Mataafa Taanynyada 2 - Mataafa Qulqulloota

Erkampattoota Waaqa akka Pokiimi opa deete

¹ Erkampattoota Waaqa ka Kelkela desa Pokiimipa deete ka Isira'eeleta' kiite, “Anti' piita Kipsi karan ishin sookshe ka piitase an turan aappadaassina in ‘Daasha’ Kide ka qaaleta kale oppopa ishinan de'e ka kide, ‘Kodayteeta an ishin olli qapo pakkanna an pasho;

² Ishina'ew orra piisse opa kalo olli kodayteeta in kodadane ka porra a qara' kalisoota kalinnaane' tura pulpula.’ Ishina' xoori ana'e a ajajamme. Xawwi maana malla asse kooten?

³ Semalla oori, akkiman orrose ishin tura an daannin in ishina' lelli. Ikka paarkaala ishina' koddan ka ishin payyahashan, killoowwasso kuli ka kehayta ishina' koddan.”

⁴ Ete erkampattoota Waaqa samayta Isira'eeli' piisa asse haasawatteeyye, samayta harmo'e pooye.

⁵ Porose sede malla Pokiimi kidame ka halaame, ikka porose oppa kalisoota Waaqa' kalshen.

Toota Iyyaasu

⁶ Iyyaasu ka samayta Isira'eeli' piisa isi qara xaashe. Samayta piisa ka haminta ishootta qayte lehatta'e piitaaysho oppopa kale.

⁷ Sapana Iyyaasuyyi ka isha kammaayye, haka qimoota koda orra qawwanno a Waaqa kode akkite kitto'e, Isira'eeleta Waaqaw saksanni.

⁸ Orxayta Waaqa Iyyaasu inna Newwe, ete para dippa ka kudan kayeeyye ito'e.

⁹ Ka hamintaadippa' mookame; porose a oppa' mookame nefo, piitase a Efreemi kunkunnawwa qapto oppaayye irroota Ka'aashiti qinda qutatta opa pora “Tiimnaati seraahi” kidammo oppa.

¹⁰ Ete xeltose piisa leete kammaayye, xelta a Waaqa isho wa paxaara a Waaqa a Isira'eeleta' kode in upnini xa'e.

Akka samayta Isira'eeli Waaqa' saksatta alle' diishe

¹¹ Sekkammaayye samayta Isira'eeli Waaqa tura'e wa neeqa' kode. Ka killowwa pa'aali kidamma saksade.

¹² Ka Waaqase a aappadaassoti isase piita Kipsi kara ishootta sookshe alle' diishen ka killoowwa sene a orra ishootta kapandesa kalo saksanna' kamma' tiitaawen ka ishootta' sakataden ka Waaqa miirayshen.

¹³ Ka Waaqa saksatta kapaayye, killowwasene pa'aali isho astaarooti kidamma' saksaden.

¹⁴ Sede qaran xaate'e, Waaqa ka Isira'eeleta qara'e, akata miirode. Ka akka wa qapane tura saradane'e, paarkaala turopa ishootta tuukke ka paarkaalaasso ishootta kapandesa ca ishootta qara' kokkonnayshe. Isira'eeleta ka oori paarkaalaasso isi qara oorissa malaalte.

¹⁵ Oto oranna' tuulaneeyye, Waaqa ka akka turanneew xaxade ka ishootta' lele mina'e, isha' mattaadi ishootta toorri, ikka akata rakkaden.

¹⁶ Sekkammaayye Waaqa ka taanynyada ishootta shuume. Ikka sarampayasene ishootta sarra kela ishoottan pahen.

¹⁷ Ma xoori samayta Isira'eeli, taanynyadaassoti ajajammi in caan. Ka Waaqa alle' diisheen ka kapaayye killowwa' sakatattaan dahalsaden; umma akkamase a aappadaasso ajaja Waaqa' tooytaaden mina'e, in tooytaanne ka irra qara saanta a aappadaassoti qara maqqen.

¹⁸ Waaqa oto taanynya ishootta shuumo piisa kapa'e, taanyosen olli caanni. Ka qoota paarkaala ishootta payyahinnaan ka ishootta rakkacciisnaan malla, pooytaaysho dakayni ka ishootta suraysanni ka haka taanynyosene caane'e, paarkaala kela ishoottan pahani.

¹⁹ Ma xoori, oto taanynyasene to'aneeyye, samayta isi kamman desa oorriiw ka killowwa kama anni ka ishootta sakatattan a aappadaasso qara qapto juppoota kooni ka karittaaysho kokkonnayshen ka kodaaysho a neeqa qara oorri in kinnin.

²⁰ Semalla Waaqa ka Isira'eeleta qara'e akata miirode ka kide, “Samaytose qoota ana ajajama tiite ka kodayteeta an aappadaasso olli kodade alle poote malla,

²¹ orra piisse oppa kalo, Iyyaasu ka a piisse oppa in daannin mali kapa to'e takka nefo an piisse oppa ishootta tura an daano.

²² Se Kapaayye akkima aappadaasso a xata saantiyyo tooytaaden mina'e akka saantiyyo tooytaaden ka in tooytaannin upnaatta'e, orrose ana in upnininnin ishootta ekkaysada.”

²³ Semmalla Waaqa orrose eeyye co, akka Iyyaasu ishootta piisa takka kapa'ew sooksho'e, harkaadi oppopa in daane ma akka eyye kara tawane'e kode.