Mataafa Sooketa 5 - Mataafa Qulqulloota

Akkima Muuse isho Arooni Nuqusa Kipsi turopa aanen

¹ Sekkammaayye Muuse isho Arooni ka Feri'ooni turopa aanen ka ishi' kidene, “Yaahiwwe Waaqa Isira'eeli ikiini, ‘Samaytiyyo akka koommaytoppopa aano ka xaysonessuma ana ulfeesso'e, diishe.’”

² Feri'ooni ka ishootta' kide, “Hela allu Yaahiwwe ayno? Anka afaadi dakaya ka Isira'eeli diisha? Anti Yaahiwwe an upo; umma Isira'eeli an diisho.”

³ Muuse isho Arooni ka ishi' kidene, “Waaqa Iproota i'ino tura akkaade; akkan anta kuyyaata sessa koommaytanxata anno ka Yaahiwwe Waaqinno kalisoota kalinno ino faqqate; a taakati paaqa isho orannaane ino piraay.”

⁴ Nuqusa Kipsi xoori i'ishootta kide, “Muuse isho Arooni, maana'e samayta koda qara qaatinnittan? Ishina nefo kodaayshin qaropa tiitaawa.”

⁵ Ka kideewwe, “Samayta a piisseti qaropa orraayshin akata lekuma koope, ishina ka kodaaysho qara ishootta hattinnittan.”

⁶ Kuyyaasetiiyyiiw Feri'ooni ka Kipseese koda karpaatin ishootta kodacciisnitto isho saarrasene a Isira'eeli ishootta qara tooyna ajaje ka kide,

⁷ “A xatta mina'e akka dooqqeta laaqane'e, ishootta jiteetan an aanan. A Ishootta kamma aanaden ka ollopa pohaden.

⁸ Ma xoori, lekuma dooqqeta a turan laaqnaane qaraayye in qajinnin. Koda ishootta' qaje ikka pora ullupni ka kiini, ‘In anna ka Waaqinno' kalisoota kalinna!’

⁹ Akka haasa darada pora in dakaynini'i, arepa desa a xatta qaran qapto'e koda qara' koopisha ikka yaalen.”

¹⁰ Sekammaayye Kipseese koda karpaatin ishootta kodacciisnitto isho saarrasene a Isira'eeli kodampaya qara tooyna ka de'en ka samayta' kidene, “Feri'ooni i'ishina' kiini, ‘Arepadesa jiteeta ishina an daasho.

¹¹ Mattaayshina aana ka pora oppa jiteeta akkattaneeyye ishina haadada; Ma xoori, dooqqeta a' laaqnittan shakkayteeta nefo qara in qajto.’”

¹² Semmalla samaytase ka jiteeta faddatta'e, piita Kipsi piisa kara' pase.

¹³ Orrase koda karpaatin ishootta kodacciisno ka kide, “A xatta jiteeta ishootta' dehannaaneeyye wa kuyyaatoppa' koonaane kelopaxata akka in qajinnini'i, ishootta jarjarinni.”

¹⁴ Kipseese koda karpaatin ishootta kodacciisnitto a Feri'ooni saarrasene a Isira'eeli akka kodampaya qara tooyane qara' shuume ka ishootta karafini ka kaassanni ka kiini, “Maana'e dooqqese laaqqamitto a xala ka a awwe, a xatta mina'e a immakni akkinin?”

¹⁵ Saarrasene a Isira'eeli kodampaya qara tooyna ka Feri'ooni turopa dehaaden ka isha' kidene, “Maana'e ino orxayaatti asse payyahinni?

¹⁶ A jiteeta ino orxayaatti in dehannin mali ino' kiini, ‘Dooqqeta laaqqa ka kamma ino karafini; a ishin dape xoori, orraayti diisheey inon.’”

¹⁷ Feri'ooni ka ishootta' kide, “Iltakkumampayaay! ishina dukaatanne a iltakkumampaya! Semmallanne a' kiinittane, ‘In anna ka Yaahiwwe' kalisoota kalinna.’

¹⁸ Amma kodaayshin qaropa tiitaawa! Ofani jiteeta ishina'en dehayshan. Umma dikoota dooqqeta a laaqnittan qara a' qajissan.”

¹⁹ Saarra sene a Isira'eeli kodampaya qara tooyna ka ete ishootta' kiinaane, “Dikoota dooqqeta a' laaqnittan qara a' qajissaneeyye,” Akka rakkoota qara' pi'ene upnaaden.

²⁰ Saarrasene a Isira'eeli kodampaya qara tooyna ka ete Feri'ooni kapa tiitaaweneeyye, Muuse isho Arooni a eeyye ishootta asannaa'e akken.

²¹ Ka ishootta' kidene, “Akka Feri'ooni isho saarraadi ino xaccisadane'e' kooten ka koraateta qeetten ka harkaadippa' daasseneey, a Yaahiwwe sede ishin qara akko ka ishin qara' farato.”

Muuse akka rakkootaadi Waaqopa lelade

²² Muuse ka amma Yaahiwwepa tiitaawe ka ishi' kide, “Oo poqallaayyo! Ata maana malla' samayse qara rakkoota qeette? Ka maana malla ana erkite?

²³ Akkan maxxaaytin ishi' haasawado'e hakan Feri'ooni turopa aane paayyatteeyye isha neequmta samaytose qara' kode; umma atti pakkanna samayse xaaytin a' pahanne.”