Mataafa Uumata 2 - Mataafa Qulqulloota

¹ Piita isho moonta ka wa oppa ca piisa pora asse pahonne uumamen.

² Waaqa ete kodaadi piisa dikkisheeyye, kuyyaata a tappattati oori, inessade.

³ Waaqa qoota kodaadi a uumata a kode kela kuyyaata tappattati nessade malla, kuyyaaseti'i sake ka xawwi' reexxe.

⁴ Yaahiwwe Waaqa pora asse pahonne piita ka moonta uume. A Yaahiwwe piita ka moonta uumeeyye,

⁵ Qoota Yaahiwwe Waaqa roopa piita qara in roopnin, nama piitoose qara koda koono ka in kinnin malla, wa ilaawa piita qara'e, in dehne, umma we takkan nefo piita qara in ujjine.

⁶ Ma xoori pisha piita kara paadini ka piita piisa ikinni.

Attaami ka Hewaani

⁷ Yaahiwwe Waaqa ka piitoppa piita qeede ka nama kode. Ka nessa caatta soonaappan ishi uffe nama ka oori a napseeta caatta qapto qapo kodde.

⁸ Yaahiwwe Waaqa eenna Kenneti kidamma'e qinda piirtotati Edeni kara' harmishe. Ka namase a uume ka kode oppa' xaaye.

⁹ Yaahiwwe Waaqa qora ilda turaayye nama satinna ka luukkata a me'aawnitto dalla piisa piitoppaayye deheshe ka otanta eenna kara'e, qoyra daltaadi oto dammaaneeyye wa neeqa ka a paxaara upnanno ka qoyra caatta daanno deheshe.

¹⁰ Kirra dula Edeni ikinno ka Edeni kara urqini. Ka oto Edeni kara sooknooyye, oppa qootammi ka kirra afuri koddini.

¹¹ Kirra a paayyota Fisooni kidammi ka piita Hawiila, piita oppa warqeeta kitto kapa tiitanni.

¹² Piitosetiiyyi, warqeeta paxaara ka karpeeta a alaawnitto ka daka heraan kokkoka ca.

¹³ Kirra a lammatta, Kiyooni kidammi ka piita Toobbiya kapa tiitanni.

¹⁴ Kirra a sessatta, Tikose kidammi ka qinda piirtotatin katama Asoori kapan xata urqini. Kirra a afratta Efraatisi kidammi.

¹⁵ Se kammaayye, Yaahiwwe Waaqa akkima eenna Edeni kara koda kodo ka qara tooyo'e, eenna Edeni kara nama xaaye.

¹⁶ Yaahiwwe Waaqa nama ajaje ka kide, “Luukkata a qora eenna Edeni kara ca piisa dama i''ettanissa.

¹⁷ Ma xoori, qoyrase wa neeqa ka a paxaara oli kela upnanno, in daman. Oton dalta qoyroseti' damtaayye, ittoota.”

¹⁸ Yaahiwwe Waaqa ka oori dikade ka kide, “Xawwaatiiyyi kallaatta nama'e in paxaaraneeyy, qaarqaarsampayteeta a ishi ettanton ishi' koda.”

¹⁹ Yaahiwwe Waaqa pinaana kappina ka xampira moonta piisa piitoppaayye kode ka maxxada atta paha akkima ishootta kodo tooya'e, Attaami kapoopan de'e. Maxxada a Attaami uumata a caatta qapo kode ka maxxadaasso' kodden.

²⁰ Attaami, horeeta ka pinaana kappina ka xampira moonta piisa'e maxxa kode. Ma xoori qaarqaarsampayteeta a Attaami ettanto in kitto.

²¹ Semmalla Yaahiwwe Waaqa ka mukitta kutta Attaami qara' kate. Ka ete mukeeyye, qiniyyaadi oppa takka qeede ka porose oppa so'a immake.

²² Yaahiwwe Waaqa qinittase a Attaami qeede ka harmishe ka iskatteeta' kode ka Attaami kapopan aane.

²³ Attaami ka oori kide, “Tin, isheetta lafta a lafaayyoppa qeedamte, so'a a so'ayyoppa qeedame. Ishetta diirta karaayye qeedamteey, a iskatteeta kidamto.”

²⁴ Semmalla diirta aappaaysho ka aayyaasso' diisha ka iskatteetaadi qudupa kida ka lamatti ollin dakinta takka koddan.

²⁵ Attaami ka iskatteetaadi piisantiiyyi, lulleeti caan ma oli fokkisanni in caan.