Mataafa Taanynyada 9 - Mataafa Qulqulloota

Apemeleki

¹ Apemeleki inna Kedewooni katama Sekemi opa apuyyawwaasso kapopa aane ka ishootta ka sanynyeeta aayyaassoti piisa kide,

² “Sekemeeta piisa kida'e, ‘Helaa a hellaa Kedewooni kunda tappa pisa ishin piddane ishina wayyim, moon a nama takka patta ishin piddo ishna wayyi?’ Anti'iw akkan diikaayshin kodde ka ishinoppa sooke dikada.”

³ Apuyyawasene xaaysho ka pakkaadippa sede orra Sekemi piisa kapa lelen; Sekemeeta ka kiite, “Ha kara isha innaanno” Ka Apemeleki kamma' ooreta dikatte.

⁴ Ka tika killoota a pa'alpariti kara dakara pirreeta kunda tappa qeette ka ishi daasse; Apemeleki ka dakarase apirreeta kunda tappan almaleeta pidde ka iskamma qeede.

⁵ Ka Ofraapa tika aappaayshoti opa aane ka hellaasene xaaysho kunda tappa shila takka qara leyshe; qussuqqunaasha a Kedewooni Iyyo'ataami xoori idekade ka toota kela pahe.

⁶ Sekkammaayye samayta Sekemi isho a Petimiillo ka qoyrase a aftaareta kutta Sekemiyyi co kelopa Apemeleki nuqusumshen.

⁷ Iyyo'ataami ete sede dakayeeyye, kuuta irroota Kersaani qaropa fayyade ka nessa kuttan orraseti kide, “Ishina orra Sekemitiiyyi, waan ishina kiina dakaya! Waaqa i'ishin dakayaay.

⁸ Kuyyaata takkaayye qora ollopa aane ka isi qara nuqusa nuqusumissa fade ka ekerta kidene, ‘Ino qara nuqusume.’

⁹ Ekerta xoori i'ishootta kiite, ‘Hela sayteese xayyo Waaqa isho nama ishin ulfeena akkannaanen diisha ka qora qara nuqusuma?’

¹⁰ Sekkammaayye qora sene ka qoyra hilteeta kidene, ‘Xooye ka ino qara nuqusume.’

¹¹ Qoyra hilteeta xoori i'ishootta kide, ‘Hela luukkatase xayyo paxaara ka me'aawnitto dalan diisha ka qora qara nuqusuma aana?’

¹² Qora sene ka oori qoyra wayneetati kideneewwe, ‘Atti xooye ka ino qara nuqusumeew.’

¹³ Qoyra a wayneeta xoori i'ishootta kiini, ‘Hela taadetase xayyo a wayneeta a Waaqa isho nama xasannitto dalaan alle diisha ka kapa qora qara nuqusuma aana?’

¹⁴ Semalla qorasene piisa ka qassatta kidene, ‘Xooye ka ino qara nuqusume.’

¹⁵ Qassatta ka ishootta kide, ‘Oton dukaatanne isi qara ana nuqusumissa heentaneeyye, xooya ka kaattiliiyyo kela koorsada; ataakkati apitta a taammasene xayyo qeeyya qapa kara shoro ka qora lipaanoosi kupo.”

¹⁶ “Amma dukaatan ka hanqeetanne Apemeleki nuqusumissene? Ka wa Kedewooni ishina kode dikattaan toolaadi qaarqaara sede kootene?

¹⁷ Aappinno Miitiyaameta kela ishinan pahae karitta isi qara kutade ka ishin malla oranna torpe.

¹⁸ Ishina xoori awwe toola aappinno qara paarkaalummaata xaaten ka hellaadi kunda tappa shila takka qara lessen ka Apemelekise a orxayteetaadippa xaayade qoota namayshin kodde malla Sekemeeta qara nuqusumissen.

¹⁹ Amma oton dukaatanne ka hanqeetanne Kedewooni isho toolaadi dikatten ka sede koonittaneeyye, Apemelekin xasooda, isha ka ishinan xasoodo.

²⁰ Attaakati apitta a Apemeleki kara sooko ka ishin Sekemeeta isho Petimiilota kupo ka akkamose mina'ew ishin Sekemeeta isho Petimiilota kara sookoow ka Apemeleki kupoow.”

²¹ Iyyo'ataami ete asse haasawade kammaayye, innaasso Apemeleki fuure ka piita Pe'eri opa qahe ka eyye kallaade.

Apemeleki isho Sekemeeta

²² Apemeleki ka Isira'eeleta qara para sessa nuqusume.

²³ Sekkammaayye Waaqa ka Sekemeeta isho Apemeleki otantoppopa hapura neeqa erke; Sekemeeta ka Apemeleki qara xaate.

²⁴ Sede nefo wa malla asse kode, Apemelekese hellaa a Kedewooni kunda tappa leyshe isho orrase a Sekemi hellaasso qaropa isha nyershe qaraayye haalota pooyyeeta malla.

²⁵ Sekemeeta ka Apimeleki qara xaate ka orra irroowwa qara xaayatte ka akka orra tura asadane koote ikka orra xaayshoti pore anno piisa sarri; Apemeleki ka sede piisa dakaye.

²⁶ Sekkammaayye, Kaa'ali inna Epedi ka hellaasso ollin Sekemipa de'en. Sekemeeta ka isha qara xasa xaayatte.

²⁷ Ka pisanti dullaasso oppopa sookaden ka wayneeta pohen ka diipen ka xayso nessuma a xasa kodaden ka tikase xaaysho a killoota kelopa kalen ka damta dammi ka ikkayta ikinni ka Apemeleki onni.

²⁸ Kaa'ali inna Apedi ka kide, “Ata Apemeleki ayno anka ishi piddaminna? Sekemeeta maana malla isha piddammi? Apimeleki inna Kedewooninni? Sepuli'iw Kedewooni kelaayye shuumittanne? ino ka amma Apemeleki piddamma? Se kapaayye sanynyeeta Homori isase aaka opa Sekemi kodde piddama.

²⁹ Kadin ana samaytose mukinni kiiteeyye, esse xattaawwen Apemeleki tawinni heene ka laadi isha kida, ‘Xelaayti a oranna kuttumtan xaashe ka oranna xooye.’”

³⁰ mukissampaytase a katama Sekemi Sepuuli, ete wa Kaa'ali inna Epedi kide dakayeeyye, akata miirode.

³¹ Ka Apemeleki kapopa juuttotan orra erke ka ishi kide, “Kaa'ali inna Epeti hellaasso ollinni Sekemipa de'en ka akka Sekemeeta ke qara xaato kooni.

³² Amma oori orra ke quda co ollin halkeette aana ka lakoppa tura asada.

³³ Ka parri teykanti oto letta piirritooyye katamoosen qara ura; ka oto Kaa'ali isho orra quda co oranna ishina xaananeeyye, akkima ettaninnittan mina'e, ishootta torpa.”

³⁴ Apemeleki isho xelaadi a oranna piisa ka halkeette kita afuri oli qoote ka katama Sekemi kapa asaden.

³⁵ Ete Kaa'ali inna Apedi xarra katama turopa sooke ka eyye qa'adeeyye, Apemeleki isho xelaadi a oranna ka porase a oppa dekaden kara sooken.

³⁶ Kaa'ali ka ishootta akke ka Sepuli kide, “Tin, orra irroowwa qara xata lekkanni.” Sepuli ka kide, “Sede kaattilayta irroowwa orra paha diisheey orran.”

³⁷ Kaa'ali xoori kideewwe, “Orra kunkunnawwa qara xata lekkanni; paka deemo porase a hilteeta so'ayaati desa deeni.”

³⁸ Sepuli ka oori ishi kide, “Ata nyerasene xaayti aysha caan? ‘Apemeleki ayno anka isha pidamma?’ akiine? Orrase a qara seesnitto seneey, aane ka oranna ishootta xa'e.”

³⁹ Kaa'ali ka Sekemeeta tura qate ka Apemeleki torpa sooke.

⁴⁰ Apemeleki ka isha kamma daane, ikka tura qahe; orra lekayta ka haka xarra katamaati'i poroppa qarame.

⁴¹ Apemeleki ka poraadi a kallaata Aruma opa oorsdae; Sepuli xoori Kaa'ali isho hellaasso'e Sekemi kara alle daane ikka oori eyye kallaata malaalen.

⁴² Parraytaadiiyyi, Apemeleki ka akka Sekemeeta dullaapa sookatte dakaye.

⁴³ Ka orrase isha quda co pora sessa qoote ka akka pora pora oppa assadane kode; ka ete orra a Sekemi katama kara xata sookno akkeyye, orrase lessata'e turopa sooke.

⁴⁴ Apemeleki isho xelase isha quda kittame, ihire ka xarra katama tura mure; kita ataakane lakki ka dullaappopa hiren ka orra dullaappa co piren.

⁴⁵ Apemeleki ka haka letta dummitto'e orrase torpe; ka katamasene qara pire ka orra katamoosen kara co leyshe; ka katamasene qitqishe ka sookittan ishootta qittayshe.

⁴⁶ Orra a qorrima Sekemi kara kalo ete sede piisa dakayeeyye, Kimpilitta tikase a killoota pa'alperiti kela co kelopa kalen.

⁴⁷ Apemeleki ka orrase akka takka eyye kelopa kale dakaye.

⁴⁸ Ka orra isha quda co piisa ollin irroota Salmooni qaropa fayyaden; Apimeleki ka erkaha qeedade ka qoyra qara taama mure ka xashshitta qara qapade ka orra isha quda co kide, “Waan anti koona tooya ka jarjartan ana olli koda.”

⁴⁹ Orra isha quda co piisa ka qora qara taamma quurade ka Apemeleki kamma qate ka tikase a orrase kara dekade quda tuulen ka orrase kara co olloppa kupen, orra a kara co piisa ka le'e; diira ka iskatta a kara co kuma takka mina'e ca.

⁵⁰ Sekkammaayye, Apemeleki katama Topesi opa aane ka kapa mure ka qara pire.

⁵¹ Katamoosen karaayye pora qorrima kawwattatin dawame a kokkoka ca; nama katamoosen kara co, diirta ka iskatta piisa ka karopa qahe ka xarra ittura dufen ka tula qaropa fayyaden.

⁵² Apemeleki ka torpanaan qorrimase a kawwatta kapa kaye ka apitta oppa diisha'e xarra kapan sooke.

⁵³ Iskatteeta takka ka mateeta yoomatta mattoppa ishi katte ka nahatitta tupa nyalxattasse.

⁵⁴ Isha ka jarjartan xayyoolayta meeha a oranna isha kela haano kide, “Akka orra in kiinini'i ‘Iskatta isha ishshe malla,’ koraatetaaytin alle kela ana pire.” xayyoolaytase ka koraatetan isha dote ka ishshe.

⁵⁵ Orra Isira'eeli akka Apemeleki to'e ete dakayyeyye, pisanti alle tikkaapa kale.

⁵⁶ Apemeleki sede a hellaasso kunda tappa leyshe ka aappaaysho kamma jeera qeede malla, Waaqa asse haalota isha qara paayye.

⁵⁷ Waaqa ka akkimose mina'ew akka orra Sekemi neequmta kode piisa kapa akka; Ipaasene a Iyyo'attami a inna Kedewooni ka asse ishootta qara dikkaden.