Mataafa Sooketa 8 - Mataafa Qulqulloota

A lammatta: erkannaata a mokoota

¹ Sekkammaayye Yaahiwwe ka Muuse' kide, “Aane ka Feri'ooni' kide, ‘Yaahiwwe ikiini, akka ana waaqaysadane'e, samaytiyyo diishe!

² Oton ishootta diisha' tiinniiyyi, erkannaata a mokootatinnin piitaayti piisa qara pira.

³ Kirra Appaayi ka mokootan immakaada; ikka tikaayti a mankisteeta karopa kalan ka kaataatti a mukitta karopa kalan ka looshshaatti qaropa fayyadan ka tikka a saarraatti isho tikka a samaytaayti kuli karopa kalan ka kisaddaatti isho meehaayti a pukeessa karopa kuli kalan.

⁴ Mokowwosen ka ke ka samaytaayti isho saarraatti piisa qaropa fafayyadan.’”

⁵ Yaahiwwe ka Muuse' kide, “Arooni' kide, ‘Uleetaayi teyyado ka kirrada ka kabba isho hartada piisa qaropa harkaayti qapado ka akka mokowwa piita Kipsi qaropa sookane' kode.’”

⁶ Arooni ka pishadda piita Kipsi qaropa harkaadi qapade; mokowwasene ka sooken ka piita Kipsi qara immaken.

⁷ So'aya piita Kipsi ka ookumaaysho a juutamenne, wa asse paha' kodeneew ka mokowwasene piita piisa qaropa sooksheneew.

⁸ Feri'ooni ka Muuse isho Arooni halaacciise ka ishootta' kide, “Akka ana isho samaytiyyo qaraayye mokowwosen tawsho'e, Yaahiwwe ana' qinsada; anti akka samaytose aano ka Yaahiwwe' kalisoota kalsho'e, in diishaay.”

⁹ Muuse ka Feri'ooni' kide, “Ipaxaari! Akkan mokowwosen ke ka tikaayti kara alle' maysho'e ikka kirra Appaayi patta karopa oorane'e, akkan ke ka saarraatti isho samaytaayti' qinsanno'e xooraaw ino' qape.”

¹⁰ Feri'ooni ka kide, “A paarri koddito!” Muuse ka ishi oorshe ka kide, “A Yaahiwwe Waaqinno paho a pila akkima in kinnin akka upnaatto'e akka' kiite qara a koddito.

¹¹ Mokowwosen nefo ke ka tikaayti ka saarraatti isho samaytaayti piisa qara alle tawan; ka kirra Appaayi patta karopa ollopa ooran.”

¹² Muuse isho Arooni, ete Feri'ooni kapa sooken kammaayye, Muuse ka mokowwosen a Feri'ooni qara' qeede malla Yaahiwwepa ullupe.

¹³ Yaahiwwe ka akka Muuse' qinsade qara' kode; mokowwasene ka tikka kelan desa ka oxinta karan desa isho lakoppan desa le'en.

¹⁴ Ikka ollopa pohamen ka tuulamen; piita ka xaccatte.

¹⁵ Feri'ooni ete akka mokowwasene' le'en akkeeyye, akka Yaahiwwe' turan haasawade qara'e karittaadi kokkonnaysheew; ka Muuse isho Arooni dakaya tiite.

A sessatta: erkannaata a kuunyeta a orra qommittooti

¹⁶ Sekammaayye Yaahiwwe ka Muuse' kideewwe, “Arooni' kide, ‘Harkaayti xaashe ka uleetaayti qapado ka kuyyaalayta piita oppa dayshe; kuyyaalayta piita Kipsi kara co piisa kuunyeta orra qommitto koddaay.’”

¹⁷ Ishootta ka sede qara koden. Arooni ka uleetase qapade ka kuyyaalayta piita Kipsi oppa dayshe. Kuyyaalayta piita Kipsi kara co piisa ka kuunyeta orra qommittopa pursame ka nama isho horeeta qara pire.

¹⁸ So'ayasene a piita Kipsi ka ookumaaysho a juutamen kuunyeta orra qommitto uumeta ekkaysheneew, ma ishootta'en koddine; kuunyetase orra qommitto ka nama isho horeeta qara pirte.

¹⁹ So'ayasene a piita Kipsi ka Feri'ooni kidene, “Ini harka Waaqa!” karitta Feri'ooni xoori ikki'i kokkonnaade. Ikka akka Yaahiwwe turan kide mina'e ishootta dakaya tiite.

A arfatta: erkannaata xaaja a orra qommaati

²⁰ Yaahiwwe ka Muuse kide, “Teykanta paraappan xa'e ka oto Feri'ooni kirroppopa keenooyye tura asado ka ishi kide, ‘Yaahiwwe ikiini, akka ana waaqaysado'e samaytiiyyo diishe.

²¹ Oton akka sooko'e samaytiyyo a diinni a kinniniiyyi, tin anti ke ka saarraatti ka samaytaayti qaropa isho tikkaatti karopan urratta xaaja qishsha. Pora oppa kuti'o ka tikka Kipseeta piisa ka xaajaan immakaadan.

²² Ma xoori awsetiiyi piitase a Kesemi a samaytiyyo oppa kalo xawwa'en reexxa; xaaja ka kara dapadan; atti ka akkiman anti Yaahiwwe kodde ka piisse karaayye co upnaatta.

²³ Samaytiyyo isho xaayti arta kara'en reexa koda. Milikkitoose ka parri seeyye kodda.’”

²⁴ Yaahiwwe ka akkimase akide qara kode. Tika Feri'ooni a mankisteeta isho tikka a saarraadi piisa qara'e, urratta xaaja ka qite. xaajoosen minanne piita Kipsi piisa ka nyapalte.

²⁵ Sekkammaayye Feri'ooni ka Muuse isho Arooni halacciise ka ishootta kide, “Aana ka piisse are kitto kara'ew Waaqaayshina kalisoota kalsha.”

²⁶ Muuse xoori i'ishi kide, “Asse kodda in ettanisso! kalisootan ino Yaahiwwe Waaqinno tura dehanninno Kipseeta turaayye minynyaaqsanniiy, attan kalisoota ishootta tura minynyaaqsannaan ishootta tura dehanna? Dakaan inon dakkane?

²⁷ Akka isha ino ajaje qara'e, Yaahiwwe Waaqinno'e kalisoota kalissa'e, anta kuyyaata sessa koommaytoppopa aaneeta ino faani.”

²⁸ Feri'ooni ka ishootta kide, “Akka Yaahiwwe Waaqaayshina kalisoota kalissa koommaytoppopa antane'e in ishina faqqata ma a sekaattan; ma ana Waaqa qinsada.”

²⁹ Muuse ka ishi kide, “Akka parri seeyye xaajoosen ke Feri'ooni ka saarraatti isho samaytaayti qara alle ma'ane'e, tin anti oton amma ke kapa xata sookooyye, ennowwen Yaahiwwe ke qinsanda; ma akka samayta Yaahiwwe kalisoota kalissa'e in annini'i dawreetanne, akka a tura mina'e ino a sassapannin.”

³⁰ Muuse ka Feri'ooni kapa sooke ka Yaahiwwe qinsade.

³¹ Yaahiwwe ka akka Muuse qinsade qara kode ka Feri'ooni ka saarraadi isho samaytaadi qaraayye urrattase a xaaja alle mayshe; umma takka nefo apari in hasene.

³² Ma xoori Feri'ooni ammikki'i karittaadi kokkonnayshe diisheey, samaytase in diinne.