Mataafa Sooketa 7 - Mataafa Qulqulloota

¹ Yaahiwwe ka Muuse' kide, “Tin anti Feri'ooni tura'e, akka Waaqa' mina'en ke kode. Innaassin Arooni ka xuumampaytaayti kodda.

² Waan ke ajaje piisa Arooni' lelta. Innaassin Arooni ka akka samayta Isira'eeli piita Kipsi kara sooksho'e, turaayye Feri'ooni' lela.

³ Anti' xoori karitta Feri'oonin kokkonnaysha. Kadan punu piita Kipsi kara milikkitadda isho daxxowwa lekaya kodaayye,

⁴ Isha ishina'en dakayo; Anka piita kipsi qara' hupniyyo akkisha; ka firteeta a kutta ka qitaateta a kokkokatinni, samaytiyyo hellaasene a Isira'eeli piita Kipsi kara sooksha.

⁵ Oton hupniyyo ishootta qara akkisho ka samaytiyyo hellaasene a Isira'eeli ishootta kara sookshooyye, Kipseeta akkiman anti Yaahiwwe kodde upnaatta.”

⁶ Muuse isho Arooni ka akka Yaahiwwe ishootta ajaje qara' koden.

⁷ A Feri'ooni olli haasawadeneeyye, Muuse paraadi kunda sette, a Arooni kan kunda setteeti' sessa.

Akkima uleeta Arooni maaka koddite

⁸ Yaahiwwe ka Muuse isho Arooni' kide,

⁹ “Oto Feri'ooni ishina' kiino, ‘Wa orra qawwanna' kodeetan isi upnayshaayye’ atti Muuse, Arooni' kide, ‘Uleetaayti qeede ka Feri'ooni tura' kate’ maaka kodditaay.’”

¹⁰ Muuse isho Arooni ka Feri'ooni turopa aanen ka akka Yaahiwwe ishootta ajaje mina' koden. Arooni ka uleetase' xaadi Feri'ooni isho saarraadi tura' kate; ikka maaka koddite.

¹¹ Feri'ooni ka ookka isho tipampaya a Kipsi ollopa hale; so'ayasene a Kipsi ka ookumaaysho a juuttotatinni, asseew kodeneew.

¹² Ka matta mina ulewwaasso a qapane piitopa dakken ikka maaka kodden; ma xoori, uleeta Arooni ulewwaasso piisa loqte.

¹³ A kodditoma karitta Feri'ooni ammikki'i ikokkonnaade, umma akka Yaahiwwe kide mina'e ishootta in dakayne.

Erkannawwasene kudani a piita Kipsi qara' kodde A paayyota: akka pisha diikopa pursamen

¹⁴ Sekkammaayye Yaahiwwe ka Muuse' kide, “Karitta Feri'ooni ikokkonnaade, umma samayse diissata in heeno.

¹⁵ Waaqa ka Muuse' kide, ‘Paraappan xa'e ka Feri'ooni kapopa aane ka oto isha pisha kapopa keenooyye, atti kirra Appaayi kapa asado ka uleetase maaka koddite harkoppa' qapado.’

¹⁶ Ka ishi' kide, ‘Yaahiwwe Waaqa Ipuroota'e ke kapopa ana erke ka kide, samaytiyyo akka aano ka koommaytoppa ana waaqaysado'e, ishootta diishe; tin atti' xoori haka ammati a ajajamme.’

¹⁷ Yaahiwwe ikiini, ‘Anti akkan Yaahiwwe kodde, sedenne upnaatta. Tin pishoosen a kirra Appaayi uleese an harkoppa qaponnen daysha; ikka pursaman ka diika koddan.

¹⁸ Murkuja a kirroose a Appaayi kara co ka le'a, kirroose a Appaayi ka xaccada; umma Kipseeta pishosen a kirrooseti ika in ettanisso.’”

¹⁹ Yaahiwwe ka Muuse' kide, “Arooni' kide, ‘Uleetaayti teyyado ka pishadda piita Kipsi a kirrada ka a kabba ka a hartadaasso isho pishadda qaqqa'ade piisa qaropa harkaayti qapado; piita Kipsi karaayye pisha meeha a dakaappa koden isho a qoraappa xefene kara ca piisa diika koddaay.

²⁰ Muuse isho Arooni ka akka Yaahiwwe ishootta ajaje qara' koden, Arooni ka fuula Feri'ooni isho a saarraadi tura'e, uleetase' xaadi qeede ka pisha kirra Appaayi kara ca' dayshe. Pisha kirra Appaayi kara ca piisa ka diikopa pursamen.

²¹ Murkuja kirra Appaayi kara co piisa ka le'e. Qoota pisha kirra Appaayi xaccannaan malla, Kipseeta ka pishasene ika malaalte. Piita Kipsi kara diika ka pora piisa oppa caade.

²² So'ayasene a Kipsi ka ookumaaysho a juuttotatin assew kodeneew. Karitta Feri'ooni ka kokkonnaade. Akka Yaahiwwe' haasawade qara'e, Muuse isho Arooni'in dakaynin.

²³ Ka tiitaawe ka tikaadi a mankisteeta opa kale; umma wossen kodde we kapa'en dikne.

²⁴ Kipseeta piisa qoota pisha kirra Appaayi ikkeeta malaalte malla, kirra Appaayi kapandesa qaawwa pisha' qotatte.

²⁵ A Yaahiwwe kirra Appaayi dayshe kammaayye, kuyyaata tappa ka tarpite.