Mataafa Sooketa 4 - Mataafa Qulqulloota

Milikkitadda daxxowwa a Waaqa Muuse' daashe

¹ Muuse ka ishi' oorshe ka kide, “Oto Isira'eeleta afaayyo dakayni in kinnin ka amanni in kinnin ka ana' kiinitto, ‘Yaahiwwe ke tura'en akkaanneeyye’ honno?”

² Yaahiwwe ka ishi' kide, “Maana' harkoppa qapta?” isha ka kide, “Uleetan qapa.”

³ Yaahiwwe ka ishi' kide, “Piitaxxata kate!” Muuse ka uleetase piitaxxata kate, ikka maaka koddite; Muuse ka alle tura qahe.

⁴ Yaahiwwe ka Muuse' kide, “Harkaayti derayshe ka tupa ekta qape!” Ikka harkaadi derayshe ka tupa ekta qape; ikka harkaadippa uleeta kodditeew.

⁵ Yaahiwwe ka ishi' kide, “Sede tooy akkiman anti Yaahiwwe Waaqa aappadaassoti Waaqa Aprihaami ka Waaqa Hisaaqi isho Waaqa Yayiqoopi ke tura akkaade amanan malla.”

⁶ Yaahiwwe ka ishi' kideewwe, “Harkaayti dunitta kela qapado.” Muuse ka harkaadi dunittaadi kela' qapade. Ete xata sooksheeyye, ikka qooshoode ka a fuuttota mina attaade.

⁷ Waaqa ka kideewwe, “Harkaayti dunitta kelopa oorsheew!” Muuse ka harkase' xaadi dunitta kelopa oorsheew; ete xaate sooksheeyye, ikka dine ka harkaadi a deyyo' pahanaade.

⁸ Yaahiwwe ka ishi' kide, “Oto milikkita a paayyota amanni in kinniniiyyi, a lammatta i'amanan.

⁹ Oton milikkitaddosen lakki amanni in kinnini ka wa' kiinitta teyyanni in kinniniiyyi, kirra Appaayi oppa pisha shakkaya muudde ka piita kokte oppa' tuqe; pishasene a kirra Appaayi oppa muuddite ka piita kokte oppa' tuqte, diika koddaneey.”

¹⁰ Muuse ka Yaahiwwe' kide, “Oo poqallaayyo! Ha anti xatta ka amma nefo a ana olli haasawwatta paayyite, kammaayye an jamareeta; umma haasa an ettaninni an co.”

¹¹ Yaahiwwe ka Muuse' kide, “Ata, a nama' afaa kode ayno? Ayno ka nama tuuta' kooni, taaki dakkayta' kooni? Ayno ka akka nama paata akko' kooni taaki qara ilda patinni? Ana Yaahiwwenne?

¹² Semmalla amma aane! Ana akka' haasawatto' kodaay ka wa' haasawatta kuli anti ke' lelaay.”

¹³ Muuse' xoori ikide, “Oo poqallaayyo! Nama pila erke.”

¹⁴ Sitiiyyi Yaahiwwe ka a kuttati Muuse qara' miirode ka kide, “Innaassin Arooni Lewittase are caay? Isha akkima fayya' haasawatta ettansaho in upa; laadi tin amma ke kapopa deeni; oto ke akkooyye akata xasooda.

¹⁵ Atti isha'e' haasawatta; ka wa a haasawada ishi' la'assa; anti ka akka' haasawattane'e ishin piisa qaarqaara ka wa' kootane ishin kollisha.

¹⁶ Atti afaayyo a Waaqa'e' koddita ka Arooni' haasawatta. Isha ka afaatti kodda ka pakkaaytippa'e, samayta' haasawada.

¹⁷ Uleese a milikkitaddasenetin ishootta tura akkisso harkoppa' qapado.”

Akkima Muuse Kipsipa tiitaawe

¹⁸ Muuse ka sottohase' xaadi Yotoori kapopa tiitaawe ka ishi' kide, “Akkan hellaasene xanno Kipsi kara ca kapopa tiitaawo ka wa oppa caane' kaassado'e ana' faqqate.” Yotoori ka ishi' kide, “Nakaytan aane.”

¹⁹ Muuse a piita Midiyaami kara cooyye, Yaahiwwe i'ishi' kide, “Orrase ke ikassa faano piisa ile'eey, Kipsipa tiitaawe.”

²⁰ Semmalla Muuse ka iskatteetaadi isho hellaadi a diira harreeta qara kukkutiishe ka piita Kipsi opa kalta' xa'e ka uleetase a Waaqa harkoppa' qapa.

²¹ Yaahiwwe ka Muuse' kideewwe, “Oto' Kipsipa tiitawtooyye, wessen orra qawwanna an harkaaytippa' xaaye Feri'ooni tura' koda in teyman. Ma xoori anti akka isha samayse in sookinnini in karittaadi kokkonnaysha.”

²² Semmalla Feri'ooni' kide, “Yaahiwwe ikiini, ‘Isira'eeli innaayyo a kuuta.

²³ Anka ke kide, akka sookan ka ana waaqaysadane'e innaayyo diishe. Atti xoori ittiitteey; semmalla anti innaatti a kuuta'en ishsha.’”

²⁴ Ete Muuse Kipsipa kallooyye, pora a oppa muke oppaayye, Yaahiwwe isha akke ka ikassa fade.

²⁵ Iskatteetaadi Sipoora ka paltitta qarta qapo qeette ka solbatta sooyya innaadi murte ka loqta Muuse qudan kayte ka kiite, “Atti diikoosetinni a' hemampaytiyyo!”

²⁶ Yaahiwwe ka alle isha diishe; isheetta ka solbatta sooyya innaadi mureeta minanne ishi' kiite, “Atti diikoosetinni a' hemampaytiyyo.”

²⁷ Yaahiwwe ka Arooni' kide, “Muuse turopa koommaytoppopa aane!” Ikka aane ka irroota Waaqa qara isha teye ka dinke.

²⁸ Muuse ka afaasene a Yaahiwwe ishin erke ka milikkitaddasene akka kodo isha ajaje piisa Arooni' lele.

²⁹ Muuse isho Arooni ka aanen ka qimayasene a samayta Isira'eeli piisa ollopa halen.

³⁰ Arooni ka afaasene a Yaahiwwe turan Muuse' haasawade piisa ishootta' lele; ka milikkitaddasene kuli ishootta tura' kode.

³¹ Ishootta ka dukaysaden ka akkima Yaahiwwe ishootta tooyyade ka miiddamaaysho akke dakayeneeyye, ikilpiippaden ka ishi' sakatattaan waaqaysaden.