Mataafa Taanynyada 3 - Mataafa Qulqulloota

Samayta piitase oppa in daanammin ka eeyye hasse

¹ Isira'eeleta a piita Kene'aani oppa oranna torpa in upnini ekkaysatta'e samayta a Waaqa piitase oppa hattishe sene are kammopa xata ca.

² Sede nefo, samayta Isira'eeli oppa xeltase apari oranna in torpinin akka oranna torpa sahato patta malla asse kode.

³ A piisse a Kene'aani oppa' hase, mukissampaya Filisteemi ken ka Kene'aaneta piisa ka Sidoonata isho Hiwwata irroota Pa'alhermoniti paayyatte haka kullaysuma Hamaatiti irroowwa Lipaanoosi qara kalto.

⁴ Ishootta wa malla eyye' hasene, samayta Isira'eeli ajajase a Waaqa xatta Muuse qudan aappadaassoti' daashe akka tooytannaan ka tooytaanni in kinnin ishotta ekkaysatta malla.

⁵ Seminan samayta Isira'eeli ka Kene'aaneta ka Hittaata ka Amoraata ka Feresaata ka Hiwwaata isho Iyyapuusata olli kallaanni.

⁶ Ka tuparraasso hemen ka a xaaysho hemitta' hellaasso a diiraati' daasheneew ka killowwaasso kuli saksaden.

Otini'eli

⁷ Samayta Isira'eeli ka Waaqa tura' neequmta kode ka Waaqa Poqalaadi alle' diishe ka killoowwa pa'ali ka a asheera kidamma' saksade.

⁸ Sede qaran xaate'e Waaqa ka ishootta qara akata miirode ka akka nuqusa Mosoppotaamiya Kushaani Fiishataaymi ishootta torpo ka puto kode ikka para sette ishi' piddamen.

⁹ Sekkammayye samayta Isira'eeli ka Waaqopa ullupe, ishi ka akka ishoottan paho'e, Otini'el inna Qenesi a kussitta Kaalepi ishootta' shuume.

¹⁰ Hapura Waaqa ka isha qara' lekkade ikka Isira'eeleta' taanynya kodde ka oranna' tuule; Waaqa ka nuqusa Mosoppotaamiya Kushaani Fiishataaymi isha turopa tuukke ikka pute.

¹¹ Piita Isira'eeli ka ha Otini'el' toono'e, para kunda afur mina' kitto' nessatte.

Ehuuti

¹² Sekkammaayyeew, samayta Isira'eeli ka Waaqa tura' neequmta kodeew. Waaqa ka Ekilooni nuqusa Mo'api akka ishootta qaropa hupnan qapnaado' kode.

¹³ Ekilooni ka Amoonata isho Amaaleqeeta isi quda' qeede ka Isira'eeleta torpe ka katamasene Sanpaapa immakaade a Iyaarko qara pire.

¹⁴ Samayata Isira'eeli ka para kudanka sette Ekilooni nuqusase a Mo'api'ti' piddame.

¹⁵ Sekkammayye samayta Isira'eeli ka Waaqopa ullupe, Waaqa ka akka ishoottan paho'e kafa Piniyaami oppa Ehuuti inna Keera takka Pittinsaala kodde ishootta' shuume; hellaa Isira'eeli ka Ekilooni nuqusase a Mo'api kapopa kipira isha' erken.

¹⁶ Ehuuti koraateta a dumduma mina' kitto ka paka lakkin qarta qapto tumade. Ka qinda akkittatin surra oppa hidade ka qara' mehadda kalsade.

¹⁷ Ka Ekiloonise akata kappa kapopa kipirasetin aane.

¹⁸ Ka ete nuqusaseti kipira daashe kammaayye, orrase kipira haade' kide, “Aana kala.”

¹⁹ Isha' xoori Kelkela kapaayye dakadda killoota' dishame kapaayye isi kamman desa nuqusa kapopa tiitaawe ka nuqusaseti' kide, “Juuttota an xawwi' desa ke' lelo ca.” Nuqusa ka issi' kide, “Jaw kide.” Ka kutkuttowwaadi a isha kapa caati' kide, “Intoonno shakkayta lakopa sookaay.” Ishootta ka pisanti sooken.

²⁰ A nuqusa fooqeta qara tikaadi a mankisteeta a nessuma kara xawwaati cooyye, Ehuuti ka kapopa heeqqe ka ishi' kide, “Nuquso! Erkana Waaqatinnin ke' de'e.” Nuqusa ka ela qa'ade.

²¹ Ehuuti ka harkaadi a pittitaatin koraatetase qinda akkittatin surrappa tafa quda' hidade yukade ka karitta nuqusa oppopa tawshe.

²² Kulpa kamma co kuli ka karitta karopa ishi pirame ka tultoppan ishi sooke, moora ka koraatetase' qara pire; ikka koraatetase eeyye oppa'ew ollin diishe.

²³ Ka oori lakopa sooke ka tura' xarra dufe ka qulfe.

²⁴ Ete Ehuuti tawe kammaayye, orxaya nuqusaseti ka de'en ka xarra fooqeta akka qulfame akken ka dikaden ka kidene, “Nuqusa dina qara ca koddita.”

²⁵ Ka asen asen ka kafaden. Ka ete hakaseti' xarra panammi in kinniniiyi, qulfeeta qeeden ka xarrase' panen ka poqallaasso a to'e ka eeyye piita' deraade akken.

²⁶ A ishootta asse qaqqa'aden ka asnaan oppa'e Ehuuti isekaade ka dakaddasene killoota' dishameti tarpe ka piita Se'ira opa kalta' tawe.

²⁷ Ka ete piitase a Efreemi kunkunnawwa qapto kayeeyye, kaasa dawe ka samayta Isira'eeli tura' qate ka ollin lekkaden.

²⁸ Ikka ishootta' kide, “Waaqa akka paarkaalaassin Mo'aapeta puttane'e kodaay, ana kamma' xooya.” Ikka isha olli aanen ka porase Yurtaanoosi desa qaran Mo'aapipa tuullinaan muren ka nama takka nefo in tarpinnin.

²⁹ Ka awse patta Mo'aapetoppa'e irrelaya a kokokkoka nama kuma kudan mina co leyshen, umma nama takka nefo ishootta kela in pahane.

³⁰ Mo'apeta ka awwse Isira'eeleta kela putamte. Piita Isira'eeli ka para kunda sette' nessatte.

Shaamkari

³¹ Sekkammaayye, Shaamkari inna Anaati ka xa'e. Isha orannaappa'e Filisteemeta dippa lehi jinfootan leyshe ka Isira'eeletan pahe.