Mataafa Uumata 12 - Mataafa Qulqulloota

Waaqa akka Apraami hale

¹ Yaahiwwe Apraami'i kide, “Piitaayshin ka daltaytaayti ka tika sanynyeetaayshina' diishe ka pora an anti ke akkino opa aane.

² Anti samayta kutta'en ke koda ka ke' saka ka maxxaayti nefo kuttisha; akka nama saka' koddita.

³ Orra ke' saknooti in saka; ka a ke jiijno jiija; ke malla orra piita qara co piisa ka saka akkada.”

⁴ Apraami ka akka Yaahiwwe ishi' kide mina'e, piita Kaaraaniti xa'e ka aane; sitiiyyi paraadi kunda tappa' ken; Looti' kuli ka isha olliiw aane.

⁵ Apraami ka iskatteetaadi Soora ka inna innassoti Looti ka wa a qapane piisa ka orxaya piita Kaaraaniti isha kapa kala piisa qeede ka piita Kene'aani opa kalen.

⁶ Apraami haka piita Sekemiti qoyrase aftaareta Moore kapa kaynooti'i piitase oppan tarpe. Sitiiyyi orra Kene'aani'i piitoose oppaayye kala.

⁷ Yaahiwwe ka Apraami tura' issi akkishe ka kide, “Piisse are kitton sanynyeetaayti' daasha.” Isha ka Yaahiwwese isha tura akkaade'e, porose oppa pora a qara' kalisoota kalinnaan kode.

⁸ Sekkammaayye irootase a Peti'eli qinda dumaata opa diishe ka Aayi qinda piirtota opa diishe ka artaasso kara' tukkana daapade ka eeyye' pora kalisoota Yaahiwwe' kode ka Yaahiwwe' sakatade.

⁹ Apraami ka poroseti xa'e ka Nekepi opa aane.

Waaqa akka piita Kipsiti toola Apraamin pahe

¹⁰ Sitiiyyi loota piita Kene'aani oppa' de'e; Apiraami ka lootase tura piita Kipsi opa paqe.

¹¹ Ete piita kipsi kapa kayeeyye, Soora'e kide, “Atti akka' paxaari in upa;

¹² orra Kipsi oton ke akkaayye, iskatteetaadi kida ka ana ishsha; ka ke teyyada.

¹³ Semmalla akkan anti' paho'e, ikka ilta fayyatin ana tooyane'e, ‘An alawtaadi kide.’”

¹⁴ Apraami ete piita Kipsi kayeeyye, orrase a Kipsi iskatteetase' xaadi akka paxaari akke.

¹⁵ Soora orra Ferooni kela koda koono kuli ka isheetta akke ka Feri'ooni tura isheeta peepe ka oori tika Fere'ooni opa isheetta qeede.

¹⁶ Fere'ooni ka Soora malla kide ka kaharra ka lo'alla ka harrewwa ka kaalla ka orxaya a hamiyya ka a iskatta kuli Apraami xasassa' daashe.

¹⁷ Yaahiwwe' xoori Apraami isho Soora malla kide ka Fere'ooni ka nama tikaadi kara kalo piisa qara erkannaata qeede.

¹⁸ Fere'ooni ka Apraami hale ka ishi' kide, “Ata atta ana koote? Ka maana malla akka iskatteetaayti koddite ana' lela diisse?

¹⁹ Maana'e' kiite, ‘Isheetta alawtiyyo’ anti ka allu isheetta hemitta dikade? Ma amma iskatteetaayti sede are kittooy, teyyado ka alle' aane.”

²⁰ Fere'ooni ka orxayaadi ajaje ka kide, “Isha ka iskatteetaadi ka horeetaadi piisa piisse oppaayye alle' keessa.”