Mataafa Taanynyada 4 - Mataafa Qulqulloota

Tipoora isho Paraaqi

¹ Ete Ehuuti to'e kammaayyeew, samyta Isira'eeli Waaqa tura'e juppoota kodeew.

² Semalla Waaqa ka Yaapini nuqusase a Kene'aani katama Hasoori' kara kalo nefo akka ishootta puto' kode. Saara a xela oranna. Siisaarrase katama Haroshetihakoymi kara kalo,

³ Yaapini, sarakella sipla dippa sakali qapa. Ka para kunda lakki samayta Isira'eeli akata rakkacciise. Ishootta ka akka ishootta qaarqaaro'e Waaqopa ullupen.

⁴ Sitiiyyi xuumampayteeta takka Tipoora kidammitto, iskatteeta Laafidooti Isira'eeleta mukinni.

⁵ Isheetta' piitase a Efreemi kunkunnawwa qaptooyye, qoyra sampaapa a qoyra Tipoora kidammo ka otanta Raama isho a Peteli kara co kela'e kutiini ka faranni. Samayta Isira'eeli ka isheetta kapopa firteeta akkatta' deeni.

⁶ Isheetta ka Paraaqi inna Pini'ami piita Niftaalemiti katama Qaadesi kara halacciiste ka ishi' kiite, “Waaqa Poqalla Isira'eeli ike ajajini ka kiini, ‘Kafa Niftaalemi isho a Saaplooni oppa nama kuma kudan reexe ka irroota Taapoori opa oranna' tuule.

⁷ Siisaarrase saara a xela oranna a Yaapini kodde, akka ke oranna' xa'o'e kirra Qiishooni opa titta, ikka xelaadi a oranna isho sarakelladdaadin ketaripa de'a anka akka isha putto' koda.’”

⁸ Paraaqi ka isheetta' kide, “Oton i'atti ana olli anniiyyi in aanama, oton ke ana olli anni in kinniniiyyi an aano.”

⁹ Isheetta ka ishi' kiite, “Ke olli anta in aanama, qoota Waaqa harka iskatteeta oppopa Siisaarra tuukko malla, putaymosen oppa kurra a' teyto.” Ka oori Paraaqi olli Qaadesipa tuulte.

¹⁰ Paraaqi ka kafa Niftaalemi isho a Saapilooni Qaadesipa halacciise; nama kuma kudan ka isha olli xa'e. Tipoora kuli ka ishootta olli tuulte.

¹¹ Qenenittase Heperi kidammo, Qenaata ata hasse hellaa Hopaapi a sottoha Muuse kapa xa'e ka Qaadesi kapa' dehaade ka qoyrase kutta Sa'inaymi co kapa tukkanaadi daapade.

¹² Akka Paraaqi inna Apini'ami irroota Taapoori opa tuule ka Siisaarra' lelamte.

¹³ Siisaarra ka sarakella sipla dippa sakal isho xelaadi a oranna a isha quda co piisa katamasene a Haroshetihakoymiti xata kirra Qiisoni kapopa ollopa de'en.

¹⁴ Tipoora ka Paraaqi' kiite, “Kuyyaata oppa Waaqa akka Siisaarra putto' kodo awweey, xa'e! Waaqa isha ke tura' qattaay.” Xela oranna kuma kudan ka irroota Taapoori qara xata Paraaqi olli lekkaden.

¹⁵ Ete paraaqi xelaadi a orannaatin ishootta torpa xa'eyye Waaqa ka Siisaarra isho sarakellaadi ka xelaadi a oranna a isha quda co piisa akka tammaqane kode. Siisaarra ka sarakellaadi qara lekkade ka loqqaan qahe.

¹⁶ Paraaqi ka sarakelladdasene isho xelase a oranna a siisaarra haka katamasene Haroshetihakoymiti kamma daane. Ka xelase a Siisaarra a oranna piisa leyshe; umma nama takka nefo kela in pahane.

¹⁷ Yaapin nuqusa Hasoori qoota toola Heperi olli fayya qapo malla, Siisaarra tukkana Ya'eli a iskatteeta heperi a Qenesitta kelopa loqqaan qahe.

¹⁸ Ya'eli ka mina desa ante ka ishi kiite, “Poqallaayyo! in fuuran, xooye tukkaniyyo kela dekado.” Ka ete kulleeyye, ohaatan qara dekte.

¹⁹ Siisaarra ka isheetta kide, “In deepodeey, pisha an ikka ana daashe.” Isheetta ka xoroffaata pante ka aanna ishi daasse. Ka ete ikeeyye, ohaatasetin qara dekteew.

²⁰ Isha ka oori isheetta kide, “Xarroppa qa'ado ka oto nama ke qara kaassanno ka kiino, ‘Nama pila i'are caayye kide nama pila are in co.’”

²¹ Siisaarra qoota akata kafade malla, imuke ka oppa tawe; Yayeli iskatteeta a Heperi ka purrisha isho kujummitta tukkanan daapnaan qeedate ka isha kapopa lokkooti lohte. Ka kujummittase dapnoppopa ishi tommite ka piitoppa jaqqalisse ikka to'e.

²² Ete Paraaqi Siisaarra kamma xopta dawaan deenooyye, Ya'eli minopa sookte ka ishi kiite, “Namase a faanitton ke akkishaay xooye!” Ete isheetta olli tukkanase kelopa kulleeyye, Siisaarra a kujummitta a tukkanan daapnaan ka dapnoppopa ishi toommame ikka to'e ka eyye deraade akke.

²³ Waaqa ka awsi samayta Isira'eeli akka nuqusase a Kene'aani Yaapin putane kode.

²⁴ Samayta Isira'eeli ka haka Yaapini ikannaane'e kokkonnaatta quda'ew tawe.