Mataafa Uumata 23 - Mataafa Qulqulloota

Toota Saara ka poraadi a hawla

¹ Saara ete paraadi dippa ka kunda lakki tappa kaye kammaayye,

² piita Kene'aanitiiyyi, katama Keprooni isasene Qiiriyaati arpa'i kidamma oppa'e toote. Aprihaami ka tootose a Saara malla nyarrahe ka pooye.

³ Aprihaami ka pukkase kapa xa'e ka Hittaata kapoopa aane ka ishootta' kide,

⁴ “Anti xaykuma'en ishin oppa kallaanniiy, poran oppa pukka iskatteetiyyo, hawlado ana' kata.”

⁵ Hittaata ka ishi' kiite,

⁶ “Poqallaay, tin are dakaye. Atti ino qara a nama kuttaay, nama ino oppa pora hawla ke dawro in cooy, turkadaanno oppa hawla a ke aako kara pukka iskatteetaayti hawlatta i''ettanissa.”

⁷ Aprihaami ka xa'e ka Hittaatase kalataysata'e, miinta piitan kaye ka ishootta' kide,

⁸ “Ete akkan pukka iskatteetiyyo are' hawlado ana owsatteneeyye, inna Soha'ari Efrooni qaraayye,

⁹ akka rahanase dulaadippa torka quda pora Makfeela kiinaane qapo akka wa qeennaati ana' kato'e, are desa ana isha kaassada. Anka ishin kapa desa piddado, ikka xayyo koddo.”

¹⁰ Sitiiyyi Efrooni hittaata olliiyyiiw ca ka orra piisa tura'e, Aprihaami' oorshe ka kide,

¹¹ “Poqallaay! dakaye. Akka pukka iskatteetaayti oppa' hawlatto'e, dulase ka rahana oppa co ollini, akka' teyyatto'e, orrinno a Hitti tura'e, in ke' daashe.”

¹² Aprihaami ka isha kalataysattaa'e, miinta piitan kaye.

¹³ Ka orra piisa tura'e, Efrooni' kide, “Wa duloose' qeeda ana' lele, anaka oppa' pukkase hawlaado.”

¹⁴ Efrooni ka Aprihaami' oorshe ka kide,

¹⁵ “Poqallaay, heraadi laadi dippa afuri qeeda ma, firuminno kelli disheey sene maana ino qara nessishan. Atti xoori pukka iskatteetaayti eeyye' hawlaado.”

¹⁶ Aprihaami isho Efrooni sede qara'e olli' kalen. Aprihaami ka akka siti hera heraammo qara'e, pirreeta dippa afuri Hittaata tura Efrooni' daashe.

¹⁷ Dulase a Efrooni Mamreeyye qinda piirtota opa co ka qudaayye pora Maakfeela kiinaan a oppa rahana qapo ka a Aprihaami kodde. Duloose isho rahana oppa co ka qora kapandesa ca piisa,

¹⁸ akka a Aprihaami kodden Hittaata moorappopa deete piisa ka upnaatte.

¹⁹ Sekkammaayye Aprihaami ka pukkase a iskatteetaadi a Saara piita Kene'aaniti rahanase kara' hawlade.

²⁰ Semmalla dulase a Hittitta rahanase oppa co ollinni dula turka a Aprihaami kodde.