Mataafa Sooketa 9 - Mataafa Qulqulloota

A kenatta: erkannaata le'eta horeeta

¹ Sekammaayye Yaahiwwe ka Muuse' kideewwe, “Feri'ooni kapopa aaneew ka ishi' kide, ‘Yaahiwwe Waaqa Iproota ike' kiini, akka ana waaqaysado'e samaytiyyo diishe.’

² Oton ammikki'i ishootta qara sooka dawriniiyyi ka eeyye' qapanniiyyi,

³ Tin hupna Yaahiwwe horeetaayti a koommaytoppa kitto, fartaddaatti ka harrewwaatti ka kaallaatti ka lo'allaatti ka kahirraatti isho telallaatti piisa qara'en erkannaata neeqa' qeeda!

⁴ Ma xoori Yaahiwwe horeeta Kipsi isho a Isira'eeli arta kara'e reexa koda; Umma horeeta a Isira'eeli oppaayye takka nefo in tooto.

⁵ Yaahiwwe xoora qape ka kide, ‘Anti Yaahiwwe parri seeyyen piisse kara sede koda.’”

⁶ Yaahiwwe ka parraytaadiiyyi waasene a kide kode; horeeta Kipseeta piisa ka piramte, A Isira'eeleta oppaayye xoori takka nefo in toone.

⁷ Feri'ooni ka wa kodde upnaatta'e, orra erke ka akka horeeta Isira'eeli oppaayye takka nefo in toonin upnaade. Ma xoori karitta Feri'ooni ikokkonnaade, umma samaytase in diinne.

A lehatta: erkannaata fudfuda

⁸ Yaahiwwe ka Muuse isho Arooni kide, “Kisaappaayye tara harka kara qaqqapada; Muuse ka Feri'ooni tura moontandela pulo.

⁹ Piita Kipsi piisa qara'e kuyyaalayta koddaay ka piita Kipsi karaayye nama isho horeeta piisa quda fudfuda ka sooka ka malaay.”

¹⁰ Ikka kisaappaayye tarase qeeden ka Feri'ooni tura qa'aden; Muuse ka moontandela pule; ikka fudfuda malina kodde ka nama isho horeeta quda sooke.

¹¹ Fudfudasene qoota so'aya a Kipsi isho samayta Kipsi piisa quda sooken malla, so'ayasene ka fuula Muuse tura qa'atta malaalen.

¹² Yaahiwwe xoori karitta Feri'ooni kokkonnayshe ikka akka Yaahiwwe turan kide mina'e, Muuse isho Arooni dakaya tiite.

A tappatta: erkannaata apteenta roopte

¹³ Kammaddesa Yaahiwwe ka Muuse kide, “Parri paraappan xa'e ka Feri'ooni tura qa'ado ka ishi kide, ‘Yaahiwwe Waaqa Iproota ike kiini, akka ana waaqaysadane'e samaytiyyo diishe.

¹⁴ A taakati mattaayti ke qara'e ka saarraatti isho samaytaayti qara'en erkannaatiyyo piisa qeeda; akka piita piisa qaraayye a ana paho takka nefo akkima in kinnin upnaatta.

¹⁵ Anti haka ammati'i hupniyyo akkissa ka ke isho samaytaayti qara erkannaata qeeda ka piisse qara ishin pira in ettansha.

¹⁶ Ma xoori akkan hupniyyo ke akkisho'e maxxiyyo ka piita piisa qara dakaado mallan haka ammati ke caayshe.

¹⁷ Atti haka ammati'i samaytiyyo qara isi jeejjini; umma akka sookane ishootta a faqqanni a kitto.

¹⁸ Tin, parri esse haka piita Kipsi uumamte paayyatte haka awweti'i apteenta a turan apari a akkinin, a akata kutta'en roopsha.

¹⁹ Semmalla amma tooy, horeetaayti isho wa a lakoppa qapta piisa kamma erke ka akka qaadda kelopa kalshane kode. Maana malla apteense nama isho horeeta a lakoppa kitto qara'e roopta ka ishootta lessaay.’”

²⁰ Saarra a Feri'oonippaayye a qaalese a Yaahiwwe fuure ka orxayaasso isho horeetaaysho tika kelopa kalissa jarjaren.

²¹ Ishoottoppaayye a qaalese a Yaahiwwe tuffade xoori, orxayaasso isho horeetaaysho'e lakoppa diishen.

²² Yaahiwwe ka Muuse kide, “Akka piita Kipsi piisa oppa, nama ka horeeta isho wa piisse oppa dehe piisa qara'e apteenta roopto'e harkaatti moontopeela xaashe.”

²³ Sekammaayye Muuse ka uleetaadi moontopeela qape; Yaahiwwe ka apteenta ka hankaada isho qaqqawwa lekkishe; ikka piita dawe. Yaahiwwe ka piita Kipsi qara apteenta roopshe.

²⁴ Ete apteenta roopnooyye, a olikamma in mittinin maliiyyi hankaada walqlaqno isho qaqawwa ka piisse a Kipsi qara lekkade; umma haka piita Kipsi uumamte paayyatteeyye apteenta asse pahato turanne apari in roopne.

²⁵ Piita Kipsi piisa karaayye apteentase ka wa lakoppa ca, nama isho horeeta pirte; ka dishma dullaappa co piisa patisse ka qora apari ca piisa qeqqepisse.

²⁶ Piitase a Kesemi a Isira'eeleta kara kalto patta kara apteenta ka in roopnin.

²⁷ Sekkammaayye Feri'ooni ka Muuse isho Arooni kamma erke ka halacciise ka ishootta kide, “Amma in ishin dape, Yaahiwwe dukaata qapa. Ana isho samaytiyyo xoori in ishin dapne.

²⁸ Qaqawwa isho apteentase a Waaqa ino qara i'ollin koopteey, Yaahiwwepa ino qinsada, akka alle antane'en ishin diishaay; arepa desa are kara'e a kallaattaneey.”

²⁹ Muuse ka ishi oorshe ka kide, “Oton katamoosen kara sookooyye, harkiyyon Yaahiwwepeela xaasha ka qinsada. Akka piita a Yaahiwwe koddite akka upnaatto'e, qaqawwa iqa'ada umma kammopa apteenta in kinnaatto.

³⁰ Ma xoori ke isho saarraatti ammikki'i akka Yaahiwwe Waaqa a fuurri a kinnin in upa.”

³¹ Sitiiyyi qoota talpa pise, poorta ka kara kodatta paayyite malla, piisa ka takka nyapale.

³² Kappa isho acca xoori qoota etaaysho in kaynin malla, in nyapalle.

³³ Muuse ka oori Feri'ooni kapa xa'e ka katama kara sooke; ka harkaadi opeela qapade ka Yaahiwwepa qinsade. Qaqawwase isho apteentase ka qa'atte; umma kammopa roopa in roopne.

³⁴ Ete Feri'ooni akkima roopase ka apteentase isho qaqawwase a qa'ade akkeeyye, amma juppoota kodeew; isha isho saarraadi ka karittaaysho kokkonnaysheneew.

³⁵ Karitta Feri'ooni ka kokkonnaade, akkimase a Yaahiwwe Muuse qudan haasawade mina'e, Isira'eeleta sookissa dawre.