Mataafa Taanynyada 5 - Mataafa Qulqulloota

Masmuureta a Tipoora isho Paraaqi dawaden

¹ Awsetiiyyi Tipoora isho Paraaqi inna a Apini'ami masmuureta dawaden ka kidene,

² “Saarra Isira'eeletan tuule, samayta ka kamma anta' saleey, Waaqa kalataysada!

³ Ishina' nuqussaayye dakkaysada! Ishina' mukissampaya kuli dakaya! Anti Waaqa'en dawadaay, ka Waaqa Poqalla a Isira'eeli saarshaay.

⁴ Oo Waaqqo, awta irroota Etoomiti xaateeyye, ka lakkaadippan desa lalabbiteeyye, piita ke kela lellehe, moonta ka roopte, oraara kuli ka pisha urqishen.

⁵ Irroowwa ka fuula Waaqa Poqalla a Siina' tura ka fuula Waaqa Poqalla a Isira'eeli' tura xaren.

⁶ Sapana Shamkaari a inna Anaati isho a Ya'eliiyyi, nama piisse oppan tarpini in co; orra pore anno nefo torkarraanne anni.

⁷ Hakan anti Tipoora Isira'eeli kara aayya kodde ka xaano kara'e Isira'eeli kara orra kokokkoka ipirame.

⁸ Isira'eeleta ete killowwa a turan in upniniti' sakatatteeyye, oranna xarra katamaadi oppa' xa'e; Isira'eeleta kuma kunda afuri oppa, a mehadda oranna' qapo takka nefo ka dapade.

⁹ Karittiyyo, saarra a xela oranna a Isira'eeli olli ca, ka isasene samayta malla heennaassotin isi dehayshe olli caay, oo Waaqqo, kalataysame!

¹⁰ Ishina koorricca sirene' qara' qa'e ka harrewwa a' ataatin kulufna, ka ishina loqqaan anna, qootoseti desa haasawada.

¹¹ Are dakkaysada! Nessa a orra lekayta, a ella pisha' kapandesa dakaanno, putayma Waaqa'e torrini, ka putayma Isira'eeleta' haasawanni. Sekkammaayye samayta Waaqa, xarra katama' turopa ollopa sooke.

¹² Atti Tipoora, impase! impase ka xa'e ka masmuureta dawado! Paraaqi inna a Pini'emi, xa'e! Ka poojetaayti tura' qatte ka antaaw aane!

¹³ Orra a kela hase ka taanynyada turopa lekkade, samayta Waaqa ka hupnampaya torpa'e, ana olli awle.

¹⁴ Piitase a Efreemi a xatta Amaaleqeeta oppa kalto desa xela oranna ka awle, a demo ka Piniyaami desa awle, saarra a xela oranna, Maakiri desa de'en, a uleeta siltaana' qapa ka Saaplooni xata lekkaden.

¹⁵ Saarra xela Yisakooreta, Tipoora olli de'en. Aa, Yisakooreta ka Paraaqi kamma'e haka naabati awlite, Kafa Roopeeli xoori karitta lakki kodade.

¹⁶ Ata xawwi' maana'e kaharraappa' haste? Hela siija kaharraan haleenaan dakkaysata malla? Kafa Roopeeli xoori karitta lakki kodade.

¹⁷ Kafa Kaadi kirra Yurtaanoosiiyyi qinda piirtotati kala, kafa Taaniiw maana'e markapa kapa' jare? Kafa Aseeri kamkama pakateeta qare jare, ka pora markapa qa'anno kapa' hase.

¹⁸ Samayta Saaplooni, toota'e isi qara karitta kutade. Kafa Niftaalemiiw ka asseew piita irroowa qara oranna torpa' karitta kutade.

¹⁹ Pisha Mekido kapa Ta'inaaki kapa'e, nuqussa de'e ka oli torpe, nuqussa Kene'aani ka oranna' tuuleneew, umma poojeta dakarra pirreeta in akkanne.

²⁰ Hiikka moonta'e torpana' xa'e, ka akka xa'enenne Siisaarra torpen.

²¹ Xattaytase a kirra, kirra Qiisoni ka orra isha olli co piisa malxaan haadeey, oori napseetiyyo, japaado ka kamma' qapado!

²² Orra fartan torpino kulufaanne de'e, kamanta ka fartadaasso kela duutite,

²³ Erkampatoota Waaqa ka kiite, “Katama Meroosi ipa! ka orra kara kalo jiija! Hupnoolaya torpa'e Waaqa qaarqaara in awline ka qootaadi malla torpa'e oranna in tuulleey.”

²⁴ Iskatteeta a Qenesittase a Heperi, Ya'eli, a iskatta piisa qaropeela sakamto; a iskatta tukkanna kela kalo piisa qaropeela sakamto.

²⁵ Siisaarra, “Pisha ana' daashe” kide. Isheetta' xoori aanna ishi' daasse. Qoreeta orra kukutta oppa ishi xuda daasse.

²⁶ Ka harka takka oppa kujummitta tukkanan daapnaan qapatte, ka harka akkita oppa purrisha teyyatte. Ka purrishaan Siisaarra tula dapna marjajasse ka dapnoppa xata ishi kujummitta toommite ka oppan sookisse.

²⁷ Ikka nyalaflafe ka loqqa kela isheetta' pi'e, ka eeyye loqqa kela isheetta' deraade, ka loqqa kela ishi' pi'e ka deraade. Ka pora oppa' pi'e oppa'ew deraade ka to'e.

²⁸ Aayya opa Siisaara ka maskootetoppa xata akkite ka qaawa shakkayta kara xata tooyyatte. Ka ullupte ka kiite, “Ata sarakeella innaayyo atta asse jaren? Kamanta fartada sarakella kela kekkehnitto ka asse dapatte?”

²⁹ Tuparra ookuma qapa ka isheetta olli ca ka isheetta oorshen, isheetta' xoori i'issi' kiite,

³⁰ “Esse poojeta teyen ka qootanninni? Matta matta mina'e tuparra papaxxaara takka takka taaki lakki lakki in dapan. Siisaarra mehadda oppa sirame'e pooja, ka ohaata sira paxaara' qapto an xashshiyya qara' dakkadon ana kalanne?”

³¹ Oo Waaqqo Poqallaanno! Paarkaalaatti piisa akimoose' mina a piramen; orra ke jaalanno xoori, akka atoota hupnaadin piirritto mina'e a la'ayen. Sekkammaayye, piita Isira'eeli ka para kunda afur nessatte.