Mataafa Sooketa 34 - Mataafa Qulqulloota

Dakadda qaqqahanaayshen ka kodene a pila lakki

¹ Yaahiwwe ka Muuse kide, “Dakadda qaqqaaha a paayyota paha lakki xefe; anti qaalewwasene dakaddasene a paayyota a atti mammaajte qara caa'en qara taafaay.

² Atti paraappan harmisado ka teykana irroota Siina qaropa xooye ka kuutase a irroota qara ana tura qa'ado.

³ Nama takka nefo ke olli in fayyannin; umma nama takka nefo irroose qara paka takka nefon in akkaannin umma xelloota a kahirra ka a tela ka a lo'alla, fuula irrooseti turopa in dawwannin.”

⁴ Muuse ka dakadda qaqqaaha a paayyota paha xefe; ka akka Yaahiwwe ajaje qara'e paraappan xa'xe ka irroota Siina qaropa fayyade ka dakaddasene qaqqaaha lakki harkoppa qaqqapade.

⁵ Yaahiwwe ka urrattan lekkade ka eyye isha kapa qa'ade ka maxxase xaadi “Yaahiwwe” kidammo salishe.

⁶ Yaahiwwe ka Muuse turandesa qatte ka salishe ka kide, “Yaahiwwe a diissata ka suraysatta alle pure; Yaahiwwe a tapo miironni in kinnin a xoona isho amanama alle koope;

⁷ A xeltada kumadda xoonasene xaadi pirama in qapnin tooytino ka ukkuttuma ka tiyya isho kamma dapayna diinno. Ma xoori a ishin dape, a qatta'o mali a diinni in kinnin ka juppoota a aappada kapa'e, haka xelta sessa ka afuriti'i hella ka oopadda qattaano.”

⁸ Muuse ka ennow piitopa xata kide ka ishi sakatade

⁹ ka kide, “Oo poqlo, oton in ke tura teyyatama teyeeyye, atti poqlo ino olli aane; kadi punu samayse a xolmaadi kokkonanno koddeeyye, neequmtinno isho juppootinno ino diishe ka lehnaatti ino kodado ka ino teyyado.”

Akka kodayteetase a lammattati harmisamte

¹⁰ Yaahiwwe ka Muuse kide, “Tin anti samayta Isira'eeli ollin kodayteeta kodada. Ka fuulaaysho tura'e daxxowwa piita qara apari samayta takka nefoppa in koddinin ishoottopa koda; qootan ishin tura wa orra qawwanna kodo malla, samayta ishina oppa kaltan, koda orra fuurinno an anti Yaahiwwe ishina koono akka.

¹¹ Waan awwe ishin ajajna tooytaatta anti Amoorata ka Kene'aaneta ka Hittaata ka feresaata ka Hiwwaata isho Yapuusatan ke tura alle sooksha.

¹² Akka ishin tura turuura in koddinini'i orra piisse a oppopa annitan oppa kalo olliiyyi akka kodayteeta takka nefo a kodannini'i isi tooytada.

¹³ Porraasso a kalisoota alle qitqishsha ka dakaddaasso a qa'adene oppa faata ka olaahiyyaasso a asheera alle quura;

¹⁴ “Anti Yaahiwwe a maxxiyyo yo'ampayta kodde an yo'ampayta Waaqa'ey, ana mali Waaqa pila'en waaqaysadan.

¹⁵ Orra piiseti oto waaqaddaasso kamma antan almalummaaneeyye ka ishootta kalisoota kalinnaaneeyye, qoota issippopa ishin halan akka olli kalisootaaysho damtan malla, akka ishootta olli kodayteeta a kodannini'i tooytaada.

¹⁶ Oton tuparraasso'e hellaassin a diiraati hemitaneeyye, tuparraasso waaqaddaasso kamma antaanne almaluman ka akka hellaassin a diira kuli almalumane kodan.

¹⁷ “Silpallaan liilshan ka killowwa'en kodadan.

¹⁸ “Akkan turan ishin ajaje qara'e, xaysonessuma a laaqqota a kara haddaya in qapnin ulfeessa; ka kuyyaata tappa kara'e laaqqota a kara haddaya in qapnin dama. Qoota turan leya Apiipi oppa piita Kipsi kara sookten malla, leya Apiipi oppa'e xaysonessumoosen xooraan qapame ulfeessitan.

¹⁹ “Inna diirta a aayya qara xaaya paayyite piisa xayyoow; ka nuunna a xorma kodde a sa'a isho a kaharra piisa xayyoow.

²⁰ Nuunnayya xorma kodde a paayyota dalade a harreeta, laahan furada ma oton a furanni a kinniniiyi qara xolma quu'a ka hellaassina a diira a paayyota dalade piisa asseew furada; umma nama takka nefo harka lulen ana turopa in dehaannin.

²¹ “Kuyyaata lehi kara koda kodada ka a tappattati nessada; kada punu eta a ayla taaki a fera kodditaayye, kuyyaata tappattati nessada!

²² “Oto kappa qarpatta mujnittaneeyye, xaysonessuma a fera'e ulfeessitan ka piraampira para qara xaysonessuma a unta kalsatta ulfeessitaneew.

²³ “Hellaa a diira piisa, paroppa sessaanne a Yaahiwwe Waaqa Isira'eeli, turopa dehaaden.

²⁴ Samaytose'en ishin turaayye alle sooksha ka xeelaayshin paldisha; umma kisewwa a xaysonessumaddosen sessa a oppa fuuliyyo a Yaahiwwe Waaqaayshina tura akkaatta sooknittan karaayye, nama takka nefo piitaayshin torpeeta in xajeelo.

²⁵ “Diika horeeta a kalisoota ana kalte, wa kara haddaya caane ollin ana'en dehayshan; umma so'a a xaysonessuma a qarantarpeetati qalame paarraytopa an mukshan.

²⁶ “Para mina'e unta a feratten oppaayye, qarpatta tika Yaahiwwe a Waaqaayshina opan xooya; umma so'a a nuunnayya telteeta taaki a kaharta aanna aayyaassoti oppa in xarshan.”

²⁷ Yaahiwwe ka Muuse kide, “Qaalese taafe; anti qaalese qara'en ke isho Isira'eeleta olli kodayteeta kodadeey.”

²⁸ Muuse ka irroose qara'e, Yaahiwwe olliiyyi kuyyaata kunda afuri ka halkeetta kunda afuri pire; umma we in damme umma we in ikkine ka dakaddasene lakki qara'e, qaalese a kodayteeta seerase kudani taafe.

Muuse akka irrootase a Siina qara lekkade

²⁹ Muuse ete dakaddaasene qaqqaaha lakki a maakkuma harkoppa qaqqapade ka irroota Siina qara xata lekkannooyye, qoota turan Yaahiwwe olli haasawade malla, akka fuulaadi la'ayno in upnaanne.

³⁰ Arooni isho Isira'eeleta piisa ete Muuse akkeneeyye; tin fuuladi ka tupa la'ayni ikka isha kapopa dehatta fuuren.

³¹ Muuse ka ishootta hale; Arooni isho saarrasene a samayta ka isha turopa dehaaden; ikka ishootta haasawade.

³² Sekkammaayye Isira'eeleta piisa ka isha turopa dehaatteew; ikka seerase a Yaahiwwe irroota Siina qara ishi haasawade piisa ishootta daashe.

³³ Muuse ete ishootta haasawade ka dikkishe kammaayye, fuulaadi qara dekade.

³⁴ Muuse xoori oto Yaahiwwe olli haasawatta tukkanase a Waaqa kela co opa kullinooyye, haka sookno kara'e waasene a fuula qaran dekade'e alle ma'inni ka oto sookooyye wa Yaahiwwe isha ajaje samayta Isira'eeliti lelli.

³⁵ Samayta Isira'eeli ka akka fuulaadi la'ayno akkini; haka Yaahiwwe olli haasawatta kullino kara'e Muuse ka fuulandekaan fuulaadi qara dekanni.