xaayta; a koddito ma diirtaayti olliiyyi kallaattaawwe' jaalatta isha ka ke muksha.”

¹⁷ Ka Attaami' kide, “Atti dehaamta iskatteetaayti'i' dakayte ka qoyra an damta ke dawre damteey, ke miidda malla piita a jiijamte a koddito. haka' kittooyye, yaalanne piita qara damta.

¹⁸ Piita ke malla qeeyya ka miissa dehissa. Akka wa aylatte' damta.

¹⁹ Haka piisse a oppa uumamte oppopa oorritto kara'e, dititaayti' damta. Piitoppaayye' deeteey, piitoppopaawwe' oorta.”

²⁰ Attaami iskatteetaadi qoota aayya a uumata piisa' koddite malla, “Hewaani” kide ka maxxa isheetta' kode.

²¹ Yaahiwwe Waaqa koka ohaata' kode ka Attaami isho iskatteetaadi quda' uwwishe.

Waaqa Attaami ka Hewaani Kenneti oppaayye daane

²² Sekkammaayye Yaahiwwe Waaqa ka kide, “Amma i'akkitene! Attaami ino mina'ew wa a neeqa ka a paxaara upnaade. Amma nefo oton qoyroose caatta daanno damaayye in to'ooy, akka qoyroose caatta daanno in dammin ka haka paraparati in kallaannini'i, a qara dawramto.”

²³ Semmalla nama akka piitase a oppa de'e aylado'e, Yaahiwwe Waaqa ka Kennetippaayye ishootta sookshe.

²⁴ Waaqa Poqalla ka oori Attaami kamma daane. Akka nama qoyroose a caatta kapa in kaynini'i, Waaqa erkampattowwa a Kirupeeli kidamma ka koraateta a apitta' mina opaynitto ka kara kakkallitto eenna Kennetiti qinda piirtotatin xaaye ikka tooytini.