Mataafa Uumata 11 - Mataafa Qulqulloota

Kawwatta Paapilooni

¹ Xattaayye, orra piita qara co, piisa afaa takkanew haasawanni.

² Orrase ete qinda piirtota opa kotaannooyye, laka piita sena'ori'i kaye ka oppa' kute'e.

³ Ka oori olli' kide, “Xooya! ka wa pilokketteta paha dooqqetoppa koona ka apittan palanna.” Ka akka dakaan tikka qupnaan mina'e, dooqetase a apittan palayshen teyen ka olopa jaqqalissaa'e, wa a simmintoota paha kara' daaten.

⁴ Ka oori olli' kidene, “Xooya katama qupanna ka oppa' kawwatta lettoppa kayto dawanna ka an piita qara an pasnin turan maxxinno dakaytinna.”

⁵ Yaahiwwe ka katamoosen ka qupeetase a orra qupanna tooyya' lekkade.

⁶ Ka dikade, “Ha ishootta sanynyeeta takka ka afaa takkaneew haasawanni ka semmalla sede koda paayyen. Umma amma oori wa dikadene' koda'e, ishootta in malaalto.”

⁷ Yaahiwwe ka tiitawe ka kide, “Xooya lekkanna ka akka olli in dakaynini'i, afaasso olkelan dapna.”

⁸ Semmalla Yaahiwwe ka piita piisa qara ishootta pasishe, ikka katamasene qupa alle' diishen.

⁹ Qoota Yaahiwwe afaa orra piisa upo olkelan dape malla, maxxa katamooseneti Paapilooni kidamen. Sekkammaayye Yaahiwwe piita piisa qara'e orra pasishe.

Sanynyeeta seemi

¹⁰ Sene are kammopa xata ca sanynyeeta Seemi. A pisha piita qara piren kammaayye, Seemi ete paraadi dippa kayeeyye, Arfaksidi xaaye.

¹¹ Seemi a Arfaksidi xaaye kammaayye, para dippa keni kallaade ka parroosen kara hellaa diira isho a tuparra' xaaye ka to'e.

¹² Arfaksidi ete paraadi dippa ka kunda sessa ken kayeeyye, Saala xaaye.

¹³ Arfaksidi a Saala xaaye kammaayye, para dippa afur ka sessa kallaade ka parroosen kara'e, hellaa a diira isho a tuparra' xaaye ka to'e.

¹⁴ Saala a paraadi dippa ka kunda sessa kayeeyye, Epoori xaaye.

¹⁵ Saala a Epoori xaaye kammaayye, para dippa sessa ka kunda sessa kallaade ka parroosen kara'e, hellaa diiraa isho a tuparra' xaaye ka to'e.

¹⁶ Epoori ete paraadi dippa sessa ka kunda afur kayeeyye, Faaleqi xaaye.

¹⁷ Epoori a Faaleqi xaaye kammaayye, para dippa afur ka kunda sessa kallaade ka parroosen kara'e, hellaa a diira isho a tuparra' xaaye ka to'e.

¹⁸ Faaleqi ete paraadi dippa ka kunda sessa kayeeyye, Ra'u xaaye.

¹⁹ Faaleqi a Ra'u xaaye kammaayye, para dippa lakki ka sakali kallaade ka parroosen kara'e, hellaa a diira isho a tuparra' xaaye ka to'e.

²⁰ Ra'u a paraadi dippa ka kunda sessa lakki kayeeyye Serooki xaaye.

²¹ Ra'u a Serooki xaaye kammaayye, para dippa lakki ka tappa kallaade ka parroosen kara'e, hellaa a diiraa isho a tuparra' xaaye ka to'e.

²² Serooki ete paraadi dippa ka kunda sessa kayeeyye, Nakoori xaaye.

²³ Serooki a Nakoori xaaye kammaayye, para dippa lakki kallaade ka parroosen kara'e, hellaa a diira isho a tuparra' xaaye ka to'e.

²⁴ Nakoori ete paraadi dippa ka sakal kayeeyye, Taara xaaye.

²⁵ Nakoori a Taara xaaye kammaayye, para dippa ka kunda lakki' sakali kallaade ka parroosen kara'e, hellaa a diira isho a tuparra' xaaye ka to'e.

²⁶ Taara ete paraadi dippa kaye kammaayye, Apraami ka Naakoori isho Haraani xaaye.

Sanynyeeta Taara

²⁷ Sede sanynyeeta Taara. Taara Apraami ka Nakoori isho Haraani xaaye. Haraani ka Looti xaaye.

²⁸ Haraani aappaaysho Taara turanne piitase a oppa dalade oppa' to'e. Isha piita Paapilooniti kanta Uuriti dalade.

²⁹ Apraami iskatteeta takka Soora kidammitto heme. Naakoori'iw, Milka heme. Haraani tuparra lakki, Milka isho Yaska xaaye.

³⁰ Saara' xaayni in kitto, umma inna takkan nefo in qapto.

³¹ Taara innaadi Apraami ka inna innaadi Lootise a Haaraani' xaaye ka iskatteetase a Apraami Soora qeede ka piita Kene'aani opa anta'e, piita uuriti xa'e. Ma xoori ete Kaaraani kayeneeyye, eyye'e kute'en.

³² Taara ete para dippa lakki ka ken kayeeyye, piisse a Kaaraani oppa'e to'e.