Mataafa Taanynyada 7 - Mataafa Qulqulloota

Kedewooni Miitiyaameta pute

¹ Kedewoonise Yirupa'aali kidame isho orra isha quda co piisa ka parraytaadi paraappan xa'e ka ela Herooti kapa safare. Orra Midiyaami'iw qinda qutattatinni irroota Moore kapa naaba kara safare.

² Waaqa ka Kedewooni kide, “Akkan Miitiyaameta harkaaytippa an tarpinnin ka an daannini'i, orra ke olli co ikoopeey, akka hupnaayshotin puten qoota ishootta pahanaatto malla, ana in ulffessan.

³ Semalla samayta kide, “Nama ishin oppa tammaqno ka fuurro piisa irroose a Kele'adi an qara kinno qaraayye, a alle tiitaawo ka tikopa kalo.” Nama kuma kunda lakki lakki ka alle tiitaawe, nama kuma kudan ka hase.

⁴ Waaqa ka Kedewooni kideewwe, “Xela ke quda co amma nefo ikoopeey, kirroppopa ishoottan aane ka eeyye'en ishootta ekkaysadaay. Nama an kido'e ‘A ke olli aano’ a aano; an kidoowwe ‘A haso’ a alle tiitaawo.”

⁵ Kedewooni ka kirroppopa xela seetin aane. Waaqa ka ishi kide, “Orra kilpalle ka pisha ikno oppaayye a kuta mina arrapan pisha taqno xawwi reexxeew.”

⁶ Xelase oppaayye, nama dippa sessa hammaaraanne pisha ike; a ata hase piisa ka ikilpalle ka afaan qudannen pisha ike.

⁷ Waaqa ka Kedewooni kide, “Namoose dippa sessa, hammaaraan pisha ike ishinan paha, ka akka Miitiyaameta harkaaytippa daashaay, orra a hase akka alle kalo ishootta lele.”

⁸ Orrase Kedewooni kapa hasno dippa sessa ka orra kallo qara kalaata isho kaasa a dawnaan teyyade; isha ka orra a taaka piisa alle kalshe. Sitiiyyi, Miitiyaameta naaba ishootta kela xata co kara safarte.

⁹ Halkeessetiiyyi Waaqa ka Kedewooni kide, “Ana harkaaytippa ishootta daashaay, xa'e ka safara Miidiyaameta torpe.

¹⁰ Oton ishootta torpa fuurriiyyi, orxaytase xaayti ‘Pura’ kidammo olli safaraaysho oppopa lekkada.

¹¹ Ka wa ishootta kiinaane dakkaysado sekkammaayye oori ishootta torpa'e maxanyumtaay.” Isha isho Pura ka xela oranna safarase a xela oranna a Midiyaameta oppopa lekkaden.

¹² Midiyaameta ka Amaleqeta isho orrase qinda piirtotati kala naabase kara'e safaren, ka lekuma torrayta pahan, lekumta kaallaasso nefo, akka hinkaajjeta mina'e dikoota in qapnin.

¹³ Kedewooni ete xata kayeeyye, nama takka a xelittaadi olsa olsoode torrino dakaye; namase olsa torrino ka ikide, “Laaqqota poorta'e illi xata sukume ka ete safara Midiyaami kayteeyye tukkana toomte ka tukkanase karkalisse ka piitopa katte.”

¹⁴ Xelittase xaadi ka ishi oorshe ka kide “Sede orana a Isira'eelittase a Kedewooni a inna Iyyo'asi diisheey, wa pila in koddito. Waaqa akka Miidiyaameta isho xelase a oranna piisa puto'e harka adippa ishootta daashe.”

¹⁵ Kedewooni ete olsa namooseti isho maana kideeta akkima kodden dakayeeyye, ikilpiippade ka Waaqa sakatade ka safara Isira'eeleta opa tiitaawe ka kide, “Waaqa Miitiyaameta a oranna tuulte harkaayshin oppa daasheey, xa'a!”

¹⁶ Ka nama dippa sessa isha quda co kita sessa qoote. Ka matta nama mina'e, kaasa a dawnaan isho okkota a kara luda apitta caan qoote.

¹⁷ Ka ishootta kide, “Oton safaraaysho kapa kayooyye, wa an anti koona fayya tooyya ka a xayyo mina koda.

¹⁸ Oton ana isho orra ana olli co kaasa dawninoyye, ishina qindadda a safarra piisaayye desa kaasaayshin dawa ka uuyada ka kida, ‘Waaqa isho Kedewooni malla oranna torpa.’”

¹⁹ A olli qotta halkeetta kayto'e a shakkayteeta kittooyye, a tooytampaya oli purshen kammaayye, Kedewooni isho namase dippa isha quda co isafarase a Mitiyaameta kapa kayen ka kaassaasso dawen ka oktowwasene a harkoppa qapane mammaajen.

²⁰ Kitasene sessa ka kaasa dawen ka oktowwasene mammaajen ka ludasene apita harka pittitta oppa qapaden ka kaasa a dawnaan harka akkitta oppa qapaden ka uuyaden ka kidene, “Oranna a Waaqa isho a Kedewooni.”

²¹ Nama piisa ka pora oppa kittame oppa qa'ade ka safarase kapa muren; Miitiyaameta piisa ka ullupittan alle qahate.

²² Ete xelase Kedewooni quda co dippa sessa kaasa daweeyye, Waaqa akka tiitaawen ka Miitiyaameta olqaropa oranna oorsatto kode, ishootta ka qinda Sereeraatin desa tiitaawen ka haka katama Petishitaati isho haka hamintase a Apelmahoola Tapaati kapa kittooti qahen.

²³ Kafa Niftaalemi ka a Aseeri isho a Minaase pisa oppa isira'eleta ka halaamte ka Miitiyaameta kamma daante.

²⁴ Kedewooni ka Efreemeta a kunkunnaawwa qara kalto piisa kamma orra erke ka kide, “Lekkada ka akka Miitiyaameta Yurtaanoosi in tuullinin ka in qahanini'i, porase oppan kirra Yurtaanoosi tuullinaane paayyatte haka Petipaaraati kapa mura.” Efreemeta piisa ka oli haleete ka porase oppan kirra Yurtaanoosi tuullinaane paayyatte haka Petipaaraati porra piisa mure.

²⁵ Ka saarra a Mitiyaami lakki Oreepi isho sa'epi pooje. Ka Oreepi pora “Shila Oreepi” Kidammo oppa ikasse ka Sa'epi, pora “A oppa wayneeta diipannaan a Sa'epi” Kidammo oppa ikasse. Ka Miitiyaameta a haste kamma daante ka Oreepi isho Sa'epi qara matta quurte ka Kedewoonise Yurtaanoosiiyyi afa disiti co kapopan deete.