Mataafa Uumata 13 - Mataafa Qulqulloota

Akka Apraami isho Looti olkela pasen

¹ Semmalla Apraami ka Kipsi kara sooke ka iskatteetaadi isho wa qapa piisa ka Looti kuli ollin piita Nekepi opa aanen.

² Apraami ka horeetaadi ka pirrewwa ka Warqewwaan akata teyantoode.

³ Sekkammaayye, Nekepiiyyi xa'e ka qinda Peteli opa kotaane ka porase a oppa deyyo arta Peteli isho a Aayi kara' tukkana dishade.

⁴ Ka pora qara' kalisoota kalissa' qupade oppa kaye ka porose oppa Yaahiwwe Waaqaysade.

⁵ Lootise Apraami olli anno, kaharra ka horeeta ka tukkanna kuli qapa.

⁶ Horeetaaysho' qoota dikke koopte ka pora oppa siksadan ka ishootta' qaje malla, ollin kallaatta ishootta in salle;

⁷ sikmaya Apraami isho a Looti nefo ka oli peeqen; sitiiyyi orra Kene'aani ka orra Feriisa'e piitoose oppaayye kala.

⁸ Semmalla Apraami ka Looti kide, “Ino an dala takkaay, artaayyo ka a xaayti ka arta sikmayaayyo ka a sikmayaatti kara'e, oto peqqa xaanaan in paxaaran;

⁹ piita Ipalddiiy, kadan olikela pasna iweyyi; oton kara quta opa' teyyanniiyyi, anti kara kamma opan teyyada; oton ke kara kamma opa teyyanniiyyi, anti kara quta opa in teyyada.”

¹⁰ Looti ete tooynooyye, piitase Kirra Yurtaanoosi kapan desa kitto akka piita pisha qapto koddite akke; a Yaahiwwe piita Sodoomi isho a Kamoora in patinnin turanne, piita qinda So'aritin kitto, ilaawumaadi akka dulase a Yaahiwwe Kenneti kidammo ka akka piita Kipsi mina pahata.

¹¹ Looti ka oori qinda piirtotatinni, piitase kirra Yurtaanoosi kapandesa kitto reexade ka oppopa kotaane ka oori olkela pasen.

¹² Apraami piita Kene'aani oppa'ew hase; Looti' xoori, palewwasene lakkaappa ca oppa'e kuti'e ka haka Sodoomiti pora kokkotaanni.

¹³ Orra Sodoomi xoori akata neequmtan immakaade ka Yaahiwwe tura' juppootaaw kooni.

Apraami akka piita Keprooni opa aane

¹⁴ Ete Apraami ka Looti oli kela pasen kammaayye, Yaahiwwe i'Apraami' kide, “Me isi kapandesa qinda pisa opa tooye;

¹⁵ Piisse a akkinitto piisa ke ka sanynyeetayti in haka paraparati' daasha.

¹⁶ Sanynyeetaayti akka Tahayta kirra mina'en koda; akka Tahayta kirra dika' ettansammi in kinnin mina'e, sanynyeetaayti dikama in ettansamto.

¹⁷ Piisse sanynyeetaayti in daashaay, oppa pora aane ka tooye.”

¹⁸ Apraami ka tukkanaadi putade ka piita Keprooniti qoyra aftaareta Memre co kapa' daapade ka eeppa' pora qara' kalisoota Yaahiwwe' kalsho qupe.